Den Bibel, Inhoudende dat Oude ende Nieuwe Testament (Biestkensbijbel)

¶ Dat xviij. Capittel.

¶ Hoe Dauid voor hem nam den Tempel te timmeren. Ende hoe hem dat van God den HEEre verboden wert.

1

⁺ HEt gheuiel doen^† Dauid in zijn huys woonde, sprac hy totten Propheet Nathan: Siet, ick woone in een Cederen huys, ende de Arcke des verbonts des HEEren is onder de Tapijten.

+ A vers 1

† 2.Reg. 7.a.1.

2

Nathan sprac tot Dauid:^* Al wat in uwer herten is, dat doet, want Godt is met v.

* 1.Reg. 10.b.7.

3

Maer inder seluer nacht, quam dat woort Gods tot Nathan, ende sprac:

4

Gaet henen, ende segt Dauid mijnen knecht: Dus spreect de HEEre: Ghi en sult my gheen huys timmeren tot eender Wooninghen.

5

Want ick en heb in gheenen huyse gewoont, van dien dage aen doen ick de kinderen Israels wt voerde, tot op desen dach. Maer ic ben geweest so waer de Hutte geweest is, ende de wooninge.

6

Waer ick gewandelt hebbe in geheel Israel. Heb ick oock tot eenige vanden rechters in Israel oyt gheseyt, dien ic gebode te voeden mijn volc ende gesproken: Waerom en timmert ghi my niet een Cederen huys?

7

Dus spreect nv aldus tot mijnen knecht Dauid: Dus seyt de HEEre Sebaoth:⁺ Ic heb v genomen vander Weyden achter de schapen, dat ghy een Vorst sout zijn ouer mijn volck Israels,

+ B vers 7

8

Ende ben met v gheweest, werwaerts ghy henen ghegaen zijt. Ende hebbe uwe Vianden wtgheroyt voor v, ende hebbe v eenen name gemaect, als de groote opter Aerden eenen naem hebben.

9

Maer ick wil mijn volc Israel een stede setten, ende wilt planten, dat het aldaer woonen sal, ende niet meer beweecht worden.^† Ende de kinderen der boosheyt en sullent niet meer crencken, als te voren,

† Mat. 16.c.18.

10

Ende inden tijden doen ic Rechteren ouer mijn volc Israels ordineerde. Ende ic wil alle uwe Vianden verootmoedigen, ende vercondighen v, dat de HEEre v een huys timmeren wil.

11

^* Maer als uwe daghen wt zijn, dat

* 2.Reg. 7.c.12. Psal. 132.b.11.

[p. 158r]

ghi wech gaet tot uwen Vaderen, so wil ick v saet nae v verwecken, dat uwer sonen een sal zijn.

12

^† Dien wil ick zijn Conincrijc beuestigen^* die sal my een huys timmeren, ende ick wil zijnen stoel beuestigen eewelijc.

† Iere. 33.c.17.

* 1.Pa. 29.b.6

13

Ic wil zijn^* vader zijn, ende hy sal mijn sone zijn. Ende ick en wil mijn ontfermherticheyt niet van hem keeren^* gelijc ickse van dien gekeert heb, die voor v was.

* Hebr. 1.b.5.

* 1.Reg. 15.e.23.

14

Maer ic wil hem setten in mijn huys, ende in mijn Conincrijc eewelijc, dat zijnen stoel stantuastich sy eewelijc.

15

⁺ Ende doen Nathan na alle dese woorden ende ghesichte met Dauid sprack,

+ C vers 15

16

Quam de Coninc Dauid, ende stelde hem voor den HEEre, ende sprack: Wie ben ic HEEre God? Ende wat is mijn huys, dat ghy my tot hier toe ghebracht hebt?

17

Ende dat heeft v noch te weynich ghedocht, Godt. Maer hebt ouer dat huys ws knechts noch van verren toecomenden ghesproken. Ende ghy hebt my aengesien, ghelijck inder ghedaente eens menschen, die inder hoochte God de HEEre is.

18

Wat sal Dauid meer tot v seggen, dat ghy uwen knecht so heerlijc maket?

19

Ghi kent uwen knecht, HEEre om ws knechts wille na uwer herten, hebdy alsodanige groote dingen gedaen, dat ghy cont sout doen alle heerlijcheyt.

20

HEEre ws ghelijck en is niet^† ende daer en is gheen God dan alleen ghy, van welcken wy met onsen ooren ghehoort hebben.

† Deut. 32.f.39.

21

Ende^* waer is een volc op Aerden, gelijc v volc Israel, daer een God toe ghegaen is, om hem een volc te verlossen, ende hem seluen eenen naem te maken van grooten ende veruaerlijcken dinghen, Heydenen voor uwe volc wt te stooten, dat ghi wt Egipten verlost hebt.

* Deut. 4.a.7. 2.Reg. 7.d.23.

22

Ende hebt v, uwe volck Israel tot eenen volcke ghemaect eewelijck, ende ghy HEEre zijt haer God geworden.

23

⁺ Nv HEEre dat woort dat ghy gesproken hebt ouer uwen knecht, ende ouer zijn huys, worde warachtich eewelijck, ende doet also ghy gesproken hebt.

+ D vers 23

24

Ende uwen Name worde waerachtich ende groot eewelijck, op datmen segghe: De HEEre Sebaoth de Godt Israels, is Godt in Israel, ende dat huys ws knechts Dauids sy stantuastich voor v.

25

Want ghy HEEre hebt de oore ws knechts geopent, dat ghy hem een huys timmeren wilt. Daerom heeft v knecht geuonden, dat hy voor v soude bidden.

26

Nv HEEre ghy zijt God, ende hebt sulck goet uwen knecht ghesproken,

27

Nv beghint te segenen dat huys ws knechts, dattet voor v eewelijc sy: Want wat ghi HEEre segent, dat is gheseghent eewelijck.