Den Bibel, Inhoudende dat Oude ende Nieuwe Testament (Biestkensbijbel)

¶ Dat .iij. Capittel.

¶ Dat volc vergadert te Ierusalem, de Priesters stichten den Altaer, sy houden de Feesten, ende den offer, Ende sy maken ghereetschap om den Tempel te timmeren.

1

⁺ ENde doen de^† seuenste maent ghenaecte, ende de kinderen Israels nv in hare steden waren, quam dat volc te samen, als een man te Ierusalem.

+ A vers 1

† 2.Esd. 8.a.1. 3.Esd. 5.d.45

2

Ende^† Iesua de sone Iozadak maecte hem op, ende zijne broeders de Priesteren^* ende Serubabel de sone Sealthiel, ende zijne broeders, ende timmerden den Altaer des Gods Israels, om Brandtoffer daer op te offeren, soo het gheschreuen staet inde Wet Mose des mans Gods.

† Ecc. 49.b.14

* Ecc. 49.b.13

3

Ende stelden den Altaer op zijn ghestoelte (want daer was een verschrickinghe onder hen vanden volcken inden landen) ende offerden den HEEre Brantoffer daer op^† des Morghens ende des Auonts.

† Num. 28.a.3.

4

Ende hielden der Loouerhutten Feeste^* so het geschreuen staet, ende deden Brantoffer alle daghe, na dat ghetal so het behoort, op elcken dach zijnen offer.

* Nu. 29.a.1.

5

⁺ Daer na oock de dagelijcsche Brantoffers, ende der nieuwer maenden, ende alle der feestdaghen des HEEren, die gheheylicht waren, ende alderhande vrijwillighen offer, die sy den HEEre vrijwillichlijck deden.

+ B vers 5

6

^† Inden yersten dach der seuenster maent, begosten sy den HEEre Brantoffer te doen. Maer dat fondament des Tempels des HEEren en was noch niet geleyt.

† 3.Esd. 5.e.51.

7

Maer sy gauen gelt den steenhouwers, ende timmer-lieden, ende spijse, ende dranc, ende olie dien tot Sidon ende te Tyro, dat si Cederen hout van Libanon op de See na Iapho souden brenghen, na den beuele Cores des Conincx in Persen, aen hen.

8

Inden tweeden iaer haerder toecoemst, totten huyse Gods te Ierusalem der tweeder maent beghosten Serubaal de sone Sealthiel, ende Iesua de sone Iozadak, ende de ouergebleuene haerder broeders, Priesters ende Leuiten, ende alle die vander geuanckenisse ghecomen waren te Ierusalem, ende stelden de Leuiten, van twintich iaren ende daer ouer, om voor te drijuen dat werc aenden huyse des HEEren.

9

Ende Iesua stont met zijnen sonen ende broederen, ende Kadmiel met zijnen sonen, ende de kinderen Iuda als een man, om toe te drijuen de arbeyders aenden huyse Gods, te weten, de kinderen Henadad, met haren kinderen, ende haren broederen de Leuiten.

10

⁺ Ende doen de boulieden dat fondament leyden aenden Tempel des HEEren, stonden de Priesters gecleet, met Trompetten. Ende de Leuiten de kinderen Assaph, met Cymbalen, om den HEERE te louen met den^† ghedichte Dauids des Conincx Israels.

+ C vers 10

† 1.Par. 17.b.7 Psa. 147.b.7 150.a.1.

11

Ende songhen deen na dander, met louen ende dancken den HEEre, dat hy goet is, ende dat zijn ontfermherticheyt eewelijck duert ouer Israel. Ende allet volck riep luyde, met den HEEre te louen, dat dat fondament aen dat huys des HEEren gheleyt was.

12

Mer vele der ouder Priesteren ende Leuiten, ende Ouersten Vaders, die dat voorleden huys gesien hadden, ende dit huys nv voor haren oogen ghefondeert wert, weenden seer luyde. Maer vele riepen met blijschappen, dat dat gecrijsch hooch clanc.

13

Alsoo dat dat volck niet onderkennen en coste, dat geluyt met blijschappen, voor dat ghecrijsch des weenens int volck, Want dat volck riep luyde, alsoo datmen dat ghecrijsch verre hoorde.