Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxj. Capittel.

¶ Iosaphat sterft, Ioram zijn soon wort Coninck, ende hy slaet sine broeders doot, hy verlaet den HEERE, ende leeft als een godloose, Edom valt af van Iuda, Godt de HEEre straft ende plaecht den Coninck Ioram.

1

⁺ ENde^† Iosaphat ontsliep met zijnen vaderen, ende wert begrauen by sine vaders in de stadt Dauid. Ende zijn soon Ioram werdt Coninck in zijn stede.

+ A vers 1

† 3.Reg. 22.g.51

2

Ende hy hadde broeders Iosaphats sonen, Asaria, Iehiel, Sacharia, Asaria, Michael ende Sephatia, dese waren alle kinderen Iosaphats des Conincx Iuda.

3

Ende haer vader gaf hen vele gauen, van siluer, gout ende cleynodien, met vaste steden in Iuda. Maer dat Conincrijc gaf hy Ioram, want hy was de eerste gheboren.

4

Maer doen Ioram op quam ouer dat Conincrijc zijns vaders, ende des machtich wert,^* doodede hy sine broeders alle metten sweerde, Daer toe oock sommige Ouersten in Israel.

* Iudicum. 9.a.5.

5

^† Ioram was tweendertich iaer out doen hy Coninck werdt, ende regeerde acht iaer te Ierusalem.

† 4.Reg. 8.c.17

6

Ende wandelde inde wegen der Coningen Israels, ghelijc dat huys Ahabs ghedaen hadde. Want Ahabs dochter was zijn wijf, ende dede dat den HEEre qualijc beuiel.

7

⁺ Maer de HEEre en woude dat huys Dauids niet verderuen, om des verbondts wille dat hy met Dauid ghemaect hadde,^† ende so hy ghesproken hadde, hem een licht te geuen, ende sinen kinderen altoos.

+ B vers 7

† 2.Reg. 7.c.12.

8

Tot zijnder^† tijt vielen de Edomiten af van Iuda, ende maeckten ouer hen eenen Coninck.

† 4.Reg. 8.c.20

9

Want Ioram was ouer ghetrocken met sinen Ouersten, ende alle de wagens met hem: Ende hadde hem snachts op ghemaect, ende de Edomiten om hem, ende de Ouersten der waghens gheslaghen.

10

Daerom vielen de Edomiten af van Iuda tot op desen dach. Ter seluer tijt viel Libna ooc van hem af: Want hy verliet den HEEre zijnder Vaderen Godt.

11

Ooc maecte hy Hoochten op de bergen in Iuda, ende dede die van Ierusalem hoerderije bedrijuen, ende verleyde Iuda.

12

⁺ Maer daer quam gheschrift tot hem, vanden Propheet Elia, dat luyde alsoo: So spreect de HEEre de Godt ws vaders Dauids: Om dat ghy niet ghewandelt en hebt inde weghen ws vaders Iosaphat, noch inden weghe Assa des Conincx Iuda,

+ C vers 12

13

Maer wandelt inde wegen der Coningen Israels, ende doet dat Iuda, ende die te Ierusalem hoerderije bedrijuen, nae der hoerderie des huys Ahabs. Ende hebt daer toe uwe broeders ws vaders huys ghedoot, die beter waren dan ghy.

14

Siet, so sal v de HEEre met eender grooter plagen slaen, aen v volc, aen uwe kinderen, aen uwe wijuen, ende aen alle uwe Haue.

15

Maer ghy sult veel cranckheden hebben in v inghewant, tot dat v inghewant van grooter crancheyt wt gae, van daghe te daghe.

16

⁺ Also verwecte de HEEre teghen Ioram den gheest der Philisteen, ende Arabiers, die neffens de Moren ligghen.

+ D vers 16

17

Ende trocken op in Iuda, ende verstoordense, ende voerden alle Haue wech, die voor handen was inden huyse des Conincx. Daer toe sine sonen, ende sine wijuen, also dat hem gheenen soon ouer en bleef, dan alleen Ioahas zijn ionckste soon.

18

Ende nae alle dien, so plaechde hem de HEEre in sinen ingewande, met sulcker crancheyt die niet te ghenesen en was.

19

Ende doen dat van dage te dage duerde, als den tijt van twee iaren om was, ginc zijn ingewant van hem met zijnder crancheyt. Ende hy sterf aen boose cranckheden. Ende si en maecten geenen brant ouer hem,^† soo si sinen vaderen ghedaen hadden.

† 2.Par. 16.c.15

20

Hy was tweendertich iaer out doen hy Coninc wert, ende regeerde acht iaer te Ierusalem. Ende wandelde dattet niet fijn en was, ende si begroeuen hem inde stadt Dauids, maer niet onder der Coninghen grauen.