Den Bibel, Inhoudende dat Oude ende Nieuwe Testament (Biestkensbijbel)

¶ Dat .xviij. Capittel.

¶ Iosaphat maeckt vrientschap met Achab, Hy helpt hem oorlogen, ende daerom soo wort hy vanden HEEre ghestraft.

1

⁺ ENde Iosaphat hadde grooten rijckdom ende eere, ende maecte vrientschap met Ahab.

+ A vers 1

2

Ende^† na twee Iaren trock hy af tot Ahab nae Samaria. Ende Ahab liet voor hem, ende voor dat volc dat by hem was, veel Schapen ende Ossen slaen. Ende hy bracht hem met woorden daer toe, dat hy op troc na Ramoth in Gilead.

† 3.Reg. 22.a.1.

3

Ende Ahab de Coninck Israels sprac tot Iosaphat den Coninck Iuda: Treckt met my nae Ramoth in Gilead. Hy sprack tot hem:^† Ick ben als ghy, ende mijn volck als v volck, wy willen met v inden strijt.

† 4.Reg. 3.a.7.

4

Maer Iosaphat sprac totten Coninck Israel: Lieue, vraecht heden des HEEren woort.

5

Ende de Coninck Israels vergaderde der Propheten, vier hondert mannen, ende sprack tot hen: Sullen wy na Ramoth in Gilead trecken inden strijdt, oft sal ict goet laten zijn? Sy spraken: Trect op, Godt salse in des Conincx hant gheuen.

6

Maer Iosaphat seyde: En isser nieuwers noch een Propheet des HEEren, dat wy van hem vraechden?

7

⁺ De Coninck Israels sprac tot Iosaphat:^† Daer is noch een man, datmen den HEEre van hem vraghe. Maer ic ben gram op hem, want hy en propheteert niet goets ouer my, mer altijt quaet te weten, Micha de Sone Iemla. Iosaphat sprack: De Coninck en spreke soo niet.

+ B vers 7

† 2.Reg. 22.b.8.

8

Ende de Coninck Israels riep zijnder Camerlinghen een, ende seyde: Brengt haestelijck herwaerts Micha den sone Iemla.

9

Ende^† de Coninc Israels ende Iosaphat de Coninc Iuda saten elck op sinen stoel, met cleederen ghecleet. Sy saten op de plaetse voor de duere aen de poorte te Samaria, Ende alle de Propheten propheteerden voor hen.

† 3.Reg. 22.b.10

10

Ende Sidekia de sone Cnaena maecte hem ijseren hoornen, ende sprack: Soo spreect de HEEre: Hier mede suldy de Siriers stooten, tot dat ghyse vernielt.

11

Ende alle de Propheten propheteerden oock alsoo, ende spraken: Trect op, het sal v gelucken, de HEEre salse in des Conincx hant gheuen.

12

Ende de bode die henen gegaen was om Micha te roepen, sprack met hem ende seyde:^† Siet, der Propheten redenen zijn eendrachtelijck goet voor den Coninck: Lieue, laet v woordt oock zijn, als dier een, ende spreect wat goets.

† 3.Reg. 22.b.13

13

Maer Micha sprack: Alsoo warachtelijck als de HEERE leeft, Wat mijn Godt segghen sal, dat wil ick spreken.

14

Ende doen hy totten Coninck quam, seyde de Coninck tot hem: Micha, sullen wy nae Ramoth in Gilead inden strijdt trecken, oft sal ict laten staen? Hy sprack: Ia, trect op, het sal v ghelucken, het sal v in uwen handen ghegheuen worden.

15

Maer de Coninck sprack tot hem: Ick besweere v noch eens, dat ghy my niet anders en segt dan de waerheydt inden Naem des HEEren.

16

⁺ Doen sprack hy: Ick sach dat gheheel Israel verstroyt op de berghen, ghelijck schapen die gheenen Herder en hebben. Ende de HEEre sprack: En hebben dese gheenen Heere? Een yeghelijc keere wederom nae huys met vreden.

+ C vers 16

17

Doen sprack de Coninck Isarels tot Iosaphat: En seyde ickt v niet: Hy en propheteert ouer my niet goets, maer enckel quaet?

18

Maer hy sprack: Daerom hoort des HEEren woort:^† Ick sach den HEEre sitten op sinen stoel, ende allet Hemelsce Heyr stont tot zijnder rechter, ende tot zijnder slincker siden.

† 3.Reg. 22.d.19 Esaie. 6.a.1. 66.a.1.

19

Ende de HEEre sprack: Wie wil Ahab den Coninck Israels^† wijs maken, dat hi op trecke ende valle te Ramoth in Gilead? Ende doen die een aldus, ende die ander alsoo seyde,

† Becouten.

20

Soo quammer een gheest voort ende tradt voor den HEERE, ende sprack: Ick wilt hem wijs maken. De HEERE sprac tot hem: Waer mede?

21

Hy seyde: Ick wil wt varen, ende

[p. 168v]

eenen valschen gheest zijn in aller zijnder Propheten mont. Ende hy sprack: Ghy sullet hem wijs maken, ende ghy sullet beschicken, vaert derwaerts, ende doet also.

22

Nv^* siet, de HEEre heeft eenen valschen geest gegeuen in deser uwer propheten mont, ende de HEEre heeft quaet teghen v ghesproken.

* Ezec. 14.b.9. Iob. 12.c.20.

23

⁺ Doen tradt daer toe Sidekia de sone Cnaena, die^† sloech Micha op de kinnebacken, ende sprack: Door welcken wech is de gheest des HEEren van my ghegaen, dat hy door v spreken soude?

+ D vers 23

† Iob. 16.b.10. mar. 14.g.65.

24

Micha sprac: Siet, ghy sullet sien, als ghy in de binnenste camer coemt, dat ghi v sout versteken.

25

Maer de Coninc Israels sprac: Neemt Micha ende laet hem blijuen by Amon der stadt voocht, ende by Ioas den sone Melech,

26

Ende segt: Soo seyt de Coninc: Legt desen inde geuanckenisse, ende spijset hem met broot ende water der droeffenissen, tot dat ick weder come met vreden.

27

Micha sprac: Coemt ghy weder met vreden, soo en heeft de HEEre door my niet ghesproken. Ende hy sprac: Hooret toe ghy volcken alle.

28

⁺ Alsoo trock de Coninck Israels op, ende Iosaphat de Coninck Iuda, na Ramoth in Gilead.

+ E vers 28

29

Ende de Coninck Israels sprack tot Iosaphat: Ick wil my vercleeden, ende inden strijdt comen, Maer hebt ghy uwe cleederen aen. Ende de Coninc Israels vercleede hem, ende quam inden strijdt.

30

Maer de Coninck tot Sirien hadde sine Ouerste ruyteren gheboden: Ghy en sult niet strijden, noch tegen cleyne noch teghen groot, maer teghen den Coninck Israels alleene.

31

^* Als nv de ouerste Ruyters Iosaphat saghen, dachten si: Het is de Coninck Israels, ende trocken rontom, om tegen hem te strijden. Maer Iosaphat riep, ende de HEERE halp hem, ende God keerdese van hem.

* 3.Reg. 22.e.32.

32

Want doen de Ouerste Ruyters saghen, dat hy de Coninck Israels niet en was, keerden si hen van hem af.

33

^* Maer daer spande^† ongeuaerlijc, een man sinen boghe, ende schoot den Coninck Israels tusschen dat pansier ende hancksel. Doen sprack hy tot sinen voerman: Keert v hant, ende voert my wten heyr, want ick ben ghewont.

* 3.Re. 22.e.34.

† Slechtelijc.

34

Ende den strijt nam toe in dien daghe. Ende de Coninck Israels stont op sinen wagen tegen de Siriers tot tsauonts toe, ende sterf doen de Sonne onder ghinck.