Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxxj. Capittel.

¶ Dat volck breect den Altaer wt beuel des Conincx, ende de beelden des Boschkens.

[p. 173v]

1

⁺ ENde doen dit altemael bescict was, trocken wt alle Israeliten, die inden steden Iuda gheuonden werden^† ende braken de Columnen, ende hieuwen de Boschkens af, ende braken de Hoochten ende de Altaren af, wt dat gheheel Iuda, BenIamin, Ephraim ende Manasse, tot dat syse vernielden. Ende de kinderen Israels trocken alle weder tot haren goede in haren steden.

+ A vers 1

† 2.Pa. 14.a.2. 17.a.15. 33.c.7

2

Hiskia stelde de Priesters ende de Leuiten in haer ordine, elcken na zijne officie, beyde de Priesters ende de Leuiten, tot Brantofferen ende Dancofferen, dat sy souden dienen, dancken ende louen, inder poorten des leghers, des HEEren.

3

Ende de Coninck gaf zijn deel van zijnder haue, tot brant offeren, des morghens ende des auonts, ende tot Brantofferen des Sabbats, ende der nieuwer Manen ende Feesten^* soot geschreuen staet inder wet des HEEREN.

* Num. 28.b.9.

4

⁺ Ende hy sprac totten volcke dat te Ierusalem woonde, dat sy deelen souden geuen den Priesteren ende Leuiten, op dat sy des te neerstigher souden zijn tot de wet des HEEren.

+ B vers 4

5

Ende doen dat woort wtquam, gauen de kinderen Israels vele yerstelinghen van coren, most, oly, honich, ende alderhande incomens vanden velde, ende alderley thiende brachten sy vele in.

6

Ende de kinderen Israels ende Iuda, die inde steden Iuda woonden, brachten oock thienden van Runderen ende schapen, ende tienden vanden gheheylichden, dat sy den HEERE haren Gode geheylicht hadden,

7

Ende maecten hier eenen hoop, ende daer eenen hoop. Inder derder maent begosten si hoopen te leggen, ende inder seuender maent volbrachten zijt.

8

Ende doen Hiskia metten ouersten daer in ghinck, ende saghen de hoopen, loefden sy den HEEre, ende zijn volck Israel.

9

⁺ Ende Hiskia vraechde den Priesters ende den Leuiten om de hoopen.

+ C vers 9

10

Ende Asaria de Priester, de principaelste inden huyse Sadok, sprack tot hen: Sint ter tijt, datmen beghonst heeft de Heffinghe te brengen int huys des HEEren, hebben wy geten, ende zijn sadt geworden, ende daer is noch veel ouergebleuen. Want de HEEre heeft zijn volc gesegent, daerom is desen hoop ouerbleuen.

11

Doen beual de Coninck, datmen de kisten soude maken aent huys des HEEren, ende si maectense

12

Ende leyden de Heffinghe daer in, de thiende ende dat geheilichde, getrouwelijc. Ende ouer dat selfde was vorst, Canania de Leuijt, ende Simei zijn broeder de ander,

13

Ende Iehiel, Asasia, Nagat, Asael, Ierimoth, Iosabad, Eliel, Iesmachia, Mahat ende Benaia, geordineert vander hant Canania ende Simei zijns broeders, na tbeuel des Conincx Hiskia.

14

⁺ Mer Asaria was Vorst inden huyse Gods. Ende Kore de sone Iemna, de Leuijt, de duerwachter tegent Oosten, was ouer die vrijwillighe gauen Gods, hem toe betrout, die den HEEre totter Heffinghe gegheuen werden, ende ouer de alderheylichste.

+ D vers 14

15

Ende onder zijn hant waren: Eden, Min-iamin, Iesua, Semaia, Amaria ende Sachania, inde steden der Priesters op ghelooue, dat sy geuen souden hare broeders, na haer ordine, den cleynsten als den grootsten.

16

Daertoe de ghene die gherekent werden voor mans persoonen, van drye iaren out, ende daer ouer, onder alle die int huys des HEEren gingen, elc in zijnen daghe, tot haer officie, in haer wacht na haer ordine.

17

Oock die voor Priesters gherekent werden inden huyse haerder vaderen, ende de Leuiten, van twintich iaren ende daer ouer, in haer wacht na haer ordine.

18

Daertoe die gherekent werden onder haer kinderen, wijuen sonen ende dochteren, in de geheele gemeynte. Want si heylichden ghetrouwelijc dat gheheylichde.

19

Ooc waren daer mannen met namen genoemt, onder de kinderen Aaron, den Priesteren, op de velden der voorsteden, in alle steden, dat sy deelen souden gheuen alle mans personen onder de Priesteren, ende alle die onder de Leuiten gerekent werden.

20

Also dede Hiskia in dat geheele Iuda, ende dede wat goet, recht ende warachtich was, voor den HEEre zijnen Gode.

21

Ende in allen doene dat hy begost aenden dienste des huis Gods, na de wet ende gheboden om te soecken zijnen God, dat dede hy van gheheelder herten. Daerom had hy oock gheluck.