Den Bibel, Inhoudende dat Oude ende Nieuwe Testament (Biestkensbijbel)

¶ Dat .viij. Capittel.

¶ Salomon timmert steden, Ende hy brengt onder hem de Heydenen, van sinen hooftlieden, ende van zijne wijuen.

1

⁺ ENde na^† twintich iaren, in welcken Salomo dat huys des HEEren, ende zijn huys timmerde,

+ A vers 1

† 3.Reg. 9.c.10.

2

Soo^* timmerde hy de steden ooc, die Huram Salomo gaf, ende liet de kinderen Israels daer in woonen.

* 2.Par. 11.a.5. 14.a.6.

3

Ende Salomo trock nae HemathSoba, ende beuestichdese,

4

Ende timmerde Thadmor inder woestijnen, ende alle Corensteden, die hy timmerde in Hemath.

5

Hy timmerde ooc ouer ende neder BenHoron, dat vaste steden waren, met mueren, poorten, ende grendelen:

6

Oock Baelath, ende alle Coren steden, die Salomo hadde, ende alle waghen steden, ende der Ruyters, ende al waer Salomo lust toe hadde te timmeren, beyde te Ierusalem, ende op den Li-banon, ende inden gheheelen Lande zijnder heerschappijen.

7

⁺ Alle dat ouerbleuen volc vanden Hethiten, Amoriten, Pheresiten, Heuiten, ende Iebusiten, die vanden kinderen Israels niet en waren,

+ B vers 7

8

Ende haer kinderen die si achter gelaten hadden inden lande, die de kinderen Israels niet vernielt en hadden, Maecte Salomo Chijnsbaer, tot op desen dach.

9

^† Maer vanden kinderen Israels en maecte Salomo geen knechten tot sinen arbeyt, maer si waren oorloochs lieden, ende ouer zijn Vorsten, ende ouer zijn waghens, ende Ruyteren.

† Leuit. 25.f.45 1.Reg. 8.b.11.

10

Ende der Ouersten Officiers des Conincx Salomo, waren twee hondert ende vijftich, die ouer dat volck heerschappije hadden.

11

Ende Salomo liet de dochter Pharao op halen wt der stadt Dauids,^† int huys dat hy voor haer getimmert had, Want hy sprack: Mijn wijf en sal niet woonen int huys Dauids, des Conincx Israels: Want het is geheylicht, om dat de Arcke des HEEren daer in ghecomen is.

† 3.Reg. 7.b.2.

12

⁺ Van dien aen offerde Salomo den HEEre, Brandtoffer opten Altaer des HEEren, die hy ghesticht had voor dat portael,

+ C vers 12

13

Om elck op sinen dach te offeren^† nae dat ghebot Mose, op de Sabbathen, nieuwe Maenden, ende inghesette tijden des^* Iaers driemael, te weten, op de feeste der ongesuerder brooden, op de Feeste der weken, ende op de Feeste der Loouerhutten.

† Num. 28.a.3.

* Exod. 23.b.17

14

Ende hy stelde de Priesters in hare ordinancie, tot haren Officie,^* ghelijck het zijn vader Dauid gheordineert hadde. Ende de Leuiten op haer wacht, om te louen ende te dienen, voor de Priesteren, elc op haren dach. Ende de duerwachters in haer ordinancie, elc op zijn Poorte. Want alsoo haddet Dauid de man Godts beuolen.

* 1.Pa. 10.d.24

15

Ende daer en werdt niet gheweken vanden geboden des Conincx, ouer de Priesteren, ende Leuiten, in alderhande saken, ende aen de schatten.

16

⁺ Alsoo werdt allet werck Salomo bereyt, vanden dage aen doen des HEEren huys ghefondeert werdt, tot dat hy voleynde, dat des HEEren huys gheheelijck volmaect wert.

+ D vers 16

17

^* Doen trock Salomo na EzeonGeber, ende nae Eloth, aen den Oeuer der zee, inden lande Edomea.

* 3.Reg. 9.e.26. 22.g.49.

18

Ende Huram seynde hem Schepen door sine knechten die der zee condich waren, ende voeren metten knechten Salomons in Ophir, ende haelden van daer, vier hondert ende vijftich Centner Gouts, ende brachtent den Coninck Salomo.