Den Bibel, Inhoudende dat Oude ende Nieuwe Testament (Biestkensbijbel)

¶ Dat xix. Capittel.

¶ Dauid bestrijt zijne omligghende Vianden.

1

⁺ NA desen^* sloech Dauid de Philisteen, ende verootmoedichdese, ende nam Gath ende hare dochteren wt der Philisteen hant.

+ A vers 1

* 2.Reg. 8.a.1.

2

Oock sloech hy de^† Moabiten,^* also dat de Moabiten Dauid onderdanich werden, ende ghiften brachten.

† Num. 24.c.17

* 4.Re. 1.a.4 3.a.5.

3

Hy sloech oock HadadEser den Coninc tot Soba in Hemath, doen hi wech trock om zijn Teeken op te rechten aent water Phrath.

4

Ende Dauid wan hem duysent waghens af, seuen duysent Ruyters, ende twintich duysent mannen te voet. Ende Dauid verleemde alle waghens, ende hielt hondert wagens ouer.

5

Ende de Siriers van Damasco quamen dien HadadEser den Coninck te Soba te helpen. Maer Dauid sloech dier seluer Siriers tweentwintich duysent mannen.

6

Ende leyde volck tot Damascon in Sirien, dat de Siriers Dauid onderdanich souden worden, ende hem gauen souden brengen. Want de HEEre halp Dauid waer hy henen trock.

7

^† Ende Dauid nam de gulden schilden, die HadadEsers knechten hadden, ende brachtse te Ierusalem.

† Iudit. 16.d.23

8

⁺ Ooc nam Dauid wt den steden HadadEsers, Tibehath ende Chun, seer veel metaels.^* Waer af Salomo de metalen zee ende Columnen ende metalen vaten maecte.

+ B vers 8

* 3.Reg. 7.c.15.d.23.

9

^† Ende doen Thogu en Coninc tot Hemath hoorde, dat Dauid alle de macht HadadEsers des Conincx tot Soba geslagen hadde,

† 2.Re. 8.b.9.

10

Seynde hy zijnen sone Hadoran totten Coninc Dauid, ende dede hem groeten, ende seghenen, dat hy tegen HadadEser gestreden ende hem gheslaghen hadde. Want Thogu hadde een oorloge tegen HadadEser.

11

Ooc heylichde de Coninc Dauid den HEEre, alle gulden, silueren, ende metalen vaten, met den siluere ende goude, dat hy den Heydenen genomen hadde, te weten, den Edomiten, Moabiten, Ammoniten, Philisteen, ende Amalekiten.

12

⁺ Ende Abisai de sone Seruia, sloech der Edomiten int soutdal^† achthien duysent.

+ C vers 12

† 2.Re. 8.e.13.

13

Ende^* leyde volck in Edomea, dat alle Edomiten Dauid onderdanich waren, want de HEEre halp Dauid werwaerts hy reysde.

* Gen. 25.c.22. Nu. 24.d.18.

14

Alsoo regeerde Dauid ouer dat gheheele Israel, ende onderhielt oordeel ende gherechticheyt alle zijnen volcke.

15

^† Ioab de sone Seruia, was ouer dat heyr. Iosaphat de sone Ahilud was Cancellier.

† 2.Re. 20.d.23.

16

Sadok de sone Ahitob, ende AbiMelech de sone Abiathar waren Priesters. Sawsa was Schrijuer.

17

^† Benaia de sone Ioiada, was ouer de Chrethi ende Plethi. Ende de yerste sonen Dauids waren den Coninck ter hant.

† 2.Re. 8.c.18.