Den Bibel, Inhoudende dat Oude ende Nieuwe Testament (Biestkensbijbel)

¶ Dat .xvij. Capittel.

¶ Vanden Conincrijcke Iosaphat.

1

⁺ ENde zijn sone^† Iosaphat werdt Coninck in zijn stede, ende wert machtich tegen Israel.

+ A vers 1

† 3.Re. 15.d.24

2

Ende hy leyde crijschvolck in allen vasten steden Iuda, ende sette Officiers inden Lande Iuda, ende inden steden Ephraim, die zijn vader Assa ghewonnen hadde.

3

Ende de HEEre was met Iosaphat. Want hy wandelde inde voorgaende wegen zijns vaders Dauid, ende en sochte Baalim niet,

4

Maer den God zijns vaders. Ende wandelde in sine gheboden, ende niet na de wercken Israels.

5

Daerom beuestichde hem de HEEre dat conincrijck. Ende gheheel Iuda gaf Iosaphat giften, ende hy hadde rijcdom ende eere in oueruloedicheyt.

6

Ende doen zijn herte moedich werdt inde weghen des HEEren, nam hy voortaen de Hoochten ende Boschkens wt Iuda wech.

7

Inden derden iare zijn Conincrijcx,

[p. 168r]

sant hy sine Vorsten,⁺ Benhail, Obadia, Sacharia, Nethaneel ende Michaia, dat si leeren souden inde steden Iuda,

+ B vers 7

8

Ende met hen de Leuiten, Semaia, Nethania, Sebadia, Asael, Semiramoth, Ionathan, Adonai, Tobia, ende TobAdonai, ende met hen de Priesters, Elisama ende Ioram.

9

Ende si leerden in Iuda, ende hadden dat wetboeck des HEEren met hen, ende trocken rontsom in alle steden Iuda, ende leerden dat volck.

10

Ende de vreese des HEEren quam ouer alle Conincrijcken inden Lande die rontom Iuda laghen, dat si niet en streden teghen Iosaphat.

11

Ende de Philisteen brochten Iosaphat ghiften, een last siluers. Ende de Arabiten brachten hem, seuen duysent ende seuen hondert rammen, ende seuen duysent ende seuen hondert bocken.

12

Alsoo nam Iosaphat toe, ende wert altoos grooter. Ende hy timmerde in Iuda sloten ende Corensteden,

13

Ende hadde veel voorraets in de steden Iuda, ende strijdtbaer mannen, ende gheweldighe lieden te Ierusalem.

14

⁺ Ende dit was de ordinancie in haerder vaderen huys, die in Iuda ouer de duysent Ouerste waren: Adna een ouerste, ende met hem waren drie hondert duysent gheweldighe lieden.

+ C vers 14

15

Naest hem was Iohanan de Ouerste, ende met hem waren twee hondert ende tachtentich duysent.

16

Naest hem was Amasia de sone Sichri die vrijwillighe des HEEren, ende met hem waren twee hondert duysent gheweldighe lieden.

17

Vanden kinderen BenIamin, was Eliada een gheweldigh man, ende met hem waren twee hondert duysent, die met boghen ende schilden ghewapent waren.

18

Naest hem was Iosabad, ende met hem waren hondert ende tachtentich duysent gherust totten heyr.

19

Dese namen alle des Conincx waer, behaluen die de Coninck noch gheleyt hadde in de vaste steden, in dat gheheele Iuda.