Den Bibel, Inhoudende dat Oude ende Nieuwe Testament (Biestkensbijbel)

¶ Dat .xij. Capittel.

¶ Roboam verlaet de Wet des HEEren, de Coninck Egipti ouerualt hem, maer de HEEre verlost hem.

1

⁺ MAer doen dat Conincrijc Rehabeam beuesticht ende becrachticht wert, verliet hy de Wet des HEEren, ende dat gheheele Israel met hem.

+ A vers 1

2

Mer inden vijfsten Iare des Conincx Rehabeam,^† trock op Sisak de Coninc te Egipten tegen Ierusalem (want si hadden hen besondicht aenden HEERE)

† 3.Re. 14.e.25.

3

Met duysent ende twee hondert waghens, ende met tsestich duysent Ruyteren, ende dat volck en was niet te tellen, dat met hem quam wt Egipten, Libia, Suchim ende Moren Lant,

4

Ende hy wan de^† vaste steden die in Iuda waren, ende quam tot Ierusalem toe.

† 2.Par. 11.a.5.

5

Doen quam Semaia de Propheet tot Rehabeam, ende totten Ouersten Iuda, die hen tot Ierusalem vergadert hadden voor Sisak, ende sprack tot hen: So spreect de HEEre: Ghy hebt my verlaten, daerom heb ick v oock verlaten in Sisaks hant.

6

Doen verootmoedichden hen de Ouersten in Israel, metten Coninc, ende spraken: De HEEre is gherecht.

7

⁺ Maer als de HEEre sach, dat si hen verootmoedichden, quam dat woort des HEEren tot Semaia ende sprack: Sy hebben hen verootmoedicht, Daerom en wil icse niet verderuen. Maer ic wil hen een weynich verlossinghen gheuen, dat mijne verbolghentheyt niet en druype op Ierusalem door Sisak,

+ B vers 7

8

Doch soo sullen si hem onderdaen zijn, op dat si onderuinden, wat het is my te dienen, ende den Conincrijcken inde landen te dienen.

9

Also trock Sisak de Coninc in Egipten op nae Ierusalem, ende nam de schatten inden huyse des HEEren, ende de schatten inden huyse des Conincx wech, ende nam alle dinck wech. Ende nam oock de gulden schilden wech,^† die Salomo maken dede.

† 2.Par. 9.c.15.

10

In welcker stede de Coninck Rehabeam metalen schilden liet maken, ende beualse den Ouersten der Artsiers, die aender dueren des Conincx huys de wacht hielden.

11

Ende soo dicwils de Coninck in des HEEren huys ghinck, quamen de Trauanten, ende droegense, ende brachtense weder in der Trauanten camer.

12

Ende want hy hem verootmoedichde, soo keerde haer de gramschap des HEEren van hem, alsoo dat het niet allemael verdoruen en wert. Want in Iuda was noch wat goets.

13

⁺ Alsoo wert Rehabeam de Coninc beuesticht te Ierusalem, ende regeerde.^† Eenenveertich iaer was Rehabeam oudt, doen by Coninck wert, ende regeerde seuenthien iaer te Ierusalem, inde stadt^* die de HEEre vercoren hadde wt alle stammen Israels, dat hy zijnen Naem daer soude stellen. Sijn moeder hier Nahema, een Ammonitinne.

+ C vers 13

† 3.Re. 14.d.21.

* 2.Par. 7.c.12.

14

Ende hy handelde qualijc, ende en schicte zijn herte daer niet nae, dat hy den HEEre ghesocht hadde.

15

De gheschiedenissen Rehabeam, beyde de eerste ende de laetste, zijn gescreuen in de gheschiedenissen Semaia des Propheten, ende Iddo des Sienders, ende op gheteeckent. Daer toe de oorlogen Rehabeam ende Ierobeam haer leuen lanck.

16

Ende Rehabeam ontsliep met zijnen vaderen, ende wert begrauen in de stadt Dauids. Ende zijn soon Abia wert Coninck in zijn stede.