Den Bibel, Inhoudende dat Oude ende Nieuwe Testament (Biestkensbijbel)

¶ Dat .xvij. Capittel.

¶ Hoe Dauid de Arcke op haer plaetse sette, met vruechden, offerhanden ende lofsanghen.

1

⁺ ENde^* doen sy de Arcke Godts in brachten, stelden sise in de Hutte die haer Dauid opgherecht hadde. Ende offerden Brantofferen ende Dancofferen voor Gode.

+ A vers 1

* 2.Reg. 6.d.16

2

Ende doen Dauid de Brantofferen ende Dancofferen volbracht hadde, seghende hy dat volc inden Naem des HEEren.

3

^† Ende deylde wt eenen yegelijcken in Israel, beyde mannen ende vrouwen, een ghewicht broots, een stuc vleesch, ende een flessche wijns.

† 2.Reg. 6.d.18.

4

Ende hy stelde voor de Arcke des HEEren sommige Leuiten tot dienaers dat si den HEEre den God Israels, prijsen, dancken ende louen souden, te weten,

5

Assaph den eersten, Sacharia den anderen, Ieiel, Semiramoth, Iehiel, Mathithia, Eliab, Benaia, ObedEdom, ende Ieiel met Psalteren ende Herpen: Maer Assaph met hellen Cymbalen.

6

Benaia ende Iehasiel de Priesteren, met Trompetten, altoos voor de Arcke des verbonts Godts.

7

⁺ In die tijt bestelde Dauid ten eersten den HEEre te dancken, door Assaph ende sine broeders.

+ B vers 7

8

^† Dancket den HEEre, predict sinen Name, maect condich onder den volcken, zijn doen.

† Psal. 105.a.1. Esaie. 12.a.4.

9

Singhet, spelet, ende dichtet hem, van allen sinen wonderlijckheden.

10

Looft sinen heyligen Name, Dat herte der gheenre, die den HEEre soecken, verblijde hem.

11

Vraghet nae den HEEre ende nae sine macht, soect zijn aensicht altijt.

12

Ghedenct zijnder wonderlijcheden, die hy gedaen heeft, zijnder wonderlijcheden

[p. 157v]

ende zijns woorts.

13

Ghy, dat saet Israels zijns knechts, ghi kinderen Iacobs zijns wtuercorens.

14

Hy is de HEEre onse God, hy oordeelt ouer de geheele werelt.

15

⁺ Ghedenct eewelijck zijns verbonts, dat hy geloeft heeft, in duysent geslachten.

+ C vers 15

16

⁺ Dat hy gemaect heeft met Abraham, ende zijns eedts met Isaac.

+ ‡ Gene. 22.c.16.

17

^* Ende hy steldet Iacob tot eenen rechte: Ende Israel tot een eewich verbont.

* Genes. 26.a.3.

18

^* Ende sprack: Ick wil v dat Lant Canaan geuen, dat Lot ws erfdeels.

* Gene. 28.c.13.

19

Doen sy noch weynich ende cleyne waren: Ende vreemdelingen daer in.

20

Ende sy trocken vanden eenen volcke totten anderen, Ende wt den eenen Conincrijcke totten anderen volcke.

21

Hy en liet hen niemant schade doen, ende strafte Coninghen om haren wille.

22

En^† tast mijne gesalfde niet aen, ende en doet niet quaets mijnen Propheten.

† Psa. 105.b.15.

23

^† Singhet den HEEre alle lant, vercondighet daghelijcx zijn Heyl.

† Psal. 96.a.1.

24

Vertelt onder de Heydenen zijn heerlijcheyt: Ende onder den Volcken zijn wonderlijcheden.

25

Want de HEEre is groot ende wtermaten loflijck, ende heerlijck bouen alle ander Goden.

26

Want alle de Goden der Heidenen zijn afgoden.^† Maer de HEEre heeft den Hemel gemaect.

† Gene. 1.a.1. Psa. 146.a.6

27

⁺ Het staet heerlijc ende chierlijck voor hem. Ende gaet geweldich ende vrolijck toe, in zijn plaetse.

+ D vers 27

28

Gheeft herwaerts den HEEre ghy Volcken: Gheeft herwaerts den HEEre, eere ende cracht.

29

Gheeft herwaerts des HEEREN Naem de eere, brenghet ghiften, ende coemt voor hem, ende aenbidt den HEEre in heylige chieragie.

30

De gantsche werelt vreese hem, Hy heeft den Aertbodem bereyt dat hy niet beweecht en wort.

31

Den Hemel verblijde hem, ende de Aerde sy vrolijck. Ende men segghe onder de Heydenen, dat de HEEre regeert.

32

De See bruyssche, ende wat daer in is: Ende dat velt sy vrolijc, ende alle wat daer op is.

33

Ende laet Iuychen alle boomen in dat wout voor den HEEre: Want hy coemt om te oordeelen de Aerde.

34

Danct den HEEre, want hi is vriendelijck: Ende zijn ontfermherticheyt dueret eewelijck.

35

Ende segt: Helpt ons God onse Heylant, ende vergadert ons, ende verlost ons wt den Heydenen, op dat wy uwen heyligen Naem dancken, ende dy Lof seggen.

36

Geloeft sy de HEEre de God Israels, van eewicheyt tot eewicheyt. Ende alle dat volck segghe: Amen, ende loue den HEEre.

37

⁺ Aldus liet hy aldaer voor de Arcke des verbonts des HEEren, Assaph ende zijn broeders, om te dienen voor de Arcke altijt, elcken dach zijn dachwerck.

+ E vers 37

38

Maer ObedEdom ende haer broeders achtensestich, ende ObedEdom den sone Iedithun, ende Hossa tot Poortiers.

39

Ende Sadok den Priester ende zijne broeders, die Priesters, liet hy voor de Wooninghe des HEEren, opter Hoochten, tot Gibeon,

40

Dat sy den HEEre daghelijcx Brantoffer souden doen, op den Brantoffers Altaer, des Morgens ende des Auonts^† so in de Wet des HEEren gheschreuen staet, die hy aen Israel gheboden heeft.

† Exo. 29.g.38. Nume. 28.a.3.

41

Ende met hen Heman ende Iedithun, ende de ander wtuercorene, die met namen ghenoemt waren, om den HEEre te dancken, dat zijne ontfermherticheyt eewelijck duert.

42

Ende met hen Heman ende Iedithun met Trompetten ende Cymbalen te clincken, ende met snarenspelen Gods. Maer de kinderen Iedithun maecte hy Poortwachters.

43

Also troc alle dat volck weder henen, elck in zijn huys. Ende Dauid keerde oock wederom, zijn huys te seghenen.