Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxiiij. Capittel.

¶ Ioas wort Coninc ouer Iuda, Hy timmert den Tempel ende wat totten dienste Godts behoort, Nae dien dat Ioiada sterft, soo wordt Ioas vervuert, ende hy doet boosheyt voor den HEERE.

1

⁺ IOas was seuen iaer oudt,^† doen hy Coninck wert, ende regeerde veertich Iaer te Ierusalem. Sijn moeder hiet Sibia van Berseba.

+ A vers 1

† 4.Reg. 12.a.1

2

Ende Ioas dede dat den HEEre wel behaechde, also langhe

[p. 170v]

als de Priester Ioiada leefde.

3

Ende Ioiada gaf hem twee wijuen, ende hy wan sonen ende dochteren.

4

Daer nae nam Ioas voor dat huys des HEEren te vernieuwen.

5

Ende vergaderde de Priesters ende Leuiten, ende sprack tot hen: Treckt wt in allen steden Iuda, ende vergadert ghelt wt dat gheheele Israel, om dat huys ws Godts iaerlijcx te repareren, ende haest v sulcx te doen. Maer de Leuiten en haesten hen niet.

6

Doen riep de Coninc Ioiada den principaelsten, ende sprac tot hem: Waerom en hebdy gheen acht op de Leuiten, dat si in brochten van Iuda ende Ierusalem,^† de scattinge, die Mose de knecht des HEEren geset heeft, diemen vergaderde in Israel totter Hutten des ghetuychenis?

† Exod. 30.b.13.

7

Want de ongodlijcke Athalia ende hare sonen, hebben dat huys Gods verscuert, ende alle wat totten huyse des HEEren gheheylicht was, hebben si aen Baalim vermaect.

8

⁺ Doen beual de Coninck datmen een^† kiste soude maken, ende settense buyten inde poorte aent huys des HEEREN,

+ B vers 8

† 4.Reg. 12.b.9

9

Ende liet wt roepen in Iuda ende te Ierusalem, datmen den HEEre inbrenghen soude de^† schattinghe van Mose den knecht Gods op Israel gheleyt inder woestijnen.

† Exod. 30.b.13.

10

Doen verblijden hen alle Ouerste ende allet volc, ende brachtense, ende stakense inde kiste tot datse vol werdt.

11

Ende alst tijt was datmen de kiste brenghen soude door de Leuiten, nae des Conincx beuel (als si sagen datter veel gelts in was) so quam de schrijuer des Conincx, ende wie vanden principaelsten Priester beuel had, ende gooten dat gelt wt de kiste, ende droegen de kiste weder op haer plaetse. So deden si alle daghe, dat si gelts planteyt te hoope brachten.

12

Ende de Coninc ende Ioiada gauent den Arbeyders, die daer arbeyden aent huys des HEEren, die selue huerden steenhouwers ende timmerlieden, om dat huys des HEEren te vernieuwen: Ooc den meesters aen ijser ende metael, om dat huys des HEEren te repareren.

13

⁺ Ende de werclieden arbeyden, dat de reparacie int werck toe nam, door haer hant, ende maecten dat huys Godts gheheel ghereet ende wel toe ghericht, ende maectent vaste.

+ C vers 13

14

Ende doen zijt voleynt hadden, brachten si dat ghelt dat daer noch ouerschoot voor den Coninck ende Ioiada. Daer af maectemen vaten totten huyse des HEEren, vaten totten dienst, ende tot Brantofferen, lepelen, ende gulden ende silueren ghereetschap. Ende si offerden Brantoffer byden huyse des HEEren altoos, so langhe als Ioiada leefde.

15

Ende Ioiada wert out ende des leuens sat, ende sterf, ende was .C. ende dertich iaer out doen hy sterf.

16

Ende si begroeuen hem inde stadt Dauids, onder de Coningen, om dat hy wel had gedaen aen Israel, ende aen Godt, ende sinen huyse.

17

Ende nae den doot Ioiada, quamen de Ouersten in Iuda, ende aenbaden den Coninc. Doen hoordese de Coninck.

18

⁺ Ende si verlieten dat huys des HEEren des Godts haerder vaderen, ende diende de boschkens ende Afgoden. Doen quam de gramscap des HEEren ouer Iuda ende Ierusalem, om deser haerder schult wille.

+ D vers 18

19

Ende hy seynde Propheten tot hen, dat si hen totten HEEre bekeeren souden, ende die betuychdense: Maer si en nament niet ter ooren.

20

Ende de gheest Gods troc aen^† Sacharia, den sone Ioiada des Priesters. Die tradt op inder Hoochte, ouer dat volck, ende sprac tot hen: So spreect Godt: Waerom ouertreet ghy de geboden des HEEren, dat v niet ghelucken en sal?^* Want ghy hebt den HEEre verlaten, so sal hy v weder verlaten.

† Mat. 23.d.35.

* 4.Esd. 1.c.25 2.Par. 15.a.2.

21

Maer si maecten een verbont tegen hem, ende steenden hem nae dat gebot des Conincx, inden hof aenden huyse des HEEren.

22

Ende de Coninck Ioas en gedachte der ontfermherticheyt niet, die Ioiada zijn vader aen hem ghedaen hadde,^* maer doode sinen soon. Maer doen hy sterf, sprac hy: De HEEre salt sien, ende versoecken.

* Mat. 23.d.35.

23

⁺ Ende^† doen dat iaer om was, trock dat heyr der Siriers op, ende quamen in Iuda ende Ierusalem, ende verdoruen alle Ouerste int volck, ende alle haren roof seynden si den Coninc tot Damascon.

+ E vers 23

† 4.Re. 12.d.17

24

Want der Siriers macht quam met weynich mannen, nochtans gaf de HEERE een seer groote macht in hare hant: Om dat si den HEEre haerder Vaderen Godt verlaten hadden. Oock oeffenden si aen Ioas straffe.

25

Ende doen si van hem trocken, lieten si hem in grooten crancheden.

^† Maer sine knechten maecten een verbont tegen hem, om des bloets wille der kinderen Ioiada des Priesters, Ende sy doodeden hem op zijn bedde, ende hy sterf, ende men begroef hem inde stadt Dauids: Maer niet onder der Coningen grauen.

† 4.Re. 12.d.20

26

Die dat verbont tegen hem maecten, waren dese: Sabed de sone Simeath der Ammonitinne, Ende Iosabad de sone Simrith, der Moabitinne.

27

Maer zijne sonen ende de somma die onder hem vergadert was, ende de timmeragie des huys Godts, Siet, die zijn gheschreuen inde Historie inden Boec der Coningen. Ende zijn soon Amasia wert Coninck in zijn stede.