Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxxv. Capittel.

Iosia hout dat feeste van Paesschen, hy ordineert Priesters ende Leuiten.

1

⁺ ENde Iosia^† hielt den HEEre Passah te Ierusalem, ende sloech dat Passah inden verthiensten dach der eerster maent.

+ A vers 1

† 4.Re. 23.c.21. 3.Esd. 1.a.1. Deut. 16.a.1.

2

Ende hy stelde de Priesters in haer wacht, ende stercktese tot haren officie inden huyse des HEEREN.

3

Ende sprack totten Leuiten, die gheheel Israel leerden, ende den HEEre geheylicht waren: Settet de heylige Arcke int huys dat Salomo de sone Dauids des Conincx Israels ghetimmert heeft.^* Ghy en sultse niet op de schouderen draghen. Dus dient nv den HEEre uwen Gode, ende zijne volcke Israel,

* 1.Pa. 24.d.26

4

Ende bereydet dat huys uwer vaderen in uwe ordine, soo sy beschreuen is van Dauidt den Coninck Israels, ende zijnen sone Salomo.

5

Ende staet int Heylichdom, na de ordinancie der vaders huysen onder

[p. 175v]

uwen broederen, vanden volcke geboren. Oock de ordinancie der vaders huysen onder den Leuiten.

6

Ende slaet dat Passah, ende heylicht v, ende schict uwe broeders, dat sy doen na den woorde des HEEren, door Mose.

7

^* Ende Iosia gaf totter Heffinge voor den gemeynen man, lammeren, ende ionge geyten (altemael totten Passah voor alle die daer voorhanden waren) int getal dertich duysent, ende drie duysent Runderen altemael vanden goede des Conincx.

* 2.Pa. 30.e.25.

8

Maer zijn Vorsten gauen totter Heffinge vrijwillich voor dat volc, ende voor de Priesters ende Leuiten (te weten Hilkia, Sacharia ende Iehiel, de Vorsten inden huyse Gods onder de Priesteren) totten Passah, twee duysent ende ses hondert [lammeren ende geyten] daer toe driehondert runderen.

9

Maer Chanania, Semaia, Nethaneel, ende zijn broeders, Hasabia, Iehiel ende Iosabad, der Leuiten Ouerste, gauen totter Heffinge, den Leuiten totten Passah, vijf duysent [lammeren ende gheyten] ende daer toe vijf hondert runderen.

10

⁺ Also wert den dienst Gods beschict, ende de Priesters stonden in haer plaetse, ende de Leuiten in hare ordine, na dat ghebot des Conincx.

+ B vers 10

11

Ende sy sloegen dat Passah, ende de Priesters nament van haren handen, ende sprengdent, ende de Leuiten trocken hen de huyt af,

12

Ende namen de Brantofferen daer af, dat syse souden geuen onder de deelen der vader huysen, in haren ghemeynen hoop, den HEEre te offeren,^* ghelijc het gheschreuen staet inden Boec Mose.

* Leuit. 1.a.3.

13

Also deden sy metten runderen ooc.^† Ende sy coocten dat Passah by het vyer alsoot behoort. Maer wat gheheylicht was, dat coockten sy in potten, ketelen ende pannen, ende sy maectent haestelijc voor den gemeynen hoope.

† Exod. 12.b.8.

14

Maer daer na bereyden sy oock wat voor hen, ende voor de Priesters. Want de Priesters de kinderen Aaron, arbeyden aen dat Brantoffer ende vette tot inder nacht. Daerom moesten de Leuiten voor hen, ende voor de Priesters de kinderen Aarons wat bereyden.

15

⁺ Ende de sanghers de kinderen Assaph stonden in haer plaetse na den^† ghebode Dauids, ende Assaph, ende Heman, ende Iedithun des Sienders des Conincx, ende de Portiers aen alle poorten. Ende sy en weken niet van haren officie. Want de Leuiten hare broeders bereyden wat voor hen.

+ C vers 15

† 1.Par. 26.a.1. 27.a.1.

16

Also wert beschict alle Gods dienst des HEEren, in dien dage datmen Passah hielt, ende Brandtoffer dede opten Altaer des HEEren, na den ghebode des Conincx Iosia.

17

Also hielden de kinderen Israels, die voorhanden waren, Passah in die tijt, ende dat feeste der ongesuerder brooden seuen dagen lanc.

18

Daer en was gheen Passah in Israel gehouden gelijck dat, vander tijt Samuels des Propheten aen, ende gheen Coninc Israels en hadde sulcken Passah ghehouden, als Iosia Passah hielt, ende de Priesters, Leuiten, geheel Iu-da, ende wat van Israel voorhanden was, ende de inwoonders te Ierusalem.

19

Inden achthiensten iaer des Conincrijcx Iosia, wert dit Passah gehouden.

20

⁺ Na desen, doen Iosia dat huys bereyt hadde, trock^† Necho de Coninc in Egipten op, om te strijden tegen Carchemis, aen Phrath. Ende Iosia troc wt hem teghen.

+ D vers 20

† 4.Re. 23.f.29. 3.Esd. 1.c.25.

21

Maer hy seynde boden tot hem, ende dede hem seggen: Wat heb ick met v te doen, ghy Coninck Iuda? Ick en come nv niet teghen v, maer ic strijde tegen een huys, ende God heeft gheseyt, dat ick my soude haesten. Hout op van Gode, die met my is, op dat hy v niet en verderue.

22

Maer Iosia en keerde zijn aensicht niet van hem, maer schicte hem om tegen hem te strijden, ende en hoorde de woorden Necho niet wt den monde Gods. Ende quam om teghen hem te strijden, op dat effen veldt by Magiddo.

23

Mer de Schutters schoten den Coninck Iosia. Ende de Coninck sprac tot zijne knechten:^† Voert my herwaerts ouer want ick ben seer ghewont.

† 3.Re. 22.f.34. 3.Esd. 1.c.30.

24

⁺ Ende zijn knechten namen hem van dien wagen, ende voerden hem op zijnen anderen wagen, ende brachten hem te Ierusalem. Ende hy sterf ende wert begrauen onder de grauen zijnder vaderen.^† Ende gheheel Iuda ende Ierusalem droegen rouwe om Iosia,

+ E vers 24

† Sach. 12.c.11.

25

Ende Ieremia beclaechde Iosia. Ende alle Sangers ende sangerssen, spraken haer Claechlieden ouer Iosia, tot op desen dach. Ende maecten een gewoonte daer wt in Israel. Siet, het is geschreuen onder de Claechlieden.

26

Wat meer van Iosia te seggen is, ende zijne ontfermherticheyt, na der schrift in de wet des HEEren,

27

Ende zijne geschiedenisse, beyde de eerste ende de laetste, siet, dat is gheschreuen in dat boeck der Coninghen Israels ende Iuda.