Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxv. Capittel.

¶ NebucadNezar beleghert ende verweldicht Ierusalem, ende verberntse Hy brenghet de Inwoonders tot Babilonien.

1

⁺ ENde het gheuiel int^† negende Iaer zijns Conincrijcx, op den thienden dach der thiender maent, soo quam NebucadNezar de Coninck tot Babel, met alle zijnder macht teghen Ierusalem. Ende sy belegherden hen daer teghen, ende timmerden Bolwercken daerom.

+ A vers 1

† Iere. 39.a.1. 52.a.4.

2

Also wert de stadt belegert, tot int elfste Iaer des Conincx Sidekia.

3

^† Maer inde negenste Maent wert den honger sterck inde stadt, also dat dat volck des Lants niet te eten en hadde.

† Ezech. 4.c.16. 5.d.17. 14.b.13

4

Doen brackmen inde stadt. Ende alle Crijchslieden vluchten byder nacht door den wech vander poorten, tusscen de twee mueren die na des Conincx Hof gaet. (Maer de Chaldeen lagen om de stadt.) Ende hy vluchte door den wech na den blacken velde.

5

Maer de macht vanden Chaldeen iaechde den Coninck nae, ende greep hem int black velt tot Ieriho. Ende alle de oorloochs lieden die by hem waren, die werden van hem verstroyt.

6

^† Sy grepen den Coninck, ende voerden hem op totten Coninc van Babel te Riblat. Ende sy spraken een oordeel ouer hem.

† Deut. 28.d.36 Ier. 44.d.20

7

Ende^* sy sloeghen de kinderen Sidekia voor zijnen ooghen, ende verblinden Sidekia zijn ooghen, ende bonden hem met ketenen, ende voerden hem na Babel.

* Soph. 1.b.8

8

⁺ Inden seuensten daghe der vijfster maent, dat is dat negenthiende iaer NebucadNezars, des Conincx tot Babel, quam NebuzarAdan de Hofmeester, des Conincx tot Babels knecht, tot Ierusalem,

+ B vers 8

9

Ende^† verbrande dat huys des HEEren, ende dat huys des Conincx, ende alle huysen te Ierusalem, ende alle groote huysen verbernde hy met vyer.

† 3.Reg. 9.b.7. 2.Pa. 36.c.19. Ezec. 16.d.41.

10

Ende de geheele macht der Chaldeen, die metten Hofmeester was, brack de mueren rontom Ierusalem.

11

Maer dat ander volc dat inde stadt gebleuen was, ende die totten Coninck van Babel vielen, ende dat ander ghemeyne volck, voerde NebuzarAdan den Hofmeester wech.

12

Ende vanden alder slechtsten inden lande, liet de Hofmeester Wijngaerdenieren ende Ackerlieden ouer blijuen.

13

^† Maer de metalen Columnen aenden huyse des HEEren, ende de gestoelten, ende de metalen See, die aenden huyse des HEEren was, braken de Chaldeen, ende voerden dat metael na Babel.

† 3.Reg. 7.c.15. Iere. 27.c.22. 52.c.17.

14

Ende de potten, schuppen, messen, lepelen, ende alle metalen vaten, daermen mede diende, namen sy wech,

15

Die pannen ende beckens, wat gulden oft silueren was:

16

Twee Columnen, een See, ende de gestoelten die Salomo gemaect had totten huyse des HEEren, Dat metael en was niet te wegen van alle dese vaten.

17

^† Een Columne was achthien ellen hooch, ende haren knoop daer op, die was oock metalen ende drie ellen hooch, ende de reepen, ende de granaetappelen aenden knoope rontom, was altemael metalen. Op die maniere was oock die ander Columne, met den reepen.

† 3.Reg. 7.c.15.

18

⁺ Ende de Hofmeester nam den Priester^† Seraia vander eerster oorden, ende den Priester Sephania, vander tweeder oorden ende drye duerwachters,

+ C vers 18

† 1.Par. 7.a.12.

19

Ende eenen Camerlinck wt der stadt, die geset was ouer de Oorloochs lieden, ende vijf mannen die gestadelijc voor den Coninc waren, die inder stadt gheuonden werden, ende Sopher den Velthooftman, die dat volck inden Lande leerde oorlogen, ende noch tsestich mannen vanden volcke opten Lande, die inder stadt gheuonden werden,

20

Dese nam NebuzarAdan de Hofmeester, ende brachtse totten Coninck van Babel te Riblath.

21

Ende de Coninck van Babel sloechse doot tot Riblath, inden lande Hemath. Alsoo wert Iuda wech gheuoert wt zijnen Lande.

22

Maer^† ouer dat ouerghebleuen volck inden lande Iuda, dat NebucadNezar de Coninc van Babel ouer liet, sette hy Gedalia den sone Ahikam des soons Saphan.

† Iere. 40.b.5.

23

Doen nv alle des crijschvolcx Hooftlieden ende de mannen hoorden, dat de Coninck van Babel Gedalia daer geset hadde, quamen si tot Gedalia te Mizpa, te weten, Ismael de sone Nethania, ende Iohanan de sone Kareah, ende Seraia de sone Thanhumeth de Netophatijt, ende Iaesania de sone Maechathi, met haren mannen.

24

^† Ende Gedalia swoer hen ende haren mannen, ende sprack tot hen: En ontsiet v niet den Chaldeen onderdanich te zijn, ende blijft int Lant, ende zijt den Coninck van Babel onderdanich, soo salt v wel gaen.

† Iere. 40.c.9.

25

^+* Maer inder seuenster maent quam Ismael de sone Nathania, des soons Elisama vanden Coninclijcken gheslachte, ende thien mannen met hem, ende sy sloeghen Gedalia doot, daer toe de Ioden ende Chaldeen, die by hem waren te Mizpa.

+ D vers 25

* Iere. 41.a.1.

26

Doen maecte hen alle dat volck op, beyde cleyn ende groot, ende douerste des Oorloochs, ende quamen in Egipten, want sy vreesden die Chaldeen.

27

Maer^† inden seuenendertichsten Iaer, na dat Ioiachin de Coninck Iuda wech

† Iere. 52.e.31.

[p. 151v]

geuoert was, inden seuenentwintichsten dach der twelfster maent, hief EuilMerodach de Coninck tot Babel inden eersten iaer des Conincrijcx, dat hooft Ioiachin des Conincx Iuda, wt den kercker voort,

28

Ende sprack vriendelijck met hem. Ende hy sette zijnen stoel bouen de stoelen der Coninghen die by hem waren te Babel,

29

Ende veranderde de cleederen zijnder gheuanckenissen. Ende hy adt altoos voor hem zijn leuen lanck.

30

Ende bestelde hem zijn deel, datmen hem altoos gaf vanden Coninck op elcken dach, zijn gheheel leuen lanck.

¶ Eynde des tweeden Boecx der Coninghen.