Den Bibel, Inhoudende dat Oude ende Nieuwe Testament (Biestkensbijbel)

¶ Dat .xiiij. Capittel.

¶ Hoe dat de ouerghebleuen geslachten gheroepen worden, ende hoe dat si de Arcke wech voerden.

1

⁺ ENde Dauid hielt eenen raet^* metten hooftlieden, ouer duysent, ende ouer hondert, ende met allen Vorsten,

+ A vers 1

* 2.Reg. 6.a.1.

2

Ende sprack totter geheelder gemeynten Israels: Behaghet v, ende ist vanden HEEre onsen God, soo laet ons ouer al wt seynden tot onsen anderen broederen, in alle den Lande Israels, ende met hen de Priesters ende Leuiten in die steden, Daer si voorsteden hebben, dat si tot ons vergadert worden.

3

Ende laet ons de Arcke ons Godts, weder halen tot ons. Want byden tijden Sauls en vraechden wy niet nae haer.

4

Doen seyde de gheheele ghemeynte: Men soude alsoo doen, want sulcx behaechde alle den volcke wel.

5

Also vergaderde Dauid dat gheheele Israel, van Sihor Egipti aen, tot datmen coemt tot Hemath, om de Arcke Godts te halen van KiriatIearim.

6

Ende Dauid trock op met gheheel Israel^* tot KiriatIearim, welcke in Iuda leyt, op dat hy van daer op soude brenghen de Arcke Gods des HEEren, die op den Cherubim sidt, daer den Naem aengheroepen wort.

* 1.Reg. 7.a.2.

7

^+† Ende sy lieten de Arcke Godts op eenen nieuwen waghen voeren, wt den huyse Abinadab. Vsa ende sine broeders dreuen den waghen.

+ B vers 7

† 1.Reg. 6.b.7.

8

Maer Dauid ende alle Israel speelden voor God, wt geheelder macht, met Liedekens, met Herpen, met Psalteren, met Tamborinen, met Cymbalen, ende met Basuynen.

9

^* Maer doen si op de pleyne Chidon quamen, stack Vsa zijn hant wt om de Arcke te houden, want de Runderen traden ter zijden wt.

* 2.Reg. 6.b.6.

10

Doen vertoornde de gramschap des HEEren ouer Vsa, ende sloech hem om dat hy sine hant wt hadde ghesteken aen de Arcke, alsoo dat hy aldaer sterf voor Godt.

11

Doen wert Dauid bedroeft, om dat de HEEre een soodanighen schuere dede aen Vsa, ende hiet de plaetse PerezVsa, tot op desen dach toe.

12

Ende Dauid vreesde hem voor Gode in dien daghe, ende sprack: Hoe sal ick de Arcke Godts tot my ghebrenghen?

13

Daerom en liet hy de Arcke Godts niet tot hem brengen inde stadt Dauids, maer hy keerdese int huys ObedEdom des Gethiters.

14

^* Also bleef de Arcke Gods by ObedEdom in sinen huyse drie maenden lanc. Ende de HEERE seghende dat huys ObedEdom, ende alle wat hy hadde.

* 2.Reg. 6.b.10