Den Bibel, Inhoudende dat Oude ende Nieuwe Testament (Biestkensbijbel)

¶ Dat .iij. Capittel.

¶ Hoe dat hy beghint te timmeren ende in wat gedaente ende forme, dat wordt hier beschreuen.

1

⁺ ENde Salomo begost^† te timmeren dat huys des HEEren te Ierusalem, op den berch Moria,^* die Dauid zijnen vader getoont was: Den welcken Dauid bereyt had tot eender ruymte op de Pleyne Arnan, des Iebusiten.

+ A vers 1

† 3.Reg. 6.a.1.

* 1.Pa. 22.e.31

2

Hy begoste te timmeren inder anderder maent, des anderen daechs, inden vierden Iaer zijns Conincrijcx.

3

Ende aldus leyde Salomo dat Fondament, om dat huys Gods te timmeren: Ten yersten, de lengte, tsestich ellen lanc: De wijde, twintich ellen.

4

Ende dat^†† poortael voor de wijde des huys henen, was twintich ellen lanck: Maer de Hoochte was hondert ende twintich ellen. Ende ouertroct binnen met louteren goude.

† voorhuys

† Ioan. 10.c.22 Acto. 3.b.11. 5.b.12.

5

Maer dat groote huys decte hy met Dennen houte, ende ouertroct met den alderbesten goude. Ende maecte daer op Palmen, ende ketenwerck.

6

⁺ Ende ouertroc dat huys met edele steenen, tot een vercieringhe. Dat gout was Parwaim gout.

+ B vers 6

7

Ende ouertroc de balcken bouen, ende de wanden, ende de dueren met goude, ende liet Cherubim snijden aen de wanden.

8

Hy maecte ooc dat huys des alderheylichsten, dies lengde was twintich ellen, nae der wijden des huys, ende zijne wijde was oock twintich ellen, ende ouertrockt metten alderbesten goude, by seshondert Centner.

9

Ende gaf oock tot nagelen vijftich sikelen gouts in gewichte. Ende ouertrock den Sael met goude.

10

Hy maecte oock int huys des Alderheylichsten^† twee Cherubim, na der beeltsnijders conste, ende ouertrocse met goude.

† Exo. 25.b.18.

11

Ende de lengde der vlogelen aen de Cherubim, was twintich ellen, also dat eenen vloghel vijf ellen hadde, ende raeckte aen de want des huys.⁺ Ende den anderen vloghel oock vijf ellen hadde, Ende raecte aenden vloghel des anderen Cherubs.

+ C vers 11

12

Also hadde den eenen vloghel des anderen Cherubs ooc vijf ellen, ende raecte aenden want des huys, ende zijnen anderen vloghel oock vijf ellen, ende raeckte aenden vloghel des anderen Cherubs.

13

Alsoo dat dese vloghelen der Cherubim, wt waren gebreydet twintich ellen wijdt. Ende sy stonden op hare voeten, ende haer aensicht was ten huyswaert ghekeert.

14

Hy maecte ooc een voorhancsel van geelwerck, scharlaken, rosetroot, ende lijwaet, ende maecte Cherubim daer op.

15

Ende hy maecte voor den huyse twee^† Columnen vijfendertich ellen lanc. Ende den knoop bouen daer op, vijf ellen.

† 3.Reg. 7.c.15.

16

Ende hy maecte ketenwerc totten Choor, ende dedese bouen aen de Columnen. Ende maecte hondert granaetappelen, ende dedese aen dat ketenwerck.

17

Ende rechtede de Columnen op, voor den Tempel, deen ter rechter, ende dander ter slincker handt. Ende hiet die ter rechter hant Iachin, ende die ter slincker handt Boas.