Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxiij. Capittel.

¶ Ioiada maect Ioas Coninck, ende beueelt datmen Athalia dooden soude.

1

⁺ MAer int^† seuenste iaer nam Ioiada eenen moet, ende nam de Ouerste ouer hondert, te weten, Asaria, den sone Ierobeam, Ismael den sone Iohanan, Asaria den sone Obed, Maeseia den sone Adaia, ende Elisaphat den sone Sichri, met hem, tot eenen verbonde.

+ A vers 1

† 4.Re. 11.a.4.

2

Die trocken alom in Iuda, ende brachten de Leuiten te hoope, wt alle steden Iuda, ende de Ouerste vaders in Israel, dat si te Ierusalem souden comen.

3

Ende de geheele ghemeynte maeckte een verbondt inden huyse Godts metten Coninck. Ende hy sprack tot hen: Siet, des Conincks soon sal Coninck zijn,^† soo de HEEre gesproken heeft ouer de kinderen Dauids.

† 2.Reg. 17.c.12

4

⁺ Soo suldy nv alsoo doen: Dat derde deel van v, die des Sabbaths aengaen, sal zijn onder de Priesteren ende Leuiten, die poortiers zijn aen de dorpelen.

+ B vers 4

5

Ende dat derde deel inden huyse des Conincx, ende dat derde deel aen de fondament poorte. Maer allet volck sal zijn inden Hof aenden huyse des HEEren.

6

Ende dat niemandt in dat huys des HEEren en gaet, dan alleen de Priesters ende Leuiten die daer dienen, die sullen daer in gaen, want si zijn Heylichdom. Ende allet volck neme waer der bewaringhen des HEEren.

7

Ende de Leuiten sullen hen rontom den Coninck maken, elc met sinen gheweer inde handt. Ende wie int huys gaet, die sy des doots, ende si sullen byden Coninck zijn, als hy wt ende in gaet.

8

⁺ Ende de Leuiten ende gheheel Iuda,^† deden so de Priester Ioiada gheboden hadde, ende elck nam sine lieden, die des Sabbaths aengingen, metten genen die des Sabbaths af ghingen. Want Ioiada de Priester en liet de twee hoopen daer buyten niet van malcanderen comen.

+ C vers 8

† 4.Reg. 11.b.9

9

Ende Ioiada de Priester gaf den Ouersten ouer hondert, spiessen ende schilden, ende de wapenen des Conincx Dauids, die inden huyse Gods waren.

10

Ende stelde alle dat volc, eenen yeghelijcken met zijn wapen inde hant, vanden rechten hoeck des huys, totten slincken toe, totten Altaer ende totten huysewaert rontom den Coninck.

11

Ende si brachten des Conincks soon daer voor, ende setten hem de croone op,^† ende dat ghetuychenis, ende maecten hem Coninck. Ende Ioiada met sine sonen, salfden hem ende spraken: Gheluck ende Heyl den Coninck.

† Deut. 17.d.23.

12

⁺ Maer^† doen Athalia dat gecrijsch des volcx hoorde, dat toe liep, ende den Coninc loofde, ginc si totten volcke int huys des HEEren.

+ D vers 12

† 4.Reg. 11.c.13

13

Ende si sach toe, ende siet, de Coninc stont op zijn plaetse inden inganc, ende de Ouersten, ende trompetten rontom den Coninck, ende allet volc des lants was vrolijck, ende blies trompetten, ende de sanghers met alderley musijcspel, geschict te louen. Doen schuerde si haer cleederen, ende sprac: Oproer, oproer.

14

Maer Ioiada de Priester maecte hem wt, metten Ouersten ouer hondert, die ouer dat Heyr waren, ende seyde tot hen: Leytse wt, vanden huyse ouer den Hof, ende wie haer na volcht, dien salmen metten sweerde dooden. Want de Priester hadde beuolen, datmense niet inden huyse des HEEren dooden en soude.

15

Ende si sloegen de handen aen haer, ende doe si quam totten inganc der peerden poorte, aenden huyse des Conincks, dooden syse aldaer.

16

^+* Ende Ioiada maecte een verbont tusschen hem, ende alle den volcke, ende den Coninck, dat si des HEEren volc zijn souden.

+ E vers 16

* 4.Re. 11.d.17 Iosu. 24.e.25. 2.Par. 6.c.12.

17

Doen ghinck allet volc int huys Baals, ende braken hem af, ende sine Altaren, ende de beelden braken si in stucken, ende dooden Mathan den Priester Baals, voor de Altaren.

18

Ende Ioiada stelde de Officien inden huyse des HEEren, onder de Priesteren den Leuiten,^† die Dauid gheordineert hadde totten huyse des HEEren, om den HEEre Brandtoffer te doen,^† ghelijck het gheschreuen staet in de Wet Mose, met vruechden, ende Lieden door Dauid ghedicht.

† 1.Par. 24. 25.

† Num. 28.a.3.

19

Ende stelde duerwachters inde poorten aenden huyse des HEEren, datter niet onreyns in en soude comen, van eenich dinck.

20

Ende hy nam de Ouerste ouer hondert, ende de machtighe, ende de Heeren inden volcke, ende allet volc des lants, ende leyden de Coninck af vanden huyse des HEEren, ende brachten hem door de hooghe poorte, aenden huyse des Conincx. Ende deden den Coninck op den Coninclijcken stoel sitten.

21

Ende allet volck des lants was vrolijck, ende de stadt was stille. Maer Athalia werdt metten Sweerde ghedoot.