Den Bibel, Inhoudende dat Oude ende Nieuwe Testament (Biestkensbijbel)

¶ Dat .xiij. Capittel.

¶ Van Dauids vroome mannen oft Ruesen, ende hoe veel dat dier zijn geweest, die wt alle gheslachten tot hem ghecomen zijn.

1

⁺ OOc quamen dese tot Dauid te Siklak,^† doen hy noch ghesloten was, voor Saul den sone Kis. Ende sy waren oock onder de Helden, die totten strijt holpen,

+ A vers 1

† 1.Reg. 27.a.1.

2

Ende met Boghen gheschict waren tot beyden handen, op steenen, op Pijlen ende Boghen. Vanden Broederen Sauls, die wt BenIamin waren:

3

De principaelste Ahieser ende Ioas de kinderen Samaa, des Gibeathiters. Iesiel ende Pelet de kinderen Asmaueth. Baracha ende Iehu de Anthothiter.

4

Iesmaia de Gibeonite, machtich onder dertighen ende ouer dertighen. Ieremia, IaHesiel, Ionathan, Iosabad de Gederathiter.

5

Eleusai, Ieremoth, Bealia, Samaria, Saphatia, de Harophite.

6

Elkana, Iesia, Asareel, Ioeser, Iasabeam de Korhiter.

7

Ioela, ende Sabadia, de kinderen Ieroham van Gedor.

8

Vanden Gadditen scheyden hen wt, tot Dauid, inde Borcht inder woestijnen, stercke Helden ende Crijchslieden, die schilt ende spiessen voerden, ende haer aenghesicht ghelijck der Leeuwen, ende snel als de Rheen op de bergen.

9

⁺ De eerste, Eser, de ander Obadia, De derde Eliab,

+ B vers 9

10

De vierde Masmamna, De vijfste Ieremia,

11

De seste Athai, De seuenste Eliel,

12

De achtste Iohanan, De negenste Elsabad,

13

De thiende Ieremia, De elfste Machbanai.

14

Dese waren vanden kinderen Gad hoofden int Heyr, de cleynste ouer hondert, ende de grootste ouer duysent.

15

Dese zijnt die ouer de Iordane ghingen inder eerster maent, doen hy vol was aen beyden Oeueren, dat alle gronden effen waren, beyde teghent Oosten ende teghent Westen.

16

Daer quamender oock sommige vanden kinderen BenIamin ende Iuda, tot der borchten Dauids.

17

Maer Dauid ghinck tot hen wt, ende antwoorde ende sprac tot hen: Ist dat ghi in vreden tot my coemt, ende om my te helpen, so sal mijn herte met v zijn. Maer coemt ghy op liste, ende om my teghen te zijn, daer doch gheen boosheydt aen my en is, Soo sie de Godt onser vaderen daer in, ende straffe dat.

18

⁺ Maer de geest trock aen Amasai den Hooftman onder dertighen, ende sprack: V zijn wy Dauid, ende met v houden wijt, ghy sone Isai. Vrede, vrede sy met v, vrede sy met uwen hulperen, Want v God helpet v. Doen namse Dauid aen, ende settese tot hoofden ouer de Crijschlieden.

+ C vers 18

19

Ende van Manasse vielen sommige tot Dauid, doen hy quam metten Philisteen teghen Saul totten strijde, ende en holp hem niet.^† Want de Vorsten der Philisteen lietense met raet van hen, ende seyden: Waert dat hy tot sinen Heere Saul viel, soo mocht het ons onsen hals costen.

† 1.Reg. 29.a.4

20

Doen hy nv na^† Siklag trock, vielen tot hem van Manasse, Adna, Iosabad, Iediael, Michael, Iosadad, Elihu, Silthai, hoofden ouer duysent in Manasse.

† 1.Reg. 30.a.1.

21

Ende si holpen Dauid tegen de Crijschlieden, Want sy waren altemael redelijcke Helden, ende werden Hooftlieden ouer dat Heyr.

22

Ooc quamen alle daghe sommighe tot Dauid, om hem te helpen tot dat het een groot Heyr wert, als een Heyr Godts.

23

Ende die is dat ghetal der Hoofden gewapent totten Heyr, die tot Dauid tot Hebron quamen, om dat Coninckrijck Sauls tot hem te keeren, na den woorde des HEEren.

24

⁺ Der kinderen Iuda, die Schilden ende Spiesse dronghen, waren ses duysent ende acht hondert ghewapent totten Heyr.

+ D vers 24

25

Der kinderen Simeons, redelijcke Helden totten Heyr, seuen duysent ende hondert.

26

Der kinderen Leui, vier duysent ende ses hondert.

27

Ende Ioiada, de Vorst onder dien van Aaron, met drie duysent ende seuen hondert.

28

Sadok de Ionghelinck een redelijck Helt met zijns Vaders huys tweentwintich

29

Ouersten. Der kinderen BenIamin Sauls broedere, drie duysent, want tot dier tijt toe hieldent haerder noch veel metten huyse Sauls.

30

Der kinderen Ephraims, twintich duysent ende acht hondert redelijcke Helden, ende vermaerde mannen inden huyse haerder Vaderen.

31

Des haluen stams Manasse, achthien duysent, die met name ghenoemt werden, dat si quamen ende Dauid Coninck maeckten.

32

Der kinderen Isaschars die verstandich waren, ende rieden wat Israel op elcke tijt doen soude, twee hondert Hooftlieden, ende alle hare Broeders volchden hare woorden.

33

Van Sebulon, die int Heyr trocken totten strijde gherustet, met alderhande wapene totten strijde, vijftich duysent, hen in ordinancie te schicken eendrachtelijck.

34

⁺ Van Naphthali, duysent hooftlieden, ende met hen die schilden ende spiesse voerden seuenendertich duysent.

+ E vers 34

35

Van Dan totten strijde ghewapent achtentwintich duysent, ses hondert.

36

Van Asser die int Heyr trocken gherustet totten strijde, veertich duysent.

37

Van ouer gheen zijde der Iordanen, vanden Rubeniten, Gadditen, ende den haluen stamme Manasse, met alderhande wapen totten strijde, hondert ende twintich duysent.

38

Alle dese Crijschlieden, om dat Heyr te ordineren,^† quamen van gheheelder herten tot Hebron, om Dauid Coninck te maken ouer gheheel Israel. Oock was allet ander Israel van eender herten, datmen Dauid Coninck soude maken.

† 2.Reg. 5.a.1.

29[39]

Ende waren aldaer by Dauid drie daghen, aten ende droncken. Wandt haer Broeders hadden voor hen wat bereyt.

[p. 156v]

40

Oock die de naeste rontom waren tot Isaschar toe, Sebulon ende Naphthali, die brachten broot op Ezelen, Kemelen, Muylen, ende Runderen, om te eten, Meel, Vijghen, Rosinen, Wijn, Olie, Runderen ende Schapen, planteyt, want daer was een blijschap in Israel.