Den Bibel, Inhoudende dat Oude ende Nieuwe Testament (Biestkensbijbel)

¶ Dat .iiij. Capittel.

¶ De Heydenen willen ooc met haer timmeren. Ende als haer dat niet gegont en wert, so behinderen sy dat met raet ende brieuen.

1

⁺ MAer^† doen de wederpartijders Iuda ende BenIamin hoorden, dat de kinderen der gheuanckenissen den HEEre den God Israels den Tempel timmerden,

+ A vers 1

† 3.Esd. 5.g.66

2

Quamen sy tot Serubabel, ende totten Ouersten Vaderen, ende seyden tot hen: Wy willen met v timmeren. Want wy soecken uwen Godt, ghelijck als ghy. Ende wy en hebben niet gheoffert^† sint ter tijt, dat ons AssarHadddon, de Coninc te Assur herwaerts heeft ghebracht.

† 4.Re. 17.e.24

3

Maer Serubabel, ende Iesua, ende de ander Ouerste Vaderen onder Israel antwoorden hen: Het en betaemt niet, ons ende v, dat huis ons Gods te timmeren: Maer wy willen alleen timmeren den HEEre den Gode Israels,^† soo ons Cores de Coninck in Persen gheboden heeft.

† 1.Esd. 1.a.2.

4

Doen^† behinderde dat volc inden lande, de hant des volcx Iuda, ende veruaer-

† Belettede

[p. 177v]

dense daer af int timmeren.

5

Ende huerden raetgheuers teghen hen, ende behinderden haren raet, also langhe als Cores de Coninck in Persen leefde, totten Coninckrijck Darij des Conincx in Persen.

6

Want doen Ahasueros Coninc wert int beghinsel zijns Conincrijcx, schreuen sy een beschuldinghe, teghen die van Iuda ende Ierusalem.

7

⁺ Ende inden tijden Arthahsastha, schreef Bislam, Mithredath, Thabeel, ende de andere haers raets, tot Arthahsastha den Coninck in Persen. Dat schrift des briefs was in Sirischer talen gheschreuen, ende wert in Sirischer talen wtgeleyt.

+ B vers 7

8

Rehum de Cancellier, ende Simsai de schrijuer, schreuen desen brief teghen Ierusalem tot Arthahsastha den Coninck.

9

Wy Rehum de Cancellier, ende Simsai de schrijuer, ende andere des Raets van Dina, van Apharsach, van Tharplat, van Persen, van Arach, van Babel, van Susan, van Deha, ende van Elam.

10

Ende de ander volcken^† welcke de groote ende beroemde Asnaphar ouer bracht, ende hadse gheset inde steden Samaria, ende andere aen dese sijde des waters, ende in Canaan.

† 4.Re. 17.e.24

11

Ende dit is dat inhout des briefs, die sy totten Coninck Arthahsastha seynden.

12

⁺ Vwe knechten de mannen aen dees sijde des waters, ende in Canaan. Den Coninck sy kenlijc, dat de Ioden die van v tot ons opgecomen zijn te Ierusalem, inde oproeryghe ende boose stadt, timmeren de selue, ende maken haere mueren, ende brenghense wt den fondament.

+ C vers 12

13

So sy nv den Coninck kenlijc, ist dat dese stadt getimmert wort, ende de mueren weder ghemaect, soo en sullen sy dat schot, tolle, ende iaerlijcke Chijnsen niet gheuen. Ende haer voornemen sal den Coninck schade brengen.

14

Nv wy alle die daer by zijn, wy die den Tempel verstoort hebben, en hebben wy den smaet des Conincx niet langher willen sien: Daer om seynden wy, ende laten den Coninck de wete doen.

15

Datmen laet soecken inde Cronijcken uwer Vaders, soo suldy vinden inden seluen Cronijcken, ende onderuinden, dat dese stadt oproerich ende schadelijck is den Coninghen ende landen, ende doent dat andere oock af vallen van outs, Daerom is de stadt ooc^‡ verstoort.

‡ Verdoruen, verdestrueert

16

Daerom laten wy den Coninck weten, dat, ist dat dese stadt getimmert wort, ende hare mueren gemaect, so en suldy voor haer niet behouden aen dees sijde des waters.

17

⁺ Doen seynde de Coninc een antwoort tot Rehum den Cancellier, ende Simsai den schrijuer, ende den anderen haers raets die in Samaria woonden, ende den anderen ouer ghene sijde des waters.

+ D vers 17

18

Vrede ende groete: Den brief die ghy ons gheseynt hebt, is opelijck voor my ghelesen,

19

Ende het is van my beuolen, datmen soecken soude. Ende men heeft gheuonden, dat haer dese stadt van outs teghen de Coninghen gheset heeft, ende oproer ende afual daer in geschiet is,

20

Oock zijnder machtige Coninghen te Ierusalem geweest, die heerschappie ghehadt hebben ouer al dat aen ghene sijde des waters is, dat hen Tolle, Schotte, ende iaerlijcksche Chijnsen ghegeuen werden.

21

Soo doet nv na desen beuele: Belettet de selue mannen, dat de stadt niet ghetimmert en worde, tot dat van my dat beuel ghegheuen worde.

22

Dus siet nv toe, dat ghi hier niet traech in en zijt, op dat gheen schade den Coninck toe en come.

23

Doen nv den brief des Conincx Arthahsastha ghelesen wert, voor Rehum, ende Simsai den schrijuer ende haren raet, trocken sy haestelijck op na Ierusalem totten Ioden, ende belettent hen metten arme ende gewelt.

24

Doen hielt dat werc op aent huys Gods te Ierusalem, ende bleef achter tot int tweede iaer Darij des Conincx in Persen.