Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxvj. Capittel.

¶ Van dat rijcke des Conincx Vsie, ende wat hy ghetimmert heeft. Ende hoe hy Lazarisch werdt, als hy hem des roockens onderwant.

1

⁺ DOen^* nam dat gheheele volc Iuda^† Vsia, die was sesthien iaer out, ende maeckten hem tot eenen Coninck in zijns Vaders Amasia stede.

+ A vers 1

* 4.Re. 14.d.21

† Oft, Asaria.

2

Die selfde timmerde Eloth, ende brachtse weder aen Iuda, na dien dat de Coninc ontslapen was met sinen Vaderen.

3

Vsia was^† sesthien iaer out doen hy Coninc werdt, ende regeerde tweenvijftich iaer te Ierusalem. Sijn moeder hiet Iechalia, van Ierusalem.

† 4.Reg. 15.a.2

4

Ende dede dat den HEEre wel behaechde, ghelijc zijn vader Amasia ghedaen hadde.

5

Ende hy^† sochte God also langhe als Sacharia leefde, de Leeraer inden ghesichte Gods. Ende also lange als hy den HEEre sochte, liet hem God alle dinc wel gelucken.

† 4.Reg. 12.a.2

[p. 171v]

6

Want hy trock wt, ende street teghen de Philisteen, ende brack de mueren tot Gath, ende de mueren tot Iabne, ende de mueren tot Asdod, ende timmerde steden om Asdod, ende onder de Philisteen.

7

Want God halp hem tegen de Philisteen, tegen de Arabers, tegen die tot Gurbaal, ende tegen de Meuniten.

8

Ende de Ammoniten gauen Vsia giften, ende hy wert vermaert tot datmen coemt in Egipten, wandt hy werdt altoos stercker ende stercker.

9

Ende Vsia timmerde Torens te Ierusalem aen de hoecpoorte, ende aen de dalpoorte, ende aen andere hoecken ende beuestichdese.

10

Hy timmerde oock sloten in de woestijne, ende groef veel Putten, Want hy had veel Vees, beyde inde beemden, ende op de effen velden, ooc Ackerlieden ende Wijngaerdeniers, aende berghen ende aen Charmel. Want hy hadde lust tot Acker werck.

11

⁺ Ende Vsia hadde een macht totten strijt die int heyr trocken, van Crijschknechten, int ghetal gherekent onder de hant Ieiel des scrijuers, ende Maeseia des Amptmans, onder de hant Hanania, vanden Ouersten des Conincx.

+ B vers 11

12

Ende dat getal der principaelster vaders onder den stercken Crijghers, was twee duysent ende ses hondert.

13

Ende onder haerder hant, des heyrs macht drie hondert duysent, ende seuen duysent, ende vijf hondert, totten strijde bequaem in heyrs cracht te helpen, den Coninc teghen de Vianden.

14

Ende Vsia beschicte hen voor dat gantsche heyr, schilden, spiessen, helmetten, pantsiers, bogen, ende steen slingeren.

15

Ende maecte te Ierusalem borst geweeren constelijc, die op de Torens ende hoecken zijn souden, om te schieten met pijlen, ende groote steenen. Ende zijn gheruchte ginc verre wt, Om dat hem sonderlinghe gheholpen wert, tot dat hy machtich werdt.

16

⁺ Ende doen hy machtich geworden was,^† verhief hem zijn herte tot zijnder verderffenisse. Want hy vergreep hem aenden HEEre sinen God, ende ginck inden Tempel des HEEren om te roocken, op den Rueck Altaer.

+ C vers 16

† Iudith. 1.b.6.

17

Maer^† Asaria de Priester ginc hem na, ende tachtentich Priesters des HEEren met hem, redelijcke lieden,

† 1.Par. 7.a.10.

18

Ende wederstonden Vsia den Coninc, ende seyden tot hem:^* Het en behoort v Vsia niet te roocken den HEEre: Mer de Priesteren Aarons kinderen, die gheheylicht zijn om te roocken. Gaet wt, wt den Heylichdom, want ghi vergrijpt v, ende het en sal v gheen eere zijn, voor Gode den HEERE.

* Num. 18.a.1.

19

⁺ Maer Vsia wert toornich, ende hadde een wieroocx vat inde hant. Ende doen hy teghen de Priesters murmureerde, voer de^† Melaetsheyt wt aen zijn voorhooft voor de Priesteren inden huyse des HEEren, voor den Ruec altaer.

+ D vers 19

† Lasarie.

20

Ende Azaria de Opperste Priester keerde hem tot hem, ende alle Priesters, ende siet,^† Doen was hy Melaetsch aen zijn voorhooft. Ende si stieten hem wt: Hy haestede hem ooc van selfs wt te gaen, want sine plaghe was vanden HEEre.

† Num. 12.b.10 4.Re. 5.e.27.

21

Also was de Coninc Vsia lazarus tot aen sinen doot, ^† ende woonde in een bysonder huys lazarisch. Want hi was verstooten vanden huyse des HEEren. Maer Iotham zijn sone stont des Conincx huys voor, ende oordeelde dat volck inden lande.

† Leui. 13.g.46 Num. 5.a.2. 12.b.14.

22

Wat meer van Vsia te seggen is, beyde dat eerste, ende dat laetste, dat heeft beschreuen Isaia, de sone Amos.

23

Ende Vsia ontsliep met sinen vaderen, ende sy begroeuen hem by sinen vaderen, inden Acker, by de begrauenisse der Coningen. Want si spraken: Hy is melaetsch. Ende Iotham zijn sone wert Coninc in zijn stede.