Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxix. Capittel.

¶ Dauids redene tot den Hooftlieden wort hier beschreuen, ende totten volcke, ende Salomon zijnen sone.

1

⁺ ENde Dauidt vergaderde tot Ierusalem alle Ouerste Israel, te weten, de Vorsten der stammen, de Vorsten der ordinen, die des Conincx waer namen, de Vorsten ouer duysent, ende ouer hondert, de Vorsten ouer de goeden, ende dat vee des Conincx, ende zijnder sonen, metten Camerlinghen, de crijchslieden, ende alle redelijcke mannen.

+ A vers 1

2

Ende Dauid de Coninck stont op zijn voeten, ende sprack: Hoort my mijne broeders ende mijn volck:^* Ick had voor my genomen een Huys te timmeren, daer de Arcke des verbonts des HEEren in rusten soude, ende een voetscabel den voete ons Gods, ende hadde my geschict te timmeren.

* 2.Reg. 7.a.1.

3

Maer God dede my seggen:^† Ghy en sult mijnen Naem geen huys timmeren. Want ghy zijt een Oorloochs man, ende hebt bloet ghestort.

† 3.Reg. 5.a.3. 1.Par. 23.b.7.

4

⁺ Nv^* heeft de HEERE de God Israels my vercoren, wt mijns vaders gheheele huys, dat ick een Coninc ouer Israel zijn soude eewelijck: Want hy heeft^† Iuda vercoren tot een Vorstendom, ende inden huyse Iuda mijns vaders huys, ende onder mijns vaders kinderen, heeft hy een welbehagen aen my gehadt, dat hy my ouer tgeheel Israel Coninck maecte.

+ B vers 4

* 1.Reg. 16.c.13.

† Gen. 49.b.8. 1.Par. 6.a.2.

5

Ende onder alle mijne sonen (want de HEEre heeft my veel sonen ghegeuen) heeft hy mijnen sone Salomo vercoren, dat hy sitten sal opten stoel des Conincrijcx des HEEren ouer Israel.

6

Ende heeft my gheseyt:^† V sone Salomo sal mijn huys ende hof timmeren. Want ic hebbe hem my vercoren tot eenen sone. Ende ick wil zijn vader zijn,

† 1.Pa. 18.b.12. 2.Par. 6.b.9. 2.Reg. 7.c.13.

7

Ende wil zijn Coninckrijck beuestighen eewelijck: Ist dat hy neersticheyt doen sal, dat hy doe na mijne geboden ende rechten, ghelijct heden staet.

8

Nv voor dat gheheel Israel der gheheelder gemeynten des HEEren, ende voor de ooren ons Gods, so houdet, ende soect alle de gheboden des HEEren ws Gods, op dat ghy besit dat goede Lant, ende beeruet op uwe kinderen na v eewelijc.

9

⁺ Ende ghy mijn sone Salomo, bekent den Godt ws vaders, ende dient hem met geheelder herten, ende met eender williger sielen.^* Want de HEEre ondersoect alle herten, ende verstaet dat voortstel alre gedachten.^† Ist dat ghy hem soect, soo zult ghy hem vinden: Maer verlaet ghy hem so sal hy v verwerpen eewelijck.

+ C vers 9

* Iere. 17.b.10 Psal. 7.b.10. Apoc. 2.d.23.

† Mat. 7.b.7. 2.Para. 15.a.2

10

Dus siet nv toe. Want de HEEre heeft v vercoren, dat ghy een huys sout timmeren tot eenen heylichdom. Hebt eenen goeden moet, ende bereytet.

11

Ende Dauid gaf zijnen soon Salomo een^* voorbeelt des^† portaels, ende zijns huys, ende der Cameren, ende salen, ende cameren daer binnen in, ende des huys des ghenaden stoels.

* Beworp.

† Voorhuys.

12

Daer toe voorbeelden, alle dies, dat hy in zijn ghemoet hadde, te weten, des hofs aen den huyse des HEEren, ende aller Cameren rontom, des schats der geheylichden,

13

De ordinancie der Priesteren ende Leuiten, ende alle der wercken der officien, inden huyse des HEEREN,

14

⁺ Gout, nae dat goudt ghewichte tot alderley vaten eens yegelijcx officijs, ende alderhande silueren gereetschap, na dat ghewichte tot alderley vaten, elcx officijs.

+ D vers 14

15

Ende gout tot gulden Candelaren ende gulden Lampen, elcken Candelaer ende zijnder lampen zijn ghewichte. Also oock tot silueren candelaers gaf hy dat siluer totten candelaer, ende zijnder lampen, na den eysch eens yeghelijcx candelaers.

16

Oock gaf hy gout tot tafelen der thoonbrooden, tot elcker tafelen haer gewichte. Also ooc siluer tot silueren tafelen.

17

Ende louter gout tot crauwelen, beckens, ende cannen. Ende tot gulden bekeren, elcken beker zijn gewichte. Ende tot silueren bekeren, elcken beker zijn ghewichte.

18

Ende tot eenen roockAltaer zijn gewichte, dat alder louterste gout. Oock een voorbeelt des wagens, der gulden Cherubim, dat sy hen wtbreyden ende bedecken souden bouen de Arcke des verbonts des HEEren.

19

⁺ Tis my altemael beschreuen ghegeuen vander hant des HEEren, dattet my onderwijsen soude alle de wercken des voorbeelts.

+ E vers 19

20

Ende Dauid sprac tot zijnen sone Salomo: Weest vrijmoedich, ende hebt eenen goeden moet ende bereytet. En vreest, noch en verslaet v niet, Godt de HEERE, mijn Godt, sal met v zijn, ende en sal de hant niet af trecken noch v verlaten, tot dat ghi alle wercken totten dienste inden huyse des HEEren voleyndet.

21

Siet daer, de ordinancie der Priesteren, ende Leuiten tot allen officien inden huyse Gods, zijn met v tot allen wercken, ende zijn willich, ende wijs tot alle officien. Daer toe de Vorsten, ende alle dat volck tot allen uwen handelen.