Den Bibel, Inhoudende dat Oude ende Nieuwe Testament (Biestkensbijbel)

[p. 162v]

Dat tweede Boeck der Cronijcken.

Dat eerste Capittel.

¶ Van Salomons Coninrijcke, den seluen openbaert de HEEre, ende Salomo bidt hem.

1

⁺ ENde Salomo de sone Dauidts wert in zijn Rijck becrachticht, ende de HEEre zijn Godt was met hem, ende maecte hem altoos grooter.

+ A vers 1

2

Ende Salomo sprac metten geheelen Israel, metten Ouersten ouer duysent, ende hondert, metten Rechteren, ende met allen Vorsten in Israel, metten Ouersten Vaderen.

3

^† Dat sy souden gaen Salomo ende de geheele ghemeynte met hem, opter Hoochten die te Gibeon was.^* Want aldaer was de Hutte des ghetuychenis Gods,^‡ die Mose de knecht des HEEren ghemaect hadde inder woestijnen.

† 3.Reg. 3.a.4.

* 1.Par. 22.e.29

‡ Exo. 36.b.4

4

^* Want de Arcke Gods hadde Dauid opghebracht van^† KiriathIearim, inde stede die hy haer bereyt had. Want hi hadde haer een Hutte opgeslagen te Ierusalem.

* 2.Reg. 6.a.2

† 1.Reg. 7.a.2

5

Maer den metalen Altaer^† dien Bezaleel, de sone Vri, des soons Hur gemaect had, was aldaer voor de Wooninge des HEEren. Ende Salomo, ende de gemeynte plagen dien te versoecken.

† Exo. 38.a.2.

6

⁺ Ende Salomo offerde opten metalen Altaer voor den HEEre, die voor de Hutte des getuychenis stont, duysent Brantoffers.

+ B vers 6

7

Inder seluer nacht openbaerde Godt Salomo, ende sprac tot hem: Bidt, wat sal ic v geuen?

8

Ende Salomo sprac tot God: Ghy hebt groote ontfermherticheyt aen mijnen Vader Dauid gedaen, ende hebt my in zijn plaetse Coninck ghemaect.

9

So laet nv HEEre God v woort warachtich worden aen mijnen Vader Dauid,^† want ghy hebt my Coninc gemaect ouer een volc des soo vele is, als des stofs op Aerden.

† Sapi. 9.a.7.

10

Dus^† gheeft my nv wijsheyt ende kennisse, dat ick voor desen volcke wt ende in gae. Want wie can dit v groote volck gheoordeelen?

† 3.Reg. 3.b.9.

11

Doen sprac God tot Salomo:^† Want ghy dat inden sinne hebt, ende en hebt niet om rijcdom, noch om goet, noch om eere, noch om uwer Vianden sielen, noch om een lanck leuen ghebeden: Maer hebt om wijsheyt ende kennisse gebeden, dat ghy mijn volck ordeelen mocht, daer ic v tot eenen Coninck ouer gemaect hebbe:

† 3.Reg. 3.b.11. Matt. 6.d.33.

12

^+* So sy v wijsheyt ende kennisse gegeuen.^† Daer toe wil ic v rijcdom, goet, ende eere geuen, dat ws gelijck onder den Coningen voor v niet geweest en is, noch worden en sal na v.

+ C vers 12

* 3.Re. 4.c.29

† Sap. 7.b.11.

13

Alsoo quam Salomo vander Hoochten, die tot Gibeon was, tot Ierusalem vander Hutten des ghetuychenis, ende regeerde ouer Israel.

14

^† Ende Salomo vergaderde hem wagens ende Ruyters, also dat hy te wege bracht, duysent ende vier hondert wagens, ende twelf duysent Ruyters, ende lietse inden wagen steden, ende by den Coninck te Ierusalem.

† 3.Reg. 4.c.26 10.e.26. Deut. 17.d.21. 2.Par. 2.e.25.

15

Ende de Coninc maecte des siluers ende gouts so veel te Ierusalem, als de steenen: Ende der Cederen, als de Moerbesien boomen, die inde beemden zijn.

16

Ende men bracht Salomo Rossen wt Egipten, ende alderley ware. Ende de Cooplieden des Conincx cochten de selue ware, ende brachtense wt Egipten,

17

Elcken wagen om ses hondert siluerlingen, ende eenen Hengst, om hondert ende vijftich. Also brachtense oock alle Coningen der Hethiten, ende den Coningen tot Sirien.