Den Bibel, Inhoudende dat Oude ende Nieuwe Testament (Biestkensbijbel)

¶ Dat .xv. Capittel.

¶ Hoe dat Hiram de Coninc, Dauid den Coninck hout sant, Ende hoe veel huysvrouwen dat Dauid nam. Ende hoe de Philisteen tegen hem streden, ende hoe hyse verwint.

1

⁺ ENde^* Hiram de Coninc tot Tyro, seynde boden tot Dauid, ende Cederen hout, Metsers, ende Timmerlieden, dat sy hem een huys souden timmeren.

+ A vers 1

* 2.Reg. 5.c.11.

2

Ende Dauid mercte, dat hem de HEEre tot eenen Coninc ouer Israel beuesticht had. Want zijn Coninckrijck clam op, om zijns volcx Israels wille.

3

Ende Dauid nam noch meer Wijuen tot Ierusalem, ende wan noch meer sonen ende dochteren.

4

Ende die hem tot Ierusalem geboren werden, die hieten also: Sammua, Sobab, Nathan, Salomo,

5

Iebehar, Elisua, Elipalet,

6

Noga, Nepheg, Iaphia,

7

Elizamma, BaelIada, Eliphaleth.

8

Ende doen de Philisteen hoorden, dat Dauid tot eenen Coninck ghesalft was ouer dat geheele Israel, trocken si alle op om Dauid te soecken.⁺ Doen dat Dauid hoorde, trock hy wt teghen hen.

+ B vers 8

9

Ende de Philisteen quamen, ende leyden hen neder inden^† gronde Rephaim.

† Valleye.

10

Maer^* Dauid vraechde Godt ende sprac: Sal ick op trecken teghen de Philisteen, ende wildyse in mijne hant geuen? De HEEre seyde tot hem: Trect op, ick hebse in uwen handen ghegheuen.

* 2.Re. 5.d.15 1.Reg. 23.a.2. 30.b.8. 3.Reg. 22.a.6.

11

Ende doen si op trocken nae BaalPrazim, sloechse Dauid aldaer. Ende Dauid sprack: Godt heeft mijne Vianden door mijne hant van malcanderen gheschuert, soo hem dat water van malcanderen schuert. Daer af hieten sy de plaetse BaalPrazim.

12

Ende si lieten hare goden aldaer:^† Doen hietse Dauid met vier verbernen.

† Deut. 7.a.5.

13

^+* Maer de Philisteen maeckten hen daer weder aen, ende leyden hen neder inden gronde.

+ C vers 13

* 2.Reg. 5.d.22.

14

Ende Dauid vraechde Gode noch eens. Ende Godt sprack tot hem: Ghy en sult niet op trecken achter hen. Maer wijckt van hen, dat ghy aen hen coemt tegen de Moerbesienboomen ouer.

15

Als ghy dan dat ruysschen bouen op de Moerbesienboomen sult hooren gaen, so coemt daer wt totten strijde, Want God is dan voor v wtgetrocken, om der Philisteen Heyr te slaen.

16

Ende Dauid dede, soo hem Godt beuolen hadde. Ende si sloeghen dat Heyr der Philisteen, van Gibeon aen, tot Gaser toe.

17

Ende Dauids naem brack wt in allen landen. Ende de HEEre liet sine vreese ouer alle Heydenen comen.