Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxiiij. Capittel.

¶ De Coninc Nabucodonozor verwint Ioiakim den Coninck Iuda, ende voert zijnen sone Ioiachin tot Babel.

1

⁺ TOt zijnder tijt^† trock op NebucadNezar de Coninck tot Babel, ende Ioiakim wert hem onderdanich drie Iaer lanc. Ende hy keerde hem om, ende wert afuallich van hem.

+ A vers 1

† 2.Pa. 36.a.6. Dan. 1.a.1.

2

Ende de HEEre liet Crijchsknechten op hem comen wt Chaldea, wt Sirien, wt Moab, ende wt den kinderen Ammon, ende lietse in Iuda comen, op dat si hem te niet souden doen, na den woorde des HEEren^† dat hy gesproken had door zijne knechten de Propheten.

† Iere. 22.c.18.

3

Het^* geschiede Iuda also, na den woorde des HEEren, dat hyse van zijnen aensicht wech dede, om de sonden Manasse, die hy ghedaen hadde.

* 4.Re. 23.f.27.

4

Ooc om des ontschuldigen bloets wille, dat hy storte, ende maecte Ierusalem vol met ontschuldigen bloede, daerom en wildet de HEEre niet vergheuen.

5

⁺ Wat meer te seggen is van Ioiakim, ende al wat hy ghedaen heeft, siet, dat is geschreuen inder Cronijcken der Coningen Iuda.

+ B vers 5

6

Ende Ioiakim ontsliep met zijnen vaderen.^† Ende zijn sone Ioiachin wert Coninck in zijn plaetse.

† Iere. 36.d.30.

7

Ende de^* Coninck in Egipten en trock niet meer wt zijnen lande. Want de Coninck tot Babel hadde hem genomen alle wat des Conincx in Egypten was, van de Beke Egipti aen, tot den water Phrath toe.

* Iere. 46.a.2.

8

Ioiachin was achthien iaer out, doen hy Coninc wert, ende regeerde drie maenden lanck te Ierusalem. Sijn moeder hiet Nehusta, een dochter Elnatan van Ierusalem.

9

Ende dede dat den HEEre qualijck beuiel, gelijck zijn vader ghedaen hadde.

10

^+† In dier tijt trocken op de knechten NebucadNezars, des Conincx tot Babel, na Ierusalem, ende quamen aen de stadt met bolwerck.

+ C vers 10

† 2.Pa. 36.b.10 Hest. 2.a.6. 3.Esd. 1.e.40 Ezec. 17.b.17. Dan. 1.a.1.

11

Ende doen NebucadNezar aen de stadt quam, ende zijne knechten, belegerde hyse.

12

Maer Ioiachin de Coninc Iuda ginc wt totten Coninck van Babel, met zijnder moeder, met zijnen knechten, met zijnen Ouersten, ende Camerlinghen. Ende de Coninck van Babel nam hem aen int achtste iaer zijns Conincrijcx.

13

Ende^† nam van daer wt alle de schatten inden huyse des HEEren, ende inden huyse des Conincx, ende sloech in stucken alle gulden vaten, die Salomo de Coninck Israels gemaect hadde inden Tempel des HEEren, so de HEEre gesproken had,

† 4.Re. 20.c.17 Esa. 39.b.6.

14

Ende voerde geheel Ierusalem wech, alle Ouerste, alle machtighe, thien duysent geuangen, ende alle timmerlieden, ende alle smeden, ende en liet daer niet ouer blijuen, dan tslecht volc des lants.

15

^+* Ende voerde Ioiachin wech na Babel, de moeder des Conincx, de wijuen des Conincx, ende zijn Camerlinghen. Daer toe de machtige inden lande leyde

+ D vers 15

* Deu. 28.d.36. Iere. 24.a.1.

[p. 151r]

hy oock gheuanghen van Ierusalem na Babel.

16

Ende wat der bester lieden waren, seuen duysent, ende de timmerlieden ende smeden duysent, alle stercke Crijchslieden.

17

^† Ende de Coninck van Babel, voerdese te Babel, ende de Coninck van Babel, maecte Mathanai, zijns Vaders broeder tot eenen Coninck in zijn stede, ende veranderde zijnen name Sidekia.

† Iere. 37.a.1.

18

^* Sidekia was eenentwintich iaer out, doen hy Coninck wert, ende regeerde te Ierusalem elf iaer. Sijn moeder hiet Hamital, een dochter Ieremie van Libna.

* Iere. 52.a.1.

19

Ende hy dede dat den HEEre mishaechde, alsoo Ioiakim ghedaen hadde.

20

Want het geschiede also met Ierusalem ende Iuda, wt de gramschap des HEEren, tot dat hyse van zijnen aensichte wech wierp. Ende Sidekia wert afuallich vanden Coninck te Babel.