Den Bibel, Inhoudende dat Oude ende Nieuwe Testament (Biestkensbijbel)

¶ Dat .vij. Capittel.

Dat vyer coempt vanden Hemel, ende verteert de offerhande. De Coninc ende dat volck offeren. De HEEre openbaert den Coninck Salomon, ende hy beloeft hem, dat hy hem wil verhooren.

1

⁺ ENde^† doen Salomo wt ghebeden hadde,^* viel een vyer vanden Hemel, ende verslinde dat Brantoffer ende ander offer. Ende de heerlijcheyt des HEEren veruulde dat huys,

+ A vers 1

† 3.Re. 8.h.54.

* 3.Re. 18.e.38 2.Mac. 1.d.32 2.b.10.

2

Dat de Priesters niet en conden in ghegaen int huys des HEEren, Want de heerlijcheyt des HEEren veruulde des HEEren huys.

3

Oock saghen alle kinderen Israels, dat vyer afuallen, ende de heerlijcheyt des HEEREN ouer dat huys^* ende vielen op haer knien, metten aensichte ter Aerden, opt plaueytsel, ende aenbaden, ende danckten den HEERE, dat hy goederthieren is, ende dat zijne ontfermherticheyt eewelijck duert.

* 1.Ma. 4.g.55

4

^* De Coninck ende allet volc offerden voor den HEEre.

* 1.Esd. 6.c.16. 3.Reg. 8.I.62

5

Want de Coninc Salomo offerde tweentwintich duysent Ossen, ende hondert ende twintich duysent Schapen, ende wijden alsoo dat huys Godts, beyde de Coninck, ende allet volc.

6

⁺ Maer de Priesters stonden in hare wacht, ende de Leuiten met de snarenspelen des HEEren, die de Coninc Dauid hadde laten maken, om den HEEre te dancken, dat zijne ontfermherticheyt eewelijck duert, metten Psalmen Dauids, door hare hant. Ende de Priesters bliesen Trompetten voor hen, ende dat gheheele Israel stont.

+ B vers 6

7

Ende Salomo heylichde den middel hof, die voor den huyse des HEEren was. Want hi hadde aldaer Brantoffer, ende dat vette der Dancofferen beschickt. Want den Metalen Altaer, die Salomo hadde laten maken, en coste alle dat Brantoffer, Spijsoffer ende dat vette niet gheuaten.

8

Ende Salomo hielt inde selue tijt^† een Feeste seuen daghen lanck, ende dat gheheele Israel met hem, een seer groote gemeynte, van Hemath aen, totter beken Egipti toe,

† Deut. 16.c.15. 1.Ma. 4.g.56

9

Ende hielt opten achsten dach een vergaderinghe. Want de wijdinghe des Altaers hielden sy seuen daghen lanck, ende de Feeste ooc seuen daghen lanck.

10

Maer in den drientwintichsten daghe der seuender maent, liet hi dat volck vrolijck ende goets moets in haren Hutten gaen, ouer alle den goede, dat de HEEre aen Dauid, Salomo, ende zijn volck Israel ghedaen hadde.

11

⁺ Also^* voleynde Salomo dat huis des HEEren, ende dat huys des Conincx, ende al wat in zijnder herten gecomen was te maken inden huyse des HEEren, ende in zijnen huyse, voorspoedelijck.

+ C vers 11

* 3.Reg. 9.a.1.

12

Ende de HEEre openbaerde Salomo snachts ende sprac tot hem: Ic hebbe v ghebet verhoort^† ende my dese plaetse ver-

† 1.Par. 6.a.6.

[p. 165r]

coren, tot eenen offerhuyse.

13

Siet, Als ick den Hemel toe sluyte dattet niet en reghent, oft heete de Sprinckhanen dat lant verslinden, oft late een Pestilencie onder mijn volck comen,

14

Dat sy mijn volck verootmoedighen, dat nae mijnen Name genoemt is, en si bidden, ende mijn aensicht soecken, ende si hen van haren quaden weghen bekeeren, so wil ic vanden hemel hooren, ende haer sonden vergheuen, ende haer lant heelen.

15

So sullen nv mijn ooghen open zijn, ende mijn ooren opmercken, op dat ghebet in deser plaetsen.

16

^† Dus heb ick nv dit huys vercoren, ende gheheylicht, dat mijnen Name aldaer zijn sal eewelijck, ende mijne ooghen, ende mijn herte sal daer altoos zijn.

† 2.Par. 33.a.4

17

⁺ Ende ist dat ghy voor my wandelt, ghelijc v vader Dauid gewandelt heeft, dat ghy doet al wat ick v heete, ende hout mijn gheboden ende Rechten,

+ D vers 17

18

Soo wil ick den stoel dijns Coninckrijcx beuestighen, so ick my, dijnen vader Dauid verbonden heb, ende geseyt:^† Het en sal v niet gebreken aen eenen man die ouer Israel een Heere sy.

† 2.Reg. 7.c.12.

19

Maer keert ghy v af, ende mijn Rechten ende gheboden, die ick v voorgheleyt hebbe, verlaet, ende wech gaet, ende ander goden dient, ende die aenbidt,

20

So sal icse wtwortelen wt mijnen lande, dat ic hen ghegheuen heb. Ende dit huys dat ick mijnen Naem gheheylicht heb, sal ic van mijnen aensichte wech werpen, ende salt tot een ghemeyn spreecwoort geuen, ende tot eender fabulen, onder allen volcken.

21

Ende voor dit huys dat het hoochste geworden is, sullen hen ontsetten, alle die daer voorby gaen, ende seggen.^† Waerom heeft de HEEre desen lande, ende desen huyse alsoo ghedaen?

† Deu. 29.d.24 Iere. 22.a.8.

22

Soo salmen seggen: Daerom dat si den HEEre haerder Vaderen God verlaten hebben, diese wt den lande Egipti gheleyt heeft, ende hebben anderen goden aenghehanghen, ende die aenghebeden, ende hen gedient. Daerom heeft hy alle dit ongheluc ouer hen ghebracht.