Den Bibel, Inhoudende dat Oude ende Nieuwe Testament (Biestkensbijbel)

¶ Dat .iiij. Capittel.

¶ Vanden Vaten des Tempels.

1

⁺ HI Maecte oock eenen^† metalen Altaer, twintich ellen lanck ende breet, ende thien ellen hooch.

+ A vers 1

† Exod. 27.a.1.

2

Ende hy maecte^† een gheghoten See, thien ellen wijt, vanden eenen rant totten anderen rontom, ende vijf ellen hooch. Ende een Mate van dertich ellen die mochtse rontom begrijpen.

† 3.Re. 7.d.23.

3

Ende ossen beelden waren onder haer rontsom. Ende daer waren twee rijen knoppen rontsom de See (die thien ellen wijt was) die daermede aen gheghoten waren.

4

Maer si stont also op die twelf Ossen. Dat drie gekeert waren ten Noordenwaert, drie Westwaert, drye Suytwaerts, drye Oostwaert ende de See bouen op haer, ende alle haer achterdeel was inwaerts ghekeert:

5

Haer dicte was een hant breet, ende haren rant was ghelijc als eens bekers rant, ende een opghegaen Roose, ende daer ghinc in drie duysent Bath.

6

Ende hy maecte^† thien Ketelen, dier settede hy vijf ter rechter, ende vijf ter slincker sijden, om daer in te wasschen, al wat totten Brantoffer behoort, dat

† 3.Reg. 7.f.38.

[p. 163v]

zijt daer in mochten stooten: Maer de See, datter hen de Priesters in souden wasschen.

7

⁺ Hy maecte oock thien gouden Candelaers, soo sy behoorden te zijne, ende hy steldese inden Tempel, vijf ter rechter, ende vijf ter slincker sijden.

+ B vers 7

8

Ende hy maecte thien Tafelen, ende settese inden Tempel, vijf ter rechter, ende vijf ter slincker sijden. Ende hy maecte hondert gulden beckens.

9

Hy maecte oock eenen Hof, voor de Priesters ende een groot schrancwerck, ende dueren in dat schrancwerck, ende ouertrock de dueren met metael.

10

Ende hy settede de See opten rechten hoeck, teghent Oosten, totten Suytwaert.

11

Ende Huram maecte de Potten, Schuppen, ende Beckens.

Also voleynde Huram dat werck, dat hy den Coninck Salomo dede, aen dat huys Godts,

12

Te weten^† de twee Columnen, metten buycken ende knoopen bouen op beyde Columnen, ende beyde ghewonden Reepen, om te bedecken, beyde buycken der knoopen, bouen op de Columnen,

† 3.Reg. 7.c.15.

13

⁺ Ende de vyer hondert granaet appelen, aen beyden gewonden Reepen twee rijen, granaet appelen aen elcken Reep, om te bedecken beyde buycken der knoopen, die bouen op de Columnen waren.

+ C vers 13

14

Oock maecte hy de ghestoelten, ende de Ketelen op de ghestoelten, Ende een See, ende twelf Ossen daer onder.

15

Daer toe, Potten, Schuppen, Crauwelen, ende alle haer vaten maecte HuramAbif, den Coninck Salomo totten huyse des HEEREN, wt louteren metael.

16

Inde Contreye der Iordanen lietse de Coninck ghieten in cleyachtighe Aerde, tusschen Suchot ende Saredatha.

17

Ende Salomo maecte aller deser vaten seer veel, alsoo datmen des metaels ghewichte niet geweten en conde.

18

Ende Salomo maecte allet ghereetschap totten huyse Gods, te weten, den gulden Altaer, de Tafelen,^† ende Toonbroot daer op,

† Exo. 25.c.30. Leuit. 24.b.5

19

De Candelaers met haren Lampen van louteren goude, dat sy voor den Choor souden bernen, also dattet behoort.

20

Ende de bloemen aen de Lampen, ende de Snutters waren gulden, dat was altemael dicht gout.

21

Daer toe de Messen, Beckens, Lepelen, ende Nappen, waren louter gout. Ende den inganck ende zijne dueren binnenwaerts totten Alderheylichsten, ende de dueren aenden huyse des Tempels waren gulden. Also werdt alle werc volbracht, dat Salomo dede aenden huyse des HEEREN.