Den Bibel, Inhoudende dat Oude ende Nieuwe Testament (Biestkensbijbel)

¶ Dat .xiij. Capittel.

¶ Van Abia ende Ierobeam, ende haer strijden.

1

⁺ INden^† achtiensten iaer des Conincx Ierobeam, wert Abia Coninck in Iuda, ende regeerde drie Iaer te Ierusalem.

+ A vers 1

† 3.Reg. 15.a.1.

2

Sijn moeder hiet Michaia, een dochter Vriel van Gibea. Ende daer verhief eenen strijt tusschen Abia ende Ierobeam.

3

Ende Abia wapende hem totten strijdt met vier hondert duysent ionghe mannen, stercke lieden ten oorloghe. Maer Ierobeam wapende hem om tegen hem te strijden, met acht hondert duysent ionghe mannen, stercke lieden.

4

Ende Abia maecte hem op, bouen opten berch Semariam, welcke opt gheberchte Ephraim leghet, ende sprack: Ierobeam ende gheheel Israel hoort my,

5

En weet ghy niet dat de HEEre de God Israels, dat Conincrijc Israels Dauid eewelijck heeft ghegheuen, hem ende sine sonen een sout verbondt?

6

Maer Ierobeam de sone Nebat de knecht Salomo Dauids soon, wierp hem op, ende wert sinen Heere afuallich.

7

Ende loose lieden ende kinderen Belials, hebben hen tot hem ghegeuen, ende hebben hem ghesterct tegen Rehabeam den sone Salomo. Want Rehabeam was ionc ende bloode van herten, dat hy hem voor hen niet en weerde.

8

⁺ Nv denct ghy tegen dat Rijcke des HEEren, onder de sonen Dauids, te setten, om dat uwer eenen grooten hoop is,^† ende hebt gulden Calueren, die v Ierobeam tot goden ghemaect heeft.

+ B vers 8

† 3.Reg. 12.d.28

9

^† En hebt ghy niet de Priesters des HEEren de kinderen Aarons, ende de Leuiten wt ghestooten, ende hebt v eyghen Priesters gemaect, als de volcken inden lande? Wie daer coemt zijn hant te vullen, met eenen ionghen Osse, ende seuen Rammen, die wordt Priester der gheenre, die gheen goden en zijn.

† 2.Pa. 11.b.14

10

Maer de HEEre onse Godt is met ons, dien wy niet en verlaten: Ende de Priesters die den HEEre dienen, de kinderen Aaron, ende de Leuiten in haren wercke,

11

Die den HEEre alle morgen

[p. 167r]

ende alle auondt Brandtoffer ontsteken: Daer toe dat goede ruecwerck, ende bereyden brooden op de reyne tafele, Ende den gulden candelaer met sine lampen, datse alle auont ontsteken souden worden: Want wy bewaren de bewaringhe des HEEren ons Godts. Maer ghy hebt hem verlaten.

12

⁺ Siet, met ons is inder spitse, Godt ende sine Priesters,^† ende de trompetten om te trompetten, datmen tegen v trompette.^† Ghy kinderen Israels en strijdt niet teghen den HEEre uwer vaderen Godt, wandt het en sal v niet wel ghelucken.

+ C vers 12

† Num. 10.a.2.

† Iob. 9.a.4.

13

Maer Ierobeam stelde^* laghen rontom, dat hy van achter aen hem soude comen, Alsoo dat si voor Iuda waren, ende de ghestelde laghe achter hen.

* Een achterhoedinghe.

14

Doen Iuda hem nv om keerde, Siet, doen wasser voor ende achter hen strijt. Doen riepen si totten HEEre, ende de Priesters trompten met trompetten,

15

Ende elck man in Iuda maeckte een gheluyt. Ende doen elck man in Iuda een gheluyt maecte, plaechde Godt Ierobeam ende dat gheheele Israel voor Abia ende Iuda.

16

Ende de kinderen Israels vluchten voor Iuda, ende God gafse in haren handen,

17

Also dat Abia met sinen volcke eenen grooten slach aen hen dede, ende van Israel vielen vijf hondert duysent ionghe mannen verslaghen.

18

⁺ Alsoo werden de kinderen Israels op die tijt verootmoedicht. Mer de kinderen Iuda werden getroost, Want si verlieten hen opten HEERE haerder vaderen Godt.

+ D vers 18

19

Ende Abia iaechde Ierobeam na, ende wan hem steden af, BethEl met haren dochteren, Iesana met haren dochteren, ende Ephron met haren dochteren.

20

Alsoo dat Ierobeam niet weder tot crachte en quam, alsoo langhe als Abia leefde, ende de HEEre plaechde hem, dat hy sterf.

21

Doen nv Abia gesterct was, nam hy veerthien wijuen, ende wan tweentwintich sonen, ende sesthien dochteren.

22

Wat meer van Abia te segghen is, ende zijne weghen ende zijn doen, dat is gescreuen in de Historie des Propheten Iddo.

23

Ende Abia ontsliep met sine vaderen, ende si begroeuen hem in de stadt Dauids. Ende Assa zijn sone wert Coninck in zijn plaetse. Tot diens tijden was dat Lant thien iaer stille.