Den Bibel, Inhoudende dat Oude ende Nieuwe Testament (Biestkensbijbel)

¶ Dat .xix. Capittel.

¶ Iehu de Propheet straft den Coninc Iosaphat om dat hy den godtloosen hulpe ghedaen hadde. Iosaphat betert hem, ende hy leeft wel.

1

⁺ MAer Iosaphat de Coninck Iuda quam weder thuys met vreden te Ierusalem.

+ A vers 1

2

Ende Iehu de sone Hanani de Siender ghinc wt hem te gemoete, ende sprack totten Coninck Iosaphat: Sult ghy alsoo den godloosen helpen ende lief hebben, die den HEERE haten? Ende om dies wille, is ouer v de gramschap des HEEren,

3

Maer doch soo is wat goets aen v gheuonden, dat ghy de Boschkens hebt wtgheuaecht wt den Lande, ende hebt v hert ghestelt Godt te soecken.

4

⁺ Alsoo bleef Iosaphat tot Ierusalem. Ende hy trock^† wederom wt onder dat volc, van Berseba aen tot opt geberchte Ephraim, ende brachtse weder totten HEEre haerder vaderen Godt.

+ B vers 4

† 2.Par. 17.b.8

5

Ende^† hy stelde Rechters inden lande in alle vaste steden Iuda, in elcke stadt sommige.

† Deut. 17.a.1. Titum. 1.a.5.

6

Ende sprac totten Rechteren:^* Siet toe, wat ghy doet. Want ghy en hout dat gerecht den menscen niet, maer den HEEre, ende hy is met v int gherechte.

* Deut. 1.b.16

7

Daerom, laet de vreese des HEEren by v zijn, ende wacht v ende doetet. Want by den HEEre onsen God en is gheen onrecht, noch^† aensien der personen, noch aennemen der ghiften.

† Deut. 10.c.17. Roma. 2.b.11. Galat. 2.b.6. Act. 10.d.34. Iob. 34.c.19. Sap. 6.b.8. Eccle. 35.b.22. Galat. 2.a.6.

8

⁺ Oock stelde Iosaphat te Ierusalem, vanden Leuiten ende Priesteren, ende vanden Ouersten vaderen in Israel, ouer dat gherechte des HEEren, ende ouer de saken, ende lietse te Ierusalem woonen.

+ C vers 8

9

Ende gheboot hen, seggende: Doet alsoo inder vreesen des HEEren trouwelijck, ende met rechter herten.

10

^† In alle saken die tot v comen, van uwen broederen, die in hare Steden woonen, tusscen bloet ende bloet, tusschen wet ende ghebot, tusschen seden ende rechten sult ghyse onderwijsen, dat si hen niet en besondighen aen den HEERE, ende een gramschap ouer v, ende uwe broeders en come. Doet hem alsoo, soo en suldy v niet besondighen.

† Deut. 1.b.16.

11

Siet Amaria de Priester, is de ouerste ouer v, in alle saken des HEEren. Soo is Sabadia de sone Ismael, Vorste inden huyse Iuda, in allen saken des Conincx. Soo hebt ghy oock Officiers, de Leuiten voor v. Hebt eenen goeden moet, ende doet het, ende de HEEre sal metten goeden zijn.