Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxx. Capittel.

¶ Dauid spreect vander timmeragie des tempels, ende wat de Vorsten daer toe belouen.

1

⁺ ENde de Coninck Dauid sprack totter geheelder gemeynten: God heeft Salomo, een van mijnen sonen vercoren, die noch ionc ende teeder is, Maer dat werck is groot. Want het en is niet

+ A vers 1

[p. 162r]

eens menschen wooninghe, maer Godts des HEEren.

2

Ick heb wt alle mijne crachten beschict totten huyse Gods, gout tot guldenen, siluer tot silueren, metael tot metalen, yser tot yseren, hout tot houtenen gereetschap. Onich steenen, inghestelde Robijnen, ende bonte steenen, ende alderhande edele gesteenten, ende marmoer steenen planteyt.

3

Daer toe, wt welbehaghen aen thuys mijns Gods, heb ick van mijnen eyghenen goede, gout ende siluer,

4

Drie M. centner gouts van Ophir ende seuen M. centner louter siluers, dat geue ick totten heylighen huyse Gods, bouen alle dat gene, dat ic daer toe beschict heb, om de wanden der huysen te ouertrecken.

5

Dattet gulden worde wat gulden, ende silueren wat silueren zijn sal, ende tot alderhande werck, door de hant der wercmeesters. Ende wie is nv vrijwillich, zijne hant heden den HEEre te vullen?

6

⁺ Doen werden de Vorsten der vaders, de Vorsten der stammen Israels, de Vorsten ouer duysent, ende ouer hondert, ende de Vorsten ouer des Conincx wercken, vrijwillich.

+ B vers 6

7

Ende gauen totten dienst inden huyse Gods, vijf M. centner gouts, ende thien M. gulden, ende thien M. centner siluers, aththien M. centner metaels, ende hondert M. centner ysers.

8

Ende by wien dat steenen geuonden werden, die gauen sy totten schat des huys des HEEren, onder de hant Iehiel des Gersoniters.

9

Ende dat volck was vrolijc, dat sy vrijwillich waren. Want sy gauent van geheelder herten den HEEre vrijwillichlijck.

10

Ende Dauid de Coninc verblijde hem oock hoochlijc, ende loefde God, ende sprack voor de geheele gemeynte: Geloeft zijt ghy HEEre Godt Israel onses vaders eewelijc,

11

V behoort de maiesteyt ende gewelt, heerlijcheyt, ouerwinninge ende danck.^* Want alle wat in Hemel ende op Aerde is, dat is uwe. V is dat Rijck, ende ghy zijt verhoocht ouer alle dinck totten Ouersten.

* Psal. 24.a.1. 1.Cor. 10.e.26. Exod. 19.a.5.

12

⁺ V is rijcdom, ende eere, voor v. Ghy heerschapt ouer alle dinc, in uwer handt staet alle^† cracht ende macht, ende in uwer hant staet het, elcken groot ende sterck te maken.

+ C vers 12

† 2.Par. 20.a.6

13

Nv onse Godt, wy dancken v, ende beroemen den Naem uwer heerlijcheyt.

14

Want wat ben ic? Wat is mijn volc? Dat wy de cracht souden vermogen vrijwillichlijck te geuen, gelijck het nv gheschiet? Want van v ist altemael gecomen, ende van uwer hant hebben wijt v gegeuen.

15

^† Want wy zijn vreemdelingen ende gasten voor v, ghelijck onse Vaders alle.

† Gene. 15.c.13. 47.b.9.

16

^* Ons leuen op Aerden is als een schaduwe, ende daer en is gheen ophouden. HEEre onse Godt, Al desen hoop die wy gheschict hebben v een huys te timmeren, uwen heyligen Naem, die is van uwer hant ghecomen, ende is altemael uwe.

* Sap. 2.b.5. 5.b.9. Ps. 144.a.4. Iob. 8.a.9.

17

Ick wetet mijn God, dat ghy dat herte proeft ende oprechticheyt is v aenghenaem. Daerom heb ick dit al wt oprechter herten vrijwillichlijck gegeuen, ende hebbe nv met blijschappen gesien v volc dat hier voor handen is, dat het v vrijwillichlijck ghegheuen heeft.

18

HEEre God onser vaderen, Abraham, Isaac ende Israels, bewaert eewelijck sulcken sin ende ghedachten int herte ws volcx, ende schict haer herten tot v.

19

⁺ Ende mijnen sone Salomo, gheeft een volcomen herte, dat hy houde uwe geboden, ende ghetuychenisse, ende rechten, dat hijt altemael doe, ende timmere dese Woninghe, daer ick alle dinck toe gheschict heb.

+ D vers 19

20

Ende Dauid sprac totter geheelder ghemeynten: Louet den HEEre uwen God. Ende de gheheele ghemeynte loefde den HEEre, den God haerder Vaderen. Ende neychden hen, ende aenbaden den HEEre, ende den Coninck,

21

Ende offerden den HEEre offer. Ende des anderen morgens, offerden sy Brandtoffer, duysent Ossen, duysent Rammen, duysent Lammeren, met haren Drancofferen, ende daer offerden planteyt onder dat geheele Israel.

22

Ende aten, ende droncken inden seluen dage, voor den HEEre, met grooter blijschappen.

Ende maecten Salomo den sone Dauid anderwerf Coninck, ende salfden hem den HEEre tot eenen Vorst^* ende Sadok tot eenen Priester.

* 3.Reg. 2.f.35

23

^+† Also sat Salomo op den stoel des HEEren, een Coninc in zijns Vaders Dauids plaetse, ende werdt gheluckich. Ende gheheel Israel was hem gehoorsaem,

+ E vers 23

† 3.Re. 2.b.12.

24

Ende alle Ouerste ende machtighe. Oock alle kinderen des Conincx Dauids, gauen hen onder den Coninc Salomo.

25

Ende de HEEre maecte Salomo altoos grooter voor dat gheheele Israel, ende^† gaf hem een loflijck Conincrijck, dat niemant voor hem ouer Israel sulck een gehadt en hadde.

† 3.Reg. 4.

26

So is nv Dauid de sone Isai Coninc gheweest ouer alle Israel. Ende die tijt dat hy Coninck gheweest is ouer Israel, is veertich Iaer. Te Hebron regeerde hy seuen Iaer, ende tot Ierusalem driendertich Iaer.

27

Ende sterf in goeden ouderdom, vol leuens, rijcdoms ende eeren. Ende zijn soon Salomo wert Coninck in zijn plaetse.

28

De geschiedenissen des Conincx Dauids, beide de eerste ende de laetste, siet, die zijn gheschreuen onder de gheschiedenissen Samuels des sienders, ende onder de geschiedenissen des Propheten Nathan, ende onder de gheschiedenissen Gad des Sienders,

29

Met allen zijnen Conincrijcke, macht, ende tijden, die onder hem verloopen zijn, beyde ouer Israel, ende allen Coninckrijcken in den Landen.

¶ Eynde des eersten Boecx der Cronijcken.