Den Bibel, Inhoudende dat Oude ende Nieuwe Testament (Biestkensbijbel)

¶ Dat xxj. Capittel.

¶ Vanden rijcke des Godloosen Conincx Manasse. Hoe hy geleeft heeft, ende hoe dat hy ghestoruen is. Van zijnen sone Amon.

1

⁺ MAnasse was^† twaelf Iaer oudt, doen hy Coninc wert, ende regeerde vijfenvijftich Iaer te Ierusalem. Sijn moeder hiet Hephziba.

+ A vers 1

† 2.Pa. 33.a.1.

2

Ende hy dede dat den HEEre mishaechde, na de grouwelen der Heydenen, die de HEEre voor de kinderen Israels verdreuen hadde.

3

Ende verkeerde hem,^† ende timmerde de Hoochten^* die zijn Vader Hiskia hadde vernielt, ende rechte Baals Altaer op, ende maecte Boschkens ghelijc Ahab de Coninck Israels ghedaen had, Ende aenbadt alderhande heyr aenden Hemel, ende diende hen.

† 3.Re. 11.a.7.

* 4.Re. 18.a.4.

4

Ende timmerde Altaren inden huyse des HEEren, daer af de HEEre geseyt hadde: Ic wil mijnen Naem te Ierusalem setten.

5

^† Ende hy timmerde allen Heyr aenden Hemel Altaren, in beyde den houen aenden huyse des HEEren.

† 4.Re. 23.c.12.

6

^† Ende liet zijnen sone door tvyer gaen, ende had acht op vogelsanck, ende Teekenen, ende hielt Waerseggers, ende Teekenbedieders, ende dede dies vele dat den HEEre mishaechde, daermede hy hem vertoornde.

† Leu. 18.c.21. Deu. 18.b.10. 4.Re. 16.a.3.

7

⁺ Hy sette ooc eenen Boschkens Afgod, dien hy gemaect hadde, in dat huys, van welcken de HEEre tot Dauid, ende tot Salomo zijnen sone geseyt hadde: In desen huyse ende te Ierusalem^* die ick vercoren heb wt allen stammen Israels, wil ick mijnen Naem setten eewelijc,

+ B vers 7

* 3.Re. 9.a.3.

8

Ende en wil den voet Israels niet meer bewegen laten vanden lande dat ick haren vaderen gegeuen hebbe. Ist nochtans, dat sy houden ende doen na alle dien dat ick geboden hebbe, ende na alle de Wet die hen mijn knecht Mose geboden heeft.

9

Doch sy en hoorden niet, maer Manasse verleydese, dat sy erger deden dan de Heydenen, die de HEEre voor de kinderen Israels vernielt hadde.

10

Doen sprack de HEEre door zijne knechten de Propheten, seggende:

11

Om dat Manasse de Coninc Iuda, dese grouwelijcheden gedaen heeft,⁺ die erger zijn dan alle de grouwelijcheden die de Amoriten gedaen hebben, die voor hem gheweest zijn, ende heeft Iuda ooc doen sondigen met zijne Afgoden.

+ C vers 11

12

Daerom seyt de HEERE de God Israels aldus:^† Siet, ick wil ongheluck ouer Ierusalem ende Iuda brenghen^* dat so wie het hooren sal, die sullen beyde de ooren clincken.

† Iere. 19.a.3.

* 1.Re. 3.c.11.

13

Ende wil ouer Ierusalem dat meetsnoer Samaria trecken, ende dat gewichte des huys Ahabs, ende wil Ierusalem wtschudden, gelijckmen schotelen wtschuddet, ende wilse omstorten.

14

Ende ick wil sommighe van mijnen

[p. 149v]

erfdeele ouer laten blijuen, ende die gheuen inde handen haerder Vianden, also dat sy eenen roof ende plucken werden alle haerder Vianden,

15

Om dat sy ghedaen hebben dat my mishaecht, ende hebben my vertoornt, van dien daghe aen, doen hare Vaders wt Egipten ghetrocken zijn, tot desen dach toe.

16

Ooc storte Manasse seer veel ontschuldichs bloets, tot dat Ierusalem hier ende daer vol wert, behaluen de sonde daermede hy Iuda dede sondighen, alsoo dat sy deden dat den HEERE qualijck beuiel.

17

⁺ Wat meer van Manasse te segghen is, ende al wat hy gedaen heeft, ende zijne sonden die hy dede, siet, dat is geschreuen inde Cronijcke der Coningen Iuda.

+ D vers 17

18

Ende Manasse ontsliep met zijnen vaderen, ende wert begrauen inden Hof aenden huyse, te weten, inden Hof Vsa. Ende zijn sone Amon wert Coninc in zijn stede.

19

^* Amon was tweentwintich iaer out, doen hy Coninc wert, ende regeerde twee iaer te Ierusalem. Sijn moeder hiet Mesulemet, een dochter Hazur van Iatba.

* 2.Pa. 33.d.21.

20

Ende dede dat den HEEre mishaechde, gelijck zijn vader Manasse ghedaen had,

21

⁺ Ende wandelde in alle de wegen die zijn vader ghewandelt had, ende diende den Afgoden, den welcken zijn vader gedient had, ende aenbadtse,

+ E vers 21

22

Ende verliet den HEEre zijnder vaders God, ende en wandelde niet inden wech des HEEren.

23

Ende zijne knechten maecten een verbont tegen Amon, ende dooden den Coninck in zijn huys.

24

Maer dat volc inden lande sloech alle die dat verbont tegen de Coninc Amon gemaect hadden. Ende dat volc inden lande maecte Iosia zijnen soon Coninck in zijn stede.

25

Wat Amon meer ghedaen heeft, siet, dat is geschreuen inde Cronijcke der Coningen Iuda.

26

Ende men begroef hem in zijnen graue, inden Hof Vsa. Ende zijn soon Iosia wert Coninck in zijn stede.