Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxvij. Capittel.

¶ Hoe Iotham regeerde, wat hy getimmert, Ende hoe hy gheoorloocht heeft.

1

⁺ IOtham^† was vijfentwintich iaer out, doen hy Coninck wert, ende regeerde sesthien iaer te Ierusalem. Sijn moeder hiet Ierusa een dochter Sadok.

+ A vers 1

† 4.Re. 15.g.32

2

Ende dede dat den HEEre wel behaechde, ghelijck Vsia zijn vader gedaen hadde, sonder dat hy niet inden Tempel des HEEren en ginck, ende dat het volck hem noch verdorf.

3

Hy timmerde de hooghe poorte aen dat huys des HEEren, ende aender mueren Ophel, timmerde hy vele.

4

Ende timmerde de steden op dat gheberchte Iuda, ende inden wouden timmerde hy^† Sloten ende Torens.

† Borchten, oft Casteelen.

5

Ende hy street teghen den Coninck der kinderen Ammon, ende hy wert haerder machtich,⁺ alsoo dat hem de kinderen Ammon op dat selue iaer gauen, hondert Centner siluers, thien duysent Cor terwen, ende thien duysent gersten. Also vele gauen hem de kinderen Ammon, ooc inden tweeden ende inden derden iare.

+ B vers 5

6

Also wert Iotham machtich. Want hy rechte sine weghen voor den HEEre sinen Godt.

7

Wat meer van Iotham te seggen is, ende alle zijn strijden, ende sine wegen, Siet, dat is ghescreuen inden boec der Coninghen Israels, ende Iuda.

8

Hy was vijfentwintich iaer oudt, doen hy Coninck wert, ende regeerde sesthien iaer te Ierusalem.

9

Ende Iotham ontsliep met sinen Vaderen, ende si begroeuen hem in de stadt Dauids. Ende zijn sone Ahas wert Coninck in zijn stede.