Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxxvj. Capittel.

¶ Ioachas zijn soon wort Coninc, die regeert drie maent, na hem Eliakim, Iehoiakim elf iaer, den seluen voert NebucadNezar tot Babilonien, ende in zijn plaetse regeert Iehoiachin zijn soon die wert oock te Babel gheuoert.

1

⁺ ENde^† dat volc inden lande nam Ioahas den sone Iosia, ende maeckten hem Coninc in zijns vaders plaetse te Ierusalem.

+ A vers 1

† 4.Re. 23.f.30. 3.Esd. 1.d.34.

2

Ioahas was drientwintich iaer out doen hy Coninc wert, ende regeerde drie maenden te Ierusalem.

3

Want de Coninck in Egipten settede hem af te Ierusalem ende schatte dat Lant om hondert centener siluers, ende een centener gouts.

4

Ende de Coninc in Egipten, maecte Eliakim zijnen broeder, Coninck ouer Iuda ende Ierusalem, ende veranderde zijnen naem Ioiakim. Maer zijnen broeder^† Ioahas nam Necho ende bracht hem in Egipten.

† 4.Re. 23.g.34

5

Ioiakim was vijfentwintich iaer out doen hy Coninc wert, ende regeerde elf iaer te Ierusalem. Ende dede dat den HEEre zijnen Gode qualijck beuiel.

6

Ende^† NebucadNezar de Coninc te Babel troc tegen hem op, ende bant hem met ketenen, dat hy hem na Babel voerde.

† 4.Re. 24.a.1.

7

Ooc bracht NebucadNezar sommi-

[p. 176r]

ghe^† vaten des huys des HEEren na Babel, ende leydese in zijnen tempel te Babel.

† 1.Esd. 1.b.7. Dani. 1.a.2.

8

Wat meer van Ioiakim te seggen is, ende zijne grouwelen die hy dede, ende die aen hem beuonden werden, siet, die zijn gheschreuen in den boeck der Coninghen Israels ende Iuda. Ende zijn soon Ioiachin wert Coninc in zijn stede.

9

⁺ Ioiachin was acht iaer out, doen hy Coninck wert, ende regeerde drie maenden ende thien daghen te Ierusalem. Ende dede dat den HEEre qualijck beuiel.

+ B vers 9

10

Maer doen dat iaer om quam, seynde NebucadNezar henen, ende liet hem na Babel halen, met de costelijcke vaten in het huys des HEEren. Ende maecte Sedekia zijnen broeder Coninck ouer Iuda ende Ierusalem.

11

^† Sedekia was eenentwintich iaer out doen hy Coninc wert, ende regeerde elf iaer te Ierusalem.

† Iere. 52.a.1. 4.Regum. 24.d.18.

12

Ende dede dat den HEEre zijnen Gode mishaechde, ende en verootmoedichde hem niet voor den Propheet Ieremia, die daer wt den monde des HEEren sprack.

13

Daer toe werdt hy afuallich van NebucadNezar den Coninc te Babel, die eenen eedt by God van hem genomen hadde, ende wert hertneckich, ende verstocte zijn herte, dat hy hem niet en bekeerde totten HEere den God Israels.

14

Oock alle Ouerste onder de Priesteren metten volcke, maecten des sondigens vele, na alderhande grouwel der Heydenen, ende veronreynichden dat huys des HEEren, dat hy gheheylicht hadde te Ierusalem.

15

^+† Ende de HEEre haerder vaderen God, seynde vroech tot hem door zijne boden. Want hy spaerde zijn volck ende zijn wooninghe.

+ C vers 15

† Ierem. 25.a.2.

16

Maer sy bespotteden de boden Gods, ende verachteden zijne woorden, ende beghecten zijne Propheten, tot dat de verbolghentheyt des HEeren ouer zijn volc wiesch, also datter geen heelen meer aen en was.

17

^† Want hy leyde den Coninc der Chaldeen ouer hen, ende liet verworghen hare ionge vrome mannen met den sweerde, inden huyse haers Heylichdoms, ende en spaerde noch de iongelinghen, noch de maechden noch den ouden, noch den grootvaderen, altemael gaf hyse in zijne hant.

† 3.Reg. 9.b.6. 4.Reg. 25.a.1

18

Ende alle vaten inden huyse Gods, groot ende cleyne, de schatten inden huyse des HEEren, ende de schatten des Conincx ende zijnder Vorsten^† liet hy altemael na Babel voeren.

† 4.Re. 20.c.16

19

Ende sy^* verbranden dat huys Gods, ende braken de mueren te Ierusalem af, ende alle hare palleysen verbranden sy met vyer, alsoo dat alle hare costelijcke gereetschap bedoruen werdt.

* 3.Reg. 9.a.7

20

Ende wie vanden sweerde ouerbleuen was, die voerde hy wech na Babel. Ende sy werden zijne, ende zijnder sonen knechten, tot dat dat Conincrijc der Persen regeerde,

21

⁺ Op dat dat woordt des HEEren veruult soude worden, door den mont Ieremia,^‡ tot dat dat lant aen zijne Sabbathen genoech hadde. Want den gheheelen tijt der verstooringe wast Sabbath, tot dat tseuentich iaer veruult werden.

+ D vers 21

‡ Iere. 25.b.11. 29.b.10. Leui. 26.e.34

22

^* Maer inden eersten iaer Cores des Conincx in Persen, op dat dat woort des HEEren veruult soude worden^‡ door den mont Ieremie gesproken,^† verwecte de HEEre den geest Cores des Conincx in Persen, Dat hy dede wtroepen door zijn gheheel Conincrijc, oock door schrift ende segghen:

* 1.Esd. 1.a.1. 3.Esd. 2.a.1.

‡ Iere. 25.b.12

† Dan. 9.e.25.

23

Soo spreeckt Cores de Coninck in Persen: De HEERE de God vanden Hemel heeft my alle Conincrijcken inden Lande ghegeuen, ende heeft my beuolen hem een huys te timmeren tot Ierusalem in Iuda. Wie nv onder v van zijnen volcke is, met dien sy de HEEre zijn Godt, ende trecke op.

¶ Eynde des tweeden Boecx der Cronijcken.