Den Bibel, Inhoudende dat Oude ende Nieuwe Testament (Biestkensbijbel)

¶ Dat .xvj. Capittel.

¶ Baesa trect teghen Assa, ende met hem wort Assa vereenicht, ende daerom straft hem de Heere.

1

⁺ INden sessendertichsten iaer des Conincrijcx Assa,^† troc Baesa de Coninc Israels op teghen Iuda, ende timmerde Rama, op dat hy Assa den Coninc Iuda soude beletten wt ende in te trecken.

+ A vers 1

† 3.Reg. 15.c.17

2

Assa nam wt den schat inden huyse des HEEren, ende inden huyse des Conincks, siluer ende gout, ende seynde tot Benhadad den Coninck te Siria, die tot Damascon woonde, ende dede hem segghen:

3

^† Daer is een verbont tusschen my ende v, tusscen mijnen vader ende uwen vader. Daerom heb ick v siluer ende gout ghesonden, dat ghi dat verbont met Baesa den Coninc Israels sout laten varen, op dat hy van my af trecke.

† 2.Reg. 8.a.5.

4

⁺ Benhadad hoorde den Coninc Assa, ende seynde zijn Heyrvorsten teghen de Steden Israels. Die sloegen Eion, Dan ende AbelMaim, ende alle coren steden Naphtali.

+ B vers 4

5

Doen Baesa dat hoorde, liet hy af Rama te timmeren, ende hielt op van sinen wercke.

6

Maer de Coninck Assa nam tot hem dat gheheel Iuda, ende sy droeghen die steenen ende dat hout van Rama wech, daer Baesa mede timmerde, ende hy timmerde Geba ende Mizpa daer mede.

7

In die tijt quam Hanani de Siender tot Assa den Coninck Iuda, ende sprack tot hem: Om dat ghy v op den Coninck te Sirien verlaten hebt, ende en hebt v niet op den HEERE uwen Godt verlaten, Daeromme is de macht des Conincx te Sirien uwer hant ontcomen.

8

^† En waren der Moren ende der Libiers niet eenen grooten hoop, met seer veel wagens ende Ruyteren? Nochtans gafse de HEEre in uwer hant, doen ghi v op hem verliet.

† 2.Par. 14.c.11

9

Want^† des HEEren ooghen aensien alle Lant, dat hy soude stercken die van geheelder herten aen hem zijn. Ghy hebt sottelijc gedaen: Daerom sult ghy oock van nv voortaen, oorloghe hebben.

† 2.Mac. 9.a.5. 12.d.22. Psal. 33.b.13. Iob. 28.c.25.

10

Maer Assa wert gram op den Siender, ende sette hem in de geuanckenisse, want hy murmureerde teghen hem ouer dese sake. Ende Assa verdructe somige vanden volcke tot dier tijt.

11

⁺ De geschiedenissen Assa, beyde de eerste ende de laetste, siet, die zijn ghescreuen inden Boeck vanden Coninghen Iuda ende Israel.

+ C vers 11

12

Ende Assa werdt cranck aen zijn voeten, inden negenendertichsten iaer zijns Conincrijcx, ende zijn cranckheyt nam seer toe.^† Ooc en socht hy den HEEre in zijn crancheyt niet, maer de medecijnmeesters.

† Eccle. 38.b.13

13

Also ontsliep Assa met sinen vaderen, ende sterf inden eenenveertichsten iare zijns Conincrijcx.

14

Ende men begroef hem in zijn graf, dat hy hem had laten grauen in de stadt Dauid.

15

Ende si leyden hem op sinen Leger, den welcken men geuult hadde met goeden ruecwerc, ende alderhande specerie, nader Apotekers conste ghemaect, ende maeckten een seer groot bernen ouer hem.