Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxv. Capittel.

¶ Amasia wort Coninck, die vergadert een heyr tegen Seir ende Edom, hy maeckt afgoden, ende eertse, daerom wort hy vanden Propheten gestraft. Hy begint een oorlooch tegen Ioas, die verwint ende vangt hem.

1

⁺ AMasia was vijfentwintich Iaer out,^† doen hy Coninck werdt, ende regeerde neghenentwintich Iaer te Ierusalem. Sijn moeder hier Ioadan van Ierusalem.

+ A vers 1

† 4.Re. 14.a.1.

2

Ende hy dede wat den HEEre wel behaechde, nochtans niet wt geheelder herten.

3

Doen zijn Conincrijc nv beuesticht was, doode hy sine knechten, die den Coninc sinen vader verslagen hadden,

4

Maer hare kinderen en doode hy niet. Want also staet ghescreuen inder Wet, inden boecke Mose, daer de HEEre ghebiet ende spreeckt:^† De Vaders en

† Deut. 24.c.16 4.Re. 14.a.6 Iere. 31.d.29. Ezech. 18.a.3.

[p. 171r]

sullen niet steruen voor de kinderen, noch de kinderen voor de vaders: Maer elck sal om zijnder sonden wille steruen.

5

Ende Amasia bracht Iuda te hoope, ende steldese nader vaderen huysen, nae den Ouersten ouer duysent, ende ouer hondert, in gheheel Iuda, ende BenIamin. Ende teldese van twintich iaren aen, ende daer ouer, ende vant haerder drie hondert duysent, weghelesene, die int heyr trecken mochten ende spiessen ende schilden voeren costen.

6

Daer toe nam hy aen, wt Israel hondert duysent stercke oorloochs lieden, om hondert Centner siluers.

7

⁺ Maer daer quam een man Gods tot hem, ende sprack: Heer Coninck en laet dat heyr Israels niet met v comen. Want de HEEre en is niet met Israel, noch met allen kinderen Ephraim.

+ B vers 7

8

Want ist dat ghy coemt om dat ghy een coenheyt bewijsen sout inden strijt, so sal v God laten vallen voor uwen vianden. Want by Gode staet de cracht te helpen ende te laten vallen.

9

Amasia sprac totten man Gods: Wat salmen dan doen metten hondert Centner die ick den oorloochs knechten van Israel ghegheuen heb? De man Godts sprack: De HEEre heeft noch meer dan dies is dat hy v gheuen can.

10

Doen scheyde Amasia de Crijschknechten af, die wt Ephraim tot hem ghecomen waren, dat si op hare plaetse souden gaen. Doen verbolch haer gramschap seer tegen Iuda, Ende trocken weder tot haerder plaetsen, met verbolghender gramschap.

11

Ende Amasia creech eenen goeden moet, ende leyde zijn volck wt, ende trock wt int sout dal,

12

Ende sloech der kinderen van Seir thien duysent. Ende de kinderen Iuda vinghen haerder thien duysent leuende, die leyden si op de spitse eens steens, ende stietense vander spitsen des steens, also dat si alle bersten.

13

Mer de Crijschknechten, die Amasia wederom hadde laten trecken, dat si niet met sinen volcke ten strijde en trocken, leyden hen neder in de steden Iuda, van Samaria aen tot Bethoron, ende sloegen haerder drie duysent, ende namen seer veel roofs.

14

⁺ Ende doen Amasia weder quam vander Edomiten slach, bracht hy de goden der kinderen van Seir mede, ende steldese hem tot goden, ende aenbadt voor hen, ende roocte hen.

+ C vers 14

15

Doen verbolch de toornicheyt des HEEren ouer Amasia, ende seynde eenen Propheet tot hem, die sprac tot hem: Waerom soeckt ghy de goden des volcx, die haer volck niet en costen verlossen van uwer hant.

16

Ende doen hy met hem sprack, seyde hi tot hem: Heeftmen v tot des Conincx raet gemaect? Hout op, Waerom wilt ghi gheslaghen zijn? Doen hielt de Propheet op, ende sprac: Ick mercke wel dat Godt by hem besloten heeft, v te verderuen, dat ghy sulcks ghedaen hebt, ende en gheeft mijnen raet gheen ghehoor.

17

^* Ende Amasia de Coninc Iuda, wert des sins, ende seynde henen tot Ioas den sone Ioagas, des soons Iehu, den Coninc Israels, ende dede hem seggen: Coemt her-waerts, laet ons malcanderen besien.

* 4.Re. 14.b.8.

18

Maer Ioas de Coninc Israels seynde tot Amasia den Coninck Iuda, ende dede hem seggen:^† Den doornen struyck in Libanon, seynde totten Cederen in Libanon, ende liet hem seggen: Geeft uwe dochter mijnen sone tot eenen wijue. Maer dat wilde gedierte in Libanon liep ouer den doornen struyck, ende vertradt hem

† Iudic. 9.b.8. 4.esd. 4.b.13

19

Ghy denct: Siet, ick hebbe de Edomijten gheslagen, daer af verheft hem v herte, ende soect roem: Nv blijft thuys, Waerom haeckt ghy nae ongheluck, dat ghy sout vallen, ende Iuda met v?

20

Maer Amasia en hoorde niet, want het gheschiede also van Gode, op dat sy inde hant ghegeuen souden worden, om dat si de goden der Edomiten gesocht hadden.

21

Doen troc Ioas de coninc Israels op, ende besaghen hen onderlinge, hy ende Amasia de Coninc Iuda te Bethsemes, die in Iuda leyt.

22

⁺ Maer Iuda werdt gheslagen voor Israel, ende vluchten elc in sine Hutten.

+ D vers 22

23

Maer Amasia de Coninc Iuda den sone Ioas, greep Ioas de sone Ioahas de Coninc Israels te BethSemes, ende bracht hem te Ierusalem.^† Ende brack neder de mueren te Ierusalem, vander poorten Ephraim aen, tot aen de hoecpoorte, vier hondert ellen lanc.

† 2.Par. 32.a.5.

24

Ende allet gout ende siluer, ende alle vaten, die voorhanden waren inden huyse Gods, by ObedEdom, ende inden schatte int huys des Conincx, ende de kinderen te pande, nam hy met hem nae Samaria.

25

Ende Amasia de sone Ioas, de Coninck Iuda, leefde na den doot Ioas, des soons Ioahas, des Conincx Israels, vijfthien iaer.

26

Wat^† meer van Amasia te seggen is, beyde dat eerste ende dat laetste, Siet, dat is ghescreuen inden boeck der Coninghen Iuda ende Israels.

† 4.Reg. 14.d.18.

27

Ende van dier tijt aen doen Amasia vanden HEEre af weeck, maecten si een verbont tegen hem te Ierusalem. Maer hy vluchte nae Lachis. Doen seynden si hem na, tot Lachis, ende dooden hem aldaer.

28

Ende si brachten hem op Rossen, ende begroeuen hem by sine vaders inde stadt Iuda.