Den Bibel, Inhoudende dat Oude ende Nieuwe Testament (Biestkensbijbel)

¶ Dat .xj. Capittel.

¶ Vanden strijt ende slach der Philisteen teghen Saul ende sine sonen.

1

⁺ DE Philisteen^† streden teghen Israel, ende die van Israel vluchten voor de Philisteen, ende de verslaghene vielen opten berch Gilboa:

+ A vers 1

† 1.Reg. 31.a.1.

2

Maer de Philisteen hinghen hen aen Saul, ende sine sonen, ende iaechden achter hen, ende sloeghen Ionathan, Abinadab, ende Malchisua, de sonen Sauls.

3

Ende den strijdt wert hert tegen Saul. Ende de boghen schutters, quamen aen hem, alsoo dat hy vanden schutters ghewont wert.

4

Doen sprack Saul tot sinen wapendragher:^† Trect wt v sweert, ende doorsteect my daer mede, op dat dese onbesnedene niet en comen, ende schandelijc met my om gaen. Maer zijn wapendragher en wilde niet, want hy ontsachs hem seere. Doen nam Saul zijn sweert ende viel daer in.

† Iudi. 9.h.54. 1.Reg. 30.a.4

5

Maer doen zijn wapendrager sach, dat Saul doot was, viel hy oock int sweert ende sterf.

6

Alsoo sterf Saul ende sine drie sonen,^* ende zijn gheheele huys te samen.

* 1.Par. 9.c.33. 10.e.39.

7

Maer doen de mannen die inden gronde waren, sagen, dat si gheulucht waren, ende dat Saul ende sine sonen doot waren, verlieten si hare steden ende vluchten. Ende de Philisteen quamen, ende woonden daer in.

8

^+* Des anderen morghens quamen de Philisteen, om de verslaghene wt te trecken, ende vonden Saul ende sine sonen ligghen op den Berch Gilboa.

+ B vers 8

* 1.Reg. 31.b.8.

9

Ende trocken hem wt ende namen zijn hooft ende zijn wapenen op, ende seyndent int Lant der Philisteen alom, ende lietent vercondigen voor haer Afgoden, ende den volcke.

10

Ende stelden zijne wapenen int huys haers Godts, ende zijn hooft vestichden si aen dat huys Dagon.

11

^* Maer doen alle die tot Iabes in Gilead, hoorden, alle wat de Philisteen Saul ghedaen hadden,

* 2.Reg. 2.a.4.

12

Maeckten si hen op alle strijdtbaer mannen, ende namen het lichaem Sauls ende zijnder sonen, ende brachtense tot Iabes, ende begroeuen hare ghebeenten onder de Eycke tot Iabes,

[p. 155v]

ende vasteden seuen dagen.

13

Also sterf Saul in zijnder misdaet, die hy teghen den HEEre gedaen hadde, aenden woorde des HEEren,^† dat hy niet en hielt, oock dat hy de Waersegster vraechde,

† 1.Reg. 15.b.9. 28.b.7.

14

Ende en vraechde den HEEre niet, daerom doode hy hem. Ende keerde dat Conincrijck tot Dauid, den Sone Isai.