Den Bibel, Inhoudende dat Oude ende Nieuwe Testament (Biestkensbijbel)

[p. 173r]

¶ Dat .xxx. Capittel.

¶ Ezechias roept dat volc weder totten HEEre. Ende hy doetet al af, so wat teghen Godt opghericht is.

1

⁺ ENde^† Hiskia seynde henen tot gheheele Israel ende Iuda, ende schreef brieuen aen Ephraim ende Manasse, dat sy souden comen totten huyse des HEEren te Ierusalem, den HEERE den God Israels Passah te houden.

+ A vers 1

† Ezechias.

2

Ende de Coninc hielt eenen raet, met zijnen Ouersten, ende metter gheheelder ghemeynten te Ierusalem^† dat Passah te houden, inder tweester maent.

† Exod. 12.a.3 Num. 9.b.11.

3

Want sy en costens op die selue tijt niet gehouden, om dat de Priesters noch niet ghenoech gheheylicht en waren, ende dattet volc noch niet te hoope gecomen en was te Ierusalem.

4

Ende het behaechde den Coninck wel, ende der gheheelder ghemeynten.

5

Ende bestelden sulcx dattet wtgheroepen werde door geheel Israel, van Berseba aen, tot Dan toe, op dat sy Passah souden comen houden den HEEre den God Israels te Ierusalem. Want het en was langhe niet ghehouden, ghelijct gheschreuen staet.

6

Ende de loopers ghingen henen metten brieuen vander hant des Conincx, ende zijnder Ouersten door geheel Israel ende Iuda, wt den beuele des Conincx, ende spraken: Ghy kinderen Israels bekeert v totten HEEre den Godt Abrahams, Isaac ende Israels,⁺ so sal hy hem keeren totten ouerghebleuen die noch ouerghebleuen zijn onder v, wt der hant der Coninghen tot Assur.

+ B vers 6

7

Ende en zijt niet als uwe vaders, ende broeders, die hen aenden HEEre haerder vaderen Godt vergrepen, ende hy gafse in een verwoestinghe, so ghy seluer siet.

8

Soo en zijt niet hertneckich als uwe vaders. Mer gheeft uwe hant den HEEre, ende coemt tot zijnen Heylichdom, dat hy geheylicht heeft eewelijck, ende dienet den HEEre uwen Gode: So sal haer de verbolgentheyt zijnder gramschappen van v keeren.

9

Want ist dat ghy v bekeert totten HEEre, so sullen uwe broeders ende kinderen ontfermherticheyt hebben, voor de ghene diese gheuanghen houden, dat sy weder in dit Lant comen.^† Want de HEEre uwe God, is ghenadich ende ontfermhertich, ende en sal zijn aensicht niet van v keeren, ist dat ghy v tot hem bekeert.

† Exod. 34.a.6

10

⁺ Ende de loopers ghingen vander eender stadt totter andere, inden lande Ephraim, ende Manasse, ende tot Sebulon toe. Maer sy belachtense ende bespottense.

+ C vers 10

11

Nochtans verootmoedichden hen sommighe van Asser, ende Manasse, ende Sebulon, ende quamen te Ierusalem.

12

Oock quam Gods hant in Iuda, dat hi hen eenderley herte gaf, te doen na des Conincx, ende der ouersten ghebot, wt den woorde des HEEREN:

13

Ende te Ierusalem quam een groot volck te hoope om te houden dat Feeste der onghesuerder brooden inder anderder maent, een seer groote ghemeynte.

14

Ende sy maecten hen op, ende braken de^† Altaren af, die te Ierusalem waren, ende alle Ruecwerck namen sy wech, ende wierpense inde beke Kidron:

† 2.Pa. 28.d.24

15

Ende sloeghen dat Passah inden veerthiensten dach der tweeder maent. Ende de Priesters, ende de Leuiten bekenden haer schande, ende heylichden hen, ende brachten de Brantoffers totten huyse des HEEren,

16

Ende stonden in hare ordine, alsoot behoort, na de Wet Mose des mans Gods. Ende de Priesters sprengden dat bloet vander hant der Leuiten.

17

Want daer wasser veel inder ghemeynten die hen niet gheheylicht en hadden. Daerom sloeghen de Leuiten dat Passah, voor alle die niet reyn en waren, dat sy den HEEre gheheylicht souden worden.

18

⁺ Oock soo was des volcx vele van Ephraim, Manasse, Isaschar, ende Sebulon, die niet reyn en waren: Maer en aten dat Paeschlam niet, alsoo gheschreuen staet. Want Hiskia badt voor hen ende sprack:

+ D vers 18

19

De HEEre die goedertieren is, sal ghenadich zijn,

20

Allen den ghenen die haer herte schicken Godt te soecken, den HEERE, den God haerder vaderen, ende niet om der heylighen reynicheyt wille.

21

Ende de HEERE verhoorde Hiskia ende heelde dat volc.

22

Also hielden de kinderen Israels, die te Ierusalem geuonden werden, dat Feeste der onghesuerder brooden, seuen daghen lanck met grooter blijschappen. Ende de Leuiten ende Priesters loefden den HEERE alle daghe met stercken snarenspelen des HEEren.

23

Ende Hiskia sprack van herten met allen Leuiten, die een goet verstant hadden enden HEEre. Ende sy aten dat Feest ouer seuen daghen, ende offerden Dancoffer, ende dancten den HEEre haerder vaderen God.

24

⁺ Ende de gheheele ghemeynte wert des sins, noch ander seuen daghen te houden. Ende hielden de seuen dagen ooc met blijschappen.

+ E vers 24

25

Want Hiskia de Coninck Iuda^† gaf een Heffinge voor de ghemeynte, duysent Ossen ende seuen duysent Schapen. Maer de Ouerste gauen een Heffinghe voor de ghemeynte, duysent Ossen, ende thien duysent Schapen. Alsoo heylichden hen der Priesters vele.

† 2.Par. 35.a.7

26

Ende de gheheele ghemeynte Iuda verblijde haer, de Priesters ende de Leuiten, ende de gheheel ghemeynte die wt Israel ghecomen was: Ende de vreemdelinghen die wt den lande Israels ghecomen waren, ende die in Iuda woonden.

27

Ende daer was een groote blijschap te Ierusalem. Want sint ter tijt Salomo des soons Dauid, des Conincx Israel, en was sulcx te Ierusalem niet gheweest.

28

Ende de Priesters, ende de Leuiten stonden op, ende segenden dat volck, ende haer stemme wert verhoort, ende haer ghebet quam in voor zijn heylighe wooninghe inden Hemel.