Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxxiij. Capittel.

¶ Van den rijcke ende leuen des godlosen Conincx Manasse, Ooc van zijnen gebet tot God, ende zijn beteringe.

1

⁺ MAnasse was^† twelf iaer out, doen hy Coninc wert, ende regeerde vijfenvijftich iaer te Ierusalem,

+ A vers 1

† 4.Reg. 21.a.1

2

Ende dede dat den HEEre mishaechde, na de grouwclen der Heydenen, die de HEEre voor de kinderen Israels verdreuen hadde.

3

Ende keerde hem om, ende timmerde de Hoochten^† die zijn vader Hiskia af gebroken had. Ende stichte Baalim Altaren, ende maecte Boschkens, ende aenbadt alderhande Heyr aenden Hemel, ende diende hen.

† 4.Re. 18.a.4

4

Hy timmerde oock Altaren int huys des HEEREN, daer de HEEre af ghesproken heeft:^† Te Ierusalem sal mijnen Naem zijn eewelijc.

† 2.Par. 7.c.16.

5

Ende timmerde Altaren alderhande heyr aenden Hemel, in beyden houen aent huys des HEEren.

6

Ende hy liet zijne^† Sonen doort vier gaen, int

† Leui. 18.c.21 Deut. 18.b.10. 4.Reg. 16.a.3

[p. 174v]

dal des soons Hinnom. Ende vercoos daghen, ende achtede op voghelen sanck, ende toouerde, ende stichte waerseggers ende Teeckenbedieders, ende dede veel dat den HEEre mishaechde, om hem te vertoornen.

7

⁺ Hy settede ooc Beelden ende Afgoden, die hy maecken liet int huys Gods, daer de HEEre Dauid af gesproken hadde, ende Salomo zijnen sone: In desen huyse te Ierusalem^† die ic vercoren hebbe voor alle stammen Israels, wil ick mijnen Name setten eewelijck.

+ B vers 7

† 3.Reg. 9.a.3.

8

Ende en wil den voet Israels niet meer laten wijcken vanden Lande, dat ick haren vaderen bestelt hebbe, soo verre sy hen houden, dat sy doen, al wat ic hen geboden hebbe, in alle Wetten, geboden ende rechten door Mose.

9

Maer Manasse verleyde Iuda, ende die tot Ierusalem, dat sy arger deden dan de Heydenen, die de HEEre voor de kinderen Israels verdreuen hadde.

10

Ende al liet de HEEre met Manasse ende zijnen volcke spreken, sy en aenmercktens niet.

11

⁺ Daerom^† liet de HEEre ouer haer comen, de Vorsten des heyrs, des Conincx te Assur, die namen Manasse gheuangen met boyen, ende bonden hem met ketenen, ende brachten hem na Babel.

+ C vers 11

† Deut. 28.d.36 Iob. 36.a.6.

12

Ende doen hy inden anxt was^† smeecte hy voor den HEEre zijnen God, ende verootmoedichde hem seer voor den God zijnder vaderen.

† Deut. 30.a.1. 2.Pa. 15.a.2.

13

Ende badt ende smeeckte hem. Doen verhoorde hy zijn smeecken, ende bracht hem weder te Ierusalem in zijn Conincrijck. Doen bekende Manasse dat de HEEre Godt is.

14

Daerna timmerde hy de buytenste mueren aen de stadt Dauids, van Westwaert aen Gihon, in de beke, ende daermen ter vischpoorten in gaet, ende rontom aen^† Ophel, ende maectese seer hooch. Ende leyde Hooftlieden in de vaste steden Iuda.

† 2.Esd. 3.e.27.

15

Ende^† nam wech de vreemde goden, ende de Afgoden wt den huyse des HEEren, ende alle Altaren die hy ghetimmert hadde, opten berch des huys des HEEren, ende te Ierusalem, ende werpse wt voor de stadt.

† 2.Pa. 14.a.2. 17.a.1. 31.a.7.

16

Ende bereyde den Altaer des HEEren, ende offerde daer op Dancoffer ende Lofoffer, ende beual Iuda, dat si den HEEre den Gode Israels dienen souden.

17

Doch offerde dat volck^† op de Hoochten, hoe wel den HEEre haren Gode.

† Deut. 12.a.2.

18

⁺ Wat meer van Manasse te segghen is, ende zijn ghebet tot zijnen God, ende de reden der Sienders, die met hem spraken inden naem des HEEren des Gods Israels, Siet, die zijn onder de gheschiedenissen der Coninghen Israels,

+ D vers 18

19

Ende zijn ghebet ende smeecken, ende alle zijn sonden ende de plaetse daer hy de hoochten op timmerde, ende Boschkens ende Afgoden stichte, eer hy verootmoedicht wert, siet, die zijn gheschreuen, onder de gheschiedenissen der Sienders.

20

Ende Manasse ontsliep met zijnen vaderen, ende sy begroeuen hem in zijn huys. Ende zijn soon Amon wert Coninc in zijn plaetse.

21

Amon^† was tweentwintich iaer out doen hy Coninck wert, ende regeerde twee iaer te Ierusalem.

† 4.Re. 21.d.19.

22

Ende dede dat den HEEre qualijck beuiel, ghelijck zijn vader Manasse ghedaen hadde. Ende Amon offerde alle den Afgoden die zijn vader Manasse ghemaect hadde, ende diende hen.

23

Mer hi en verootmoedichde hem niet voor den HEEre, ghelijck hem zijn vader Manasse verootmoedicht had, want Amon maecte der schult vele.

24

Ende zijne knechten maecten een verbont teghen hem, ende dooden hem in zijn huys.

25

Doen sloech dat volck inden Lande, alle de ghene, die dat verbont teghen den Coninc Amon ghemaect hadden. Ende dat volck inden Lande maecte Iosia zijnen soon Coninck in zijn stede.