Den Bibel, Inhoudende dat Oude ende Nieuwe Testament (Biestkensbijbel)

¶ Dat .v. Capittel.

¶ Wat Salomon inden Tempel doet.

1

⁺ ENde Salomo^† bracht daer in, alle wat zijn Vader Dauid gheheylicht hadde, te weten, siluer ende gout, ende alderhande ghereetschap, ende leydet inde schatten, inden huyse Godts.

+ A vers 1

† 3.Reg. 7.g.51.

2

^* Doen vergaderde Salomo alle Ouders in Israel, alle Hooftlieden der stammen, ende Vorsten der Vaderen, onder den kinderen Israels te Ierusalem, dat sy de Arcke des verbondts des HEEREN op souden brenghen, wt der stadt Dauids, dat is Sion.

* 3.Reg. 8.a.1.

3

Ende het vergaderden hen totten Coninck, alle mannen Israels op die Feeste, dat is inder seuender maent,

4

Ende alle Ouders Israels quamen. Ende de Leuiten namen de Arcke op, ende brachtense opwaerts metter Hutten des ghetuychenis,

5

Ende allet heylighe gereetschap, dat inder Hutten was.

6

Ende de Priesters ende de Leuiten brachtense mede opwaerts. Maer de Coninck Salomo ende de gheheele ghemeynte Israels tot hem vergadert voor Arcke, offerden Schapen ende Ossen so vele datse nyemant ghetellen, oft rekenen en coste.

7

⁺ Also brachten de Priesters de Arcke des verbonts des HEEREN op haer plaetse inden Choor des huys, in dat Alderheylichste, onder de vlogelen der Cherubim,

+ B vers 7

8

Alsoo dat de Cherubim hare vloghelen wtbreyden ouer de plaetse der Arcken, Ende de Cherubim bedecte de Arcke, ende hare Hantboomen van bouen neder.

9

De Hantboomen waren so lanc, datmen hare knoopen sach verre vander Arcken voor den Choor, maer buyten en sachmense niet. Ende sy was aldaer tot op desen daghe.

10

^† Ende daer en was niet in de Arcke, dan de twee Tafelen die^* Mose in Horeb daer in gheleyt had, doen de HEEre een verbont maecte metten kinderen Israels, doen sy wt Egipten trocken.

† 3.Reg. 8.b.9.

* Deut. 10.a.5

11

Ende doen de Priesters wt ghingen wt den heylighen (want alle Priesters die voor handen waren heylichden hen, alsoo dat ooc de ordinen niet ghehouden en werden.)

12

⁺ Ende de Leuiten, met alle die onder Assaph, Heman, Iedithun, ende haren kinderen ende broederen waren, ghecleet met Lijwaet, songhen met Cymbalen, Psalteren, ende Herpen. Ende stonden teghent Oosten des Altaers, ende by hen hondert ende twintich Priesters, die met Trompetten bliesen.

+ C vers 12

13

Ende het was, als oft een alleen waer, die daer trompettede ende songhe, als oftmen een stemme hoorde, te louen, ende te dancken den HEEre. Ende doen haer de stemme verhief, vanden Trompetten, Cymbalen, ende ander^† muysijckspelen, ende van dien loue des HEEren, dat hy goedertieren is, ende dat zijne ontfermherticheyt eewelijck duert.^† Doen wert dat huys des HEEren veruult met eender wolcken,

† Snaren.

† Exo. 40.d.34 Ezech. 9.a.3. Num. 9.c.15.

14

Alsoo dat de Priesters niet en costen ghestaen, om te dienen om dier wolcken wille. Want de heerlijcheyt des HEEREN veruulde dat huys Gods.