Den Bibel, Inhoudende dat Oude ende Nieuwe Testament (Biestkensbijbel)

¶ Dat .xiiij. Capittel.

¶ Vanden Coninck Assa.

1

⁺ ENde Assa^* dede dat recht was, ende den HEERE sinen Gode wel beuiel,

+ A vers 1

* 3.Reg. 15.b.11

2

Ende^† brack de vreemde Altaren af, ende de Hoochten, ende brack de Columnen, ende hieu de Boschkens af,

† 2.Par. 17.a.7 31.a.1. 33.c.15.

3

Ende liet Iuda segghen, dat si den HEEre den Godt haerder vaderen souden soecken, ende doen nae de wet ende gheboden.

4

Ende hy nam wech wt alle steden Iuda, de Hoochten ende de Afgoden,

5

Want dat Conincrijc was stille om sinent wille.

6

Ende hy^† timmerde vaste steden in Iuda, want dat Lant was stil, ende tegen hem en was geenen strijt inden seluen iaren. Want de HEEre gaf hem ruste.

† 2.Par. 8.a.2. 12.a.5.

7

⁺ Ende hy sprac tot Iuda: Laet ons dese steden timmeren, ende mueren daerom leyden ende thoren, dueren ende grendelen, te wijle dat Lant noch voor ons is. Want wy hebben den HEERE onsen Godt ghesocht, ende hy heeft ons rotomme ruste ghegheuen. Aldus timmerden si, ende het ghinck gheluckelijck vander hant.

+ B vers 7

8

Ende Assa hadde een heyrcracht, die spiessen ende schilden droeghen, wt Iuda drie hondert duysent, ende wt BenIamin die schilden droeghen, ende metten boghen schieten costen twee hondert ende tachtentich duysent, ende dese waren alle stercke Helden.

9

⁺ Maer Serah de Moor, trock teghen hen wt met een heyrcracht, duysentmael duysent, daer toe drie hondert waghens, ende quamen tot Maresa toe.

+ C vers 9

10

Ende Assa trock wt teghen hen, ende si bereyden hen totten strijt int dal Sephata, by Maresa.

11

Ende Assa riep den HEEre sinen God aen, ende sprack:^† HEEre, by v en is gheen onderscheet te helpen door vele, oft daer gheen cracht en is. Helpt ons HEEre onse God, want wy verlaten ons op v, ende in uwen Naem zijn wi gecomen teghen desen hoope. HEEre onse God tegen v en vermach geen mensce yet.

† Iudic. 7.a.2. 1.Reg. 14.a.6 2.Par. 16.b.8

12

⁺ Ende de HEEre plaechde de Moren voor Assa, ende voor Iuda dat si vluchten.

+ D vers 12

13

Ende Assa metten volcke dat by hem was, iaechden hen na tot Gerar toe. Ende de Mooren vielen, also dat haerder niet een leuende en bleef: Maer si werden geslaghen voor den HEERE, ende voor sinen Heyrlegher. Ende si brachtender seer veel roofs af.

14

Ende hy sloech alle steden rontom Gerar, want de vreese des HEEren quam ouer hen. Ende si beroofden alle Steden, want daer was veel roofs in.

15

Ooc sloegen si de Hutten des vees, ende brachten Schapen planteyt, ende Kemelen, ende quamen weder tot Ierusalem.