Den Bibel, Inhoudende dat Oude ende Nieuwe Testament (Biestkensbijbel)

¶ Dat .xij. Capittel.

¶ Dauid wort een Coninck ghesalft. Ende van sine stercke hooftlieden.

1

⁺ ENde dat geheel Israel vergaderde hem tot Dauid, nae Hebron, ende sprack:^† Siet, wy zijn v been ende v vleesch.

+ A vers 1

† 2.Reg. 5.a.1.

2

Oock leyde ghy ons te voren wt ende in, doen Saul Coninck was, so heeft v de HEEre v Godt ghesproken: Ghy sult mijn volck Israel weyden, ende ghy sult Vorst zijn ouer mijn Volck Israel.

3

Ende alle Ouders quamen oock totten Coninck tot Hebron. Ende Dauid maecte een verbondt met hen te Hebron voor den HEEre. Ende sy salfden Dauid tot eenen Coninck ouer Israel,^* nae den woorde des HEEren door Samuel.

* 1.Reg. 16.a.1.

4

Ende Dauid troc henen, ende alle Israel nae Ierusalem (dat is Iebus) Want de Iebusiten woonden daer inden lande.

5

Ende de Borgers tot Iebus, spraken tot Dauid: Ghy en sult hier niet in comen. Mer Dauid wan de Borcht Sion, dat is Dauids stadt. Ende Dauid sprac:

6

^† Wie de Iebusiten eerst slaet, die sal een Hooft ende Ouerste zijn. Doen beclomse Ioab de sone SeruIa eerst, ende werdt een Hooftman.

† Iosue. 15.d.16 Iudic. 1.c.12. 1.Reg. 17.c.25

7

Dauid woonde op de Borcht, Daer af heetmense Dauids stadt.

8

⁺ Ende hy timmerde de stadt rontom, van Millo aen, tot altemael rontom. Ioab liet de ouerbleuene inde stadt leuen.

+ B vers 8

9

Ende Dauid voer voort ende nam toe. Ende de HEEre Sebaoth was met hem.

10

^* Dit zijn de Ouerste onder de Helden Dauids, die hen redelijck met hem hielden, in sinen Conincrijcke by gheheel Israel, datmen hem tot eenen Coninck soude maken na den woorde des HEEren ouer Israel.

* 2.Reg. 23.b.8.

11

Ende dit is dat getal der Helden Dauids: Iasabeam de sone Hachmoni, de principaelste onder den dertigen. Hy hief zijn Spies op, ende sloecher drie hondert teender reyse.

12

Na hem was Eleazar de sone Dodo, de Ahohite, ende hy was onder de drie Helden.

13

Dese was met Dauid doen si beschimpten, Ende de Philisteen hen daer vergadert hadden totten strijdt. Ende daer was een stuck Ackers vol gersten, Ende dat volck vluchte voor de Philisteen.

14

Ende si traden midden opt stuck, ende beschudden dat, ende sloeghen de Philisteen. Ende de HEERE gaf een groot^* Heyl.

* Victorie.

15

⁺ Ende de^† drie vanden dertighen principalen, trocken af totten steene tot Dauid, inde Speloncke Adullam. Maer der Philisteen leger, lach inder valleyen Rephaim.

+ C vers 15

† 2.Re. 23.b.13

16

Mer Dauid was in de borchte. Ende der Philisteen volc was op die tijt te Bethlehem.

17

Ende Dauid^† wert lustende, ende sprac: Wie wil my te drincken gheuen vanden water, wt den Put te Bethlehem, onder de Poorte?

† 2.Reg. 23.c.15.

18

Doen vielen die drie inder Philisteen Legher, ende putten van dien water, wt den Put te Bethlehem, onder de Poorte, ende droegent ende brachtent tot Dauid. Maer hy en wildes niet drincken, maer hy goot den HEEre wt, ende sprack:

19

Dat late Godt verre van my zijn, dat ic dat doen soude, ende drincken dat bloet deser mannen in haers leuens pericule. Want si hebbent met pericule haers leuens hier ghebracht, Daerom en wilde hijs niet drincken. Dat deden die drie Helden.

20

^† Abisai de broeder Ioab, die was ooc de principaelste onder den drien. Ende hy hief zijn spiesse op, ende sloech drie hondert. Ende hy was onder den drien beroemt,

† 2.Reg. 23.d.18

21

Ende hy die derde, heerlijcker dan die twee, ende was haer ouerste. Mer tot aen de drie en quam hy niet.

22

^+† Beneia de sone Ioiada, des soons Ishail, van grooten daden, van Kabzeel. Hy sloech twee Leeuwen der Moabiten. Ende ghinck af, ende sloech eenen Leeu midden inden Put, inder tijt des sneeus.

+ D vers 22

† 2.Reg. 23.d.20

23

Hy sloech ooc eenen Egypschen man, die was vijf ellen lanck, ende hadde een spiesse inder handt als eenen weefboom. Maer hy ghinck tot hem af, met eenen stoc, ende nam hem de spiesse wt der hant,^* ende doode hem met zijn eygen spiesse.

* 1.Reg. 17.g.51

24

Dat dede Benaia de sone Ioiada, ende was vermaert onder de drie Helden,

25

Ende was de heerlijcste onder dertich. Maer aen de drie en quam hy niet. Mer Dauid maeckte hem tot den heymelijcken raet.

26

De strijtbaer Helden zijn dese:^† Asael de broeder Ioabs. Elhanan de sone Dodo van Bethlehem.

† 2.Re. 23.e.24.

27

Samoth de Harorite. Helez de Pelonite.

28

Ira de sone Ekes de Thekoite. Abieser, de Antothite.

29

Sebechai de Husatite. Isai de Ahohite.

30

Maherai de Netophatite. Heled de sone Baena de Netophathite.

31

Ithai de sone Ribai, van Gibeath, der kinderen BenIamin. Benaia de Pirgatonite.

32

⁺ Hurai vander beken Gaas, Abiel, de Arbathite.

+ E vers 32

33

Asmaueth de Baherumite, Eliahba de Saalbonite.

34

De kinderen Hasem, des Gisoniters. Ionathan de sone Sage, de Harariter.

35

Ahiam de sone Sachar de Harariter. Eliphal de sone Vr.

36

Hepher de Macherathite. Ahia de Pelonite,

37

Hezro de Carmelite. Naerai de sone Asbai.

38

Ioel de Broeder Nathan. Mibehar de sone Hagri.

39

Selech de Amonite. Naherai de Berothite, de wapendragher Ioabs des soons SeruIa.

40

Ira de Iethrite. Gareb de Iethrite.

41

Vria de Hethite. Sabad de sone Ahelai.

42

Adina de sone Sisa de Rubenite, een Hooftman der Rubeniten, ende dertich waren onder hem.

43

Hanan de sone Maecha. Iosaphat de Mathonite.

44

Vsia de Asthrathite: Sama ende Iaiel, de sonen Hothan, des Aroetiters.

45

Iediael, de sone Simri. Ioha zijn broeder de Thiziter.

[p. 156r]

46

Eliel de Maheuiter. Ierebai ende Iosawia de sonen Elnaam. Iethina de Moabite.

47

Eliel, Obed, Iaesiel van Mizobaia.