Den Bibel, Inhoudende dat Oude ende Nieuwe Testament (Biestkensbijbel)

¶ Dat .xx. Capittel.

¶ Ezechias wordt totter doot toe cranc, maer Iesaias wt beuel des HEEren, seyt hem toe noch vijfthien Iaer te leuen, ende wat Ezechias den Heydenschen Coninck dede, ende hy vertoornde den HEERE.

1

⁺ OP die tijt wert Hiskia^† doot siec. Ende de Propheet Iesaia de sone Amoz quam tot hem, ende seyde tot hem: Dus seyt de HEEre: Beschickt v huys, want ghy sult steruen ende niet leuende blijuen.

+ A vers 1

† 2.Pa. 32.e.24. Esaie. 38.a.1.

2

Maer hy keerde zijn aensicht na de wandt, ende badt totten HEEre ende sprack:

3

Och HEEre, gedenct doch, dat ick getrouwelijck voor v gewandelt hebbe, ende met een oprecht herte, ende heb ghedaen wat v wel behaecht. Ende Hiskia weende seer.

4

Ende doen Iesaia noch niet ter stadt half wtgegaen en was, quam des HEEren woort tot hem ende sprac:

5

Keert wederom, ende segt Hiskia den Vorst mijns volcx: Dus spreect de HEEre God ws Vaders Dauids: Ick heb v gebet ghehoort, ende uwe tranen gesien, Siet, ic wil v gesont maken, op den derden dach suldy

[p. 149r]

opgaen in dat huys des HEEREN,

6

Ende wil vijfthien iaer tot uwen leuen doen, ende v ende dese stadt, verlossen vanden Coninck tot Assyrien, ende dese stadt beschermen om mijnen wille, ende om mijns knechts Dauids wille.

7

Ende Iesaia sprac: Brengt herwaerts een stuck vijgen. Ende doen sy die brachten, leyden zyse op den sweere, ende hy wert gesont.

8

⁺ Maer Hiskia sprac tot Iesaia:^† Welc is dat Teeken dat my de HEERE gesont sal maken, ende dat ick in des HEEren huys opgaen sal, inden derden dage?

+ B vers 8

† Esa. 38.b.7.

9

Iasaia sprack: Dat Teeken suldy hebben vanden HEEre, dat de HEEre doen sal, wat hy gesproken heeft. Sal de schaduwe thien graden voorwaerts gaen, oft thien graden achterwaerts gaen?

10

Hiskia sprack: Het is lichtelijck dat de schaduwe thien graden nederwaerts gae, dat en wil ick niet: Maer dat sy thien graden achterwaerts te rugge gae.

11

Doen riep de Propheet Iesaia den HEEre aen.^* Ende de schaduwe ginck achterwaerts te rugge thien graden aenden wijser Ahas, die hy nederwaerts was ghegaen.

* Eccl. 48.c.26.

12

Tot dier tijt^† seynde Brodach de sone Baledam, des soons Baledams Coninck tot Babel, brieuen ende giften tot Hiskia: Want hy hadde ghehoort, dat Hiskia cranck was geweest.

† Esa. 39.a.1.

13

Maer Hiskia was vrolijck met hen, ende thoonde hen dat gantsche Schathuys, siluer, gout, specerie, ende de beste olie, ende de Harnasch Camer, ende al wat in zijnen schatten voor handen was. Daer en was niet in zijn huys, ende in zijnder geheelder Heerschappie, dat hen Hiskia niet en thoonde.

14

⁺ Doen quam Iesaia de Propheet tot den Coninck Hiskia, ende sprac tot hem: Wat hebben dese lieden gheseyt? Ende van waer zijn sy tot v gecomen? Hiskia sprack: Sy zijn wt verren lande tot my gecomen, van Babel.

+ C vers 14

15

Hy sprac: Wat hebben sy gesien in uwen huyse? Hiskia sprack: Sy hebbent al gesien wat in mijnen huyse is, ende daer en is niet in mijnen schatten, dat ick hen niet ghetoont en hadde.

16

Doen sprack Iesaia tot Hiskia: Hoort des HEEren woort,

17

Siet^† den tijt coemt dat alle dinck na Babel wech geuoert sal worden wt uwen huyse, ende al wat uwe Vaders vergadert hebben tot op dese daghe toe, ende daer en sal niet ouergelaten worden seyt de HEERE:

† 4.Re. 24.c.13 25.b.8. Iere. 20.b.5. Esa. 39.b.6.

18

^† Daer toe de kinderen die van v comen, die ghy winnen sult, sullen genomen worden, dat sy Camerlingen zijn int Palleys des Conincx tot Babel.

† Dan. 1.a.3.

19

Maer Hiskia sprack tot Iesaia: Dat is doch goet dat de HEEre gesproken heeft. Ende sprac noch: Het sal doch vrede ende trouwe zijn tot mijnen tijden.

20

Wat meer van Hiskia te seggen is, ende alle zijne macht, ende wat hy gedaen heeft, ende den poele, ende de waterganghen, daermede hy water inde stadt ghe-leyt heeft, siet, dat is geschreuen inde Cronijcke der Coningen Iuda.

21

^† Ende Hiskia ontsliep met zijnen vaderen. Ende Manasse zijn sone wert Coninck in zijn stede.

† 2.Pa. 32.f.33.