Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxviij. Capittel.

¶ Vanden godloosen Coninc Ahas. Ende wat onder hem gheschiet is.

1

⁺ AHas was^* twintich iaer out doen hy Coninck was, ende regeerde sesthien iaer te Ierusalem, ende en dede niet dat den HEEre wel behaechde, gelijck als zijn vader Dauid:

+ A vers 1

* 4.Reg. 16.a.2

2

Maer hy wandelde inde weghen der Coninghen Israels. Daer toe maeckte hy ghegoten beelden Baalim,

3

Ende roocte int dal der kinderen Hinnon,^† ende hy verbernde sine sonen met vier, na de grouwelen der Heydenen, die de HEEre voor den kinderen Israels verdreuen hadde.

† Deut. 18.a.10. 4.Re. 21.a.6. Iere. 7.d.30. 19.a.5.

4

Ende offerde ende roocte op de Hoochten, ende op de bergen, ende onder alle groene boomen.

5

^* Daerom gaf hem de HEEre sinen God inde handen des Conincx te Sirien, dat sy hem sloeghen, ende eenen grooten

* Esaie. 7.a.1.

[p. 172r]

hoop vanden sinen gheuanghen wech leyden, ende tot Damascum brachten. Oock wert hy gegeuen onder de hant des Conincx Israels, also dat hy eenen grooten slach aen hem dede.

6

Want Pekak de sone Remalia, sloech in Iuda, hondert ende twintich duysent op eenen dach, die altemael redelijcke lieden waren, om dat si den HEEre haerder vaderen Godt, verlieten.

7

Ende Sichri een gheweldich man in Ephraim, doode Maeseia den sone des Conincx, ende Asrikam den huys Vorst, Ende Elkana den naesten nae den Coninck.

8

Ende de kinderen Israels leyden wech gheuanghen van haren broederen, twee hondert duysent wijuen, sonen ende dochteren, ende namen daer toe grooten roof van hen, ende brachten den roof tot Samaria.

9

⁺ Aldaer was een Propheet des HEEren, die hiet Oded, die ginck wt, den Heyr te ghemoet dat nae Samaria quam, ende sprac tot hen: Siet, dewijle dat de HEEre uwer Vaderen God ouer Iuda gram is, soo heeft hijse in uwen handen gegeuen: Maer ghy hebtse soo grouwelijck ghedoot, dat het inden Hemel reyct.

+ B vers 9

10

Nv denct ghy v de kinderen Iuda ende Ierusalem te onderworpen, tot knechten ende maerten. En is dan dat geen schult by v teghen den HEEre uwen Godt?

11

Soo hoort my nv, ende brengt de geuanghen weder, die ghy wech gheleydt hebt van uwen broederen. Want des HEEren gramscap is ouer v verbolgen.

12

⁺ Doen maecten hen op, sommige vanden principaelsten der kinderen Ephraim: Asaria de sone Iohanan, Berechia, de sone Mesillemoth, Iehiskia de sone Sallum, ende Amasa de sone Hadlai, teghen die wten Heyr quamen,

+ C vers 12

13

Ende spraken tot hen: Ghy en sult de gheuangene hier niet in brenghen, Want ghy en denckt maer schult voor den HEEre ouer ons, op dat ghy onser sonden ende schult des te meer sout maken.

14

Want der schult is alreede te voren te vele, ende de gramschap ouer Israel verbolghen. Doen lieten de gheharnaste de gheuanghen, ende den roof voor den Ouersten, ende voor der gheheelder ghemeynten.

15

Doen stonden de mannen op, die nv met namen ghenoemt zijn, ende namen de gheuanghenen, ende alle die bloot onder hen waren, trocken si aen vanden geroofden, ende cleedense, ende trocken hen schoenen aen, ende gauen hen teten ende te drincken, ende salfdense, ende voerdense op Ezelen, alle die swac waren, ende brachtense nae Ieriho, totter Palmenstadt by haren broederen, ende quamen weder te Samaria.

16

^† Opter seluer tijt seynde de Coninck Ahas, totten Coninc van Assur, om dat si hem souden helpen.

† 4.Re. 16.b.7.

17

Ende de Edomiten quamen noch eens, ende sloegen Iuda, ende voerden sommige wech.

18

De Philisteen daelden ooc neder inde steden, inde beemden, ende tegent Suyden Iuda, ende wonnen BethSemes, Aialon, Gederoth, ende Socho met haren dochteren, ende Thimna met haren dochteren, ende Gimso met haren dochteren, ende woonden daer in,

19

Want de HEEre verootmoedichde Iuda om Ahas des Conincx^† Iuda wille, om dat hy Iuda bloot maeckte, ende vergreep hem aenden HEEre.

† Ander lesen Israel.

20

⁺ Ende Tiglat Pilnesser de Coninck van Assur, quam teghen hem op, die belegherde hem: Maer hi en was hem niet machtich genoech.

+ D vers 20

21

Want Ahas deylde dat huys des HEEren, ende dat huys des Conincx, ende der Ouerster, dat hy den Coninc te Assur gaf. Maer ten halp hem niet.

22

Daer toe in zijnre noot, maecte de Coninck Ahas des vergrijpens aenden HEEre noch meer,

23

Ende offerde den goden tot Damascon, die hem gheslagen hadden, ende sprack: De goden der Coninghen tot Sirien helpen hen, daerom wil ick hen offeren, dat sy my oock helpen, daer nochtans de selue hem, ende den gheheelen Israel eenen val waren.

24

Ende Ahas bracht te hoope de vaten des huys Gods, ende vergaderde de vaten inden huyse Gods,^† ende sloot de dueren toe aenden huyse des HEEren, ende maecte hem Altaren in alle^† winckelen te Ierusalem.

† 2.Par. 29.a.3.

† Hoecken.

25

Ende inden steden Iuda, hier ende daer maecte hy Hoochten, om te roocken anderen goden, ende verwecte den HEEre zijnder Vaderen God tot gramschap.

26

Wat meer van hem te segghen is, ende alle sine weghen, beyde de eerste ende de laetste, siet, dat is ghescreuen inden Boec der Coninghen Iuda ende Israel.

27

Ende Ahas ontsliep met sinen Vaderen, ende si begroeuen hem inde stadt Ierusalem. Maer sy en brachten hem niet onder de grauen der Coningen Israels. Ende zijn sone Iehiskia werdt Coninck in zijn stede.