Den Bibel, Inhoudende dat Oude ende Nieuwe Testament (Biestkensbijbel)

Dat xxj. Capittel.

¶ Van sommige oorlogen die Dauid eerlijcken gewan.

1

⁺ ENde doen dat iaer om was,^† ter tijt als de Coninghen wt trocken, voerde Ioab de heyrcracht, ende verderf der kinderen Ammons Lant, quam ende belegerde Rabba. Maer Dauid bleef te Ierusalem.^† Ende Ioab sloech Rabba, ende brackse.

+ A vers 1

† 2.Re. 11.a.1.

† 2.Re. 12.f.27.

2

Ende Dauid nam de croone haers Conincx van zijnen hoofde, ende vant aen haer een centener gouts swaer, ende edel ghesteenten. Ende sy wert Dauid op zijn hooft gheset.

3

Oock voerde hy seer veel roofs wt der stadt.^† Maer dat volck daer binnen leydde hy wt, ende deyldese met saghen ende ijseren haken, ende beytels. Also dede Dauid alle den steden der kinderen Ammon. Ende Dauid trock metten volcke weder nae Ierusalem.

† 2.Reg. 12.f.31.

4

^† Daer na verhief hem eenen strijt te Gaser, teghen de Philisteen. Doen ter tijt sloech Sibechai de Husathite den Sibai, die vanden kinderen der Ruesen was, ende vernederde hem.

† 2.Re. 21.e.18.

5

Ende daer verhief noch eenen strijt teghen de Philisteen. Doen sloech Elhanan de sone Iair, Lahemi den broeder Goliath den Gatither, Welc eenen spiesstaf hadde als eenen weefboom.

6

Noch eens wert eenen strijt te Gath. Daer was een groot man die hadde ses vingeren ende ses theenen, die maken vierentwintich. Ende hy was ooc vanden Ruesen gheboren,

7

Ende beschimpte Israel. Maer Ionathan de sone Simea des broeders Dauids, sloech hem. Dese waren geboren vande Ruesen te Gath, ende vielen door de hant Dauids, ende zijnder knechten.