Den Bibel, Inhoudende dat Oude ende Nieuwe Testament (Biestkensbijbel)

¶ Dat .ij. Capittel.

¶ Hoe dat Salomo voor hem neemt den Tempel des HEEren te timmeren.

1

⁺ ENde Salomo dacht een huys te timmeren den Naem des HEEren, ende een huys zijns Conincrijcx.

+ A vers 1

2

Ende telde af tseuentich duysent mannen totten lasten, ende tachtentich duysent timmerlieden op den berghe, ende drye duysent, ende ses hondert Officiers ouer haer.

3

Ende Salomo seynde^‡ tot Huram den Coninck tot Tyro, ende dede hem seggen:^† Ghelijck ghy met mijnen vader Dauid deet, ende hem Cederen seyndet, dat hy hem een huys timmerde, daer hy in woonde [Also doet oock met my]

‡ 3.Reg. 5.a.2.

† 2.Re. 5.b.11.

4

Siet, ick wil den naem des HEEREN, mijns Godts een huys timmeren, op dat hem geheylicht worde, om goet Rueckwerck voor hem te roocken, ende altoos thoonbroot te bereyden, ende Brantoffer des Morghens ende des Auonts, op de Sabbathen, ende nieuwe Manen, ende op de Feesten des HEEren, ons Gods, eewelijck voor Israel.

5

⁺ Ende dat huys dat ick timmeren wil, sal groot zijn, want onse Godt is grooter dan alle goden.

+ B vers 5

6

Maer wie vermacht, dat hy hem een huys timmere?^† Want den Hemel, ende alder Hemelen Hemel en mogen hem niet begrijpen. Wie soude ick dan zijn, dat ick hem een huys soude timmeren? Maer alleen, datmen voor hem soude roocken.

† 3.Reg. 8.d.27. Esaie. 66.a.1.

7

Dus seynt my nv eenen wijsen man, om te arbeyden, met gout, siluer, metael, yseren, scharlaken, rosetroot, ghele sijde, ende die wete wt te groeuen metten wijsen, die by my zijn, in Iuda ende Ierusalem, welck mijn vader Dauid beschict heeft.

8

Ende seyndt my Cederen, Dennen, ende Heben Hout, wt den Libano. Want ick wetet, dat uwe knechten, dat Hout weten te houwen op den Libanon. Ende siet, mijne knechten sullen met uwen knechten zijn,

9

⁺ Op datmen my veel houts bereyde. Want dat huys dat ick timmeren wil, sal groot ende sunderlijck zijn.

+ C vers 9

10

Ende siet ic wil den timmerlieden, uwen knechten, die dat hout houwen, twintich duysent Cor ghestootender Terwen,

[p. 163r]

ende twintich duysent Cor gersten, ende twintich duysent Bath wijns, ende twintich duysent Bath Olijs gheuen.

11

Doen sprack Huram de Coninck tot Tyro door schriften, ende seyndese Salomo. Daerom dat de HEEre zijn volck bemint, soo heeft hy v Coninc ouer hem ghemaect.

12

Ende Huram sprac voort: Geloeft sy de HEEre, de God Israels, die Hemel ende Aerde ghemaect heeft, dat hy den Coninck Dauid eenen wijsen cloecken verstandighen soon ghegheuen heeft, die den HEERE een huys timmeren soude, ende een huys zijns Conincrijcx.

13

Soo seynde ick nv eenen wijsen man, die verstant heeft^* HuramAbif,

* 3.Reg. 7.b.13.

14

Die een soon is eens wijfs, vanden dochteren Dan, ende zijn Vader een Tirijsch man gheweest is.^+† Die weet te arbeyden, aen gout, siluer, metael, ijser, steen, hout, scharlaken, gheele sijde, lijnen, rosetroot, ende te groeuen alderhande ende alderley constelijc te maken, watmen hem voorleyt, met uwen wijsen, ende metten wijsen mijns HEEREN des Conincx Dauids, ws vaders.

+ D vers 14

† Exo. 31.a.4.

15

Dus seynde nv mijn HEERE, terwe, gerste, olie, ende wijn zijnen knechten, soo hy ghesproken heeft:

16

Soo willen wy dat hout houwen op den Libanon, soo veel alst van noode is, ende willent op vloten brenghen op de See, na Iapho. Van daer moecht ghijt op na Ierusalem brengen.

17

Ende Salomo telde alle vreemdelinghen inden lande Israel, na dat ghetal^* doense Dauid zijn vader telde. Ende daer werden geuonden hondert ende vijftich duysent, drie duysent, ende seshondert.

* 1.Par. 23.a.1.

18

Ende hy maecte vanden seluen tseuentich duysent draghers, ende tachtentich duysent houwers, opten berghe, ende drie duysent, ende ses hondert toesienders die dat volcke aen hielden aenden dienste.