Den Bibel, Inhoudende dat Oude ende Nieuwe Testament (Biestkensbijbel)

¶ Dat .xix. Capittel.

¶ Hiskia seynt tot Esaiam, die troost hem. Hoe dat God Hiskia ontsettede, ende verloste.

1

⁺ DOen de Coninc^† Hiskia dat hoorde, schuerde hy zijn cleederen,^* ende dede eenen sack aen, ende ginc in dat huys des HEEren.

+ A vers 1

† Esaie. 37.a.1.

* Ionas. 3.a.6

2

Ende sant Eliakim den Hofmeester, ende Sebena den schrijuer, metten Outsten Priesteren, met sacken ghecleet, totten Propheet Iesaia, den sone Amoz.

3

Ende sy spraken tot hem: So seyt Hiskia: Dat is eenen dach der noot, scheldens ende lasterens. De kinderen zijn aen de gheboorte ghecomen, ende daer en is gheen cracht te baren.

4

Oft misschien de HEEre uwe Godt wilde alle de woorden des oppersten schenckers hooren, dien zijn Heere de Coninc van Assyrien gesonden heeft, schimp te spreken den leuenden God, ende te schelden met woorden, die de HEEre uwe Godt ghehoort heeft: Soo heft v ghebet op voor de ouerghebleuene, die noch voor handen zijn.

5

⁺ Ende doen de knechten des Conincx Hiskia tot Iesaia quamen,

+ B vers 5

6

Sprac Iesaia tot hen: Alsoo segt dijnen HEEre: Dus spreect de HEEre: En vreest v niet voor de woorden die ghy ghehoort hebt, daer mede my de knapen des Conincks van Assyrien ghelastert hebben.

7

Siet, Ick wil hem eenen gheest laten gheuen, dat hy een gheruchte hooren sal, ende weder in zijn lant trecken,^† ende wil hem door tsweert vellen in zijn Lant.

† Esaie. 37.b.7. 2.Pa. 32.d.21. Tob. 1.d.24.

8

Ende doen de ouerste schencker weder quam, vont hy den Coninck van Assyrien strijdende teghen Libna. Want hy hadde ghehoort, dat hy van Lachis ghetrocken was. Ende hy hoorde van Thirhaka den Coninck der Moren: Siet, hy is wtghetrocken om tegen v te strijden. Doen keerde hy om.

Ende sant boden tot Hiskia, ende liet hem seggen:

9

Also segt Hiskia den Coninck Iuda: En laet v uwen God niet bedriegen, op dien ghy v verlaet, ende spreect: Ierusalem en sal niet in de hant des Conincx van Assyrien ghegheuen worden.

10

Siet, ghi hebt gehoort wat de coningen

[p. 148v]

van Assyrien ghedaen hebben allen landen, ende die verbannet, ende sout ghy verlost werden?

11

Hebben de Goden der Heydenen die oock verlost, de welcke mijne Vaders hebben verdoruen, Gozan, Haran, Rezeph ende de kinderen Eden, die tot Thelassar waren?

12

Waer is de Coninck tot Hemat, de Coninck tot Arphad, ende de Coninc der stadt Sepharuaim, Hena ende Iwa?

13

⁺ Ende doen Hiskia de brieuen vanden boden ontfangen ende ghelesen had. Ghinc hy op totten huyse des HEEren, ende strectese wt voor den HEEre,

+ C vers 13

14

Ende badt voor den HEEre ende sprack: HEEre God Israels, ghy die ouer Cherubin sit, Ghy zijt alleen Godt, onder alle Conincrijcken op Aerden:^† Ghy hebt Hemel ende Aerde ghemaect:

† Gene. 1.a.1.

15

HEERE neyghet v ooren ende hoort: Doet uwe ooghen open ende siet, ende hoort de woorden Sanherib, die hier ghesonden heeft schimp te spreken den leuenden Godt.

16

Het is waer HEEre, de Coninghen van Assyrien hebben de Heydenen metten sweerde vernielt, ende haer landt,

17

Ende hebben hare goden int vier gheworpen. Want het en waren geen goden,^* maer menschen handen werc, hout ende steen, Daerom hebben sise vernielt.

* Psal. 115.a.4.

18

Mer nv HEEre onse God, helpt ons wt zijnder hant, op dat alle Conincrijcken op Aerden bekennen, dat ghi HEEre alleen God zijt.

19

⁺ Doen sandt Iesaia de sone Amoz tot Hiskia, ende liet hem seggen: So spreect de HEEre de Godt Israels: Wat ghy tot my ghebeden hebt om Sanherib den Coninck van Assyrien, dat heb ick ghehoort.

+ D vers 19

20

Dat ist, dat de HEEre teghen hem gesproken heeft: De maget de dochter Sion veracht v ende bespot v, de dochter Ierusalems schuddet haer hooft achter v.

21

^† Wien hebt ghy beschimpt, ende gelastert? Ouer wien hebt ghy v stemme verheuen? Ghy hebt uwe ooghen verheuen teghen den heyligen in Israel.

† zach. 2.b.8. Mat. 25.d.40 Act. 9.a.5.

22

Ghy hebt de HEEre door uwe boden beschimpt, ende gheseyt:^* Ick ben door de menichte mijnder waghens op de Hoochte der berghen gheclommen, opte zijden van Libanon. Ick hebbe sine hooghe Cederboomen, ende wtghelesen dennenboomen, afghehouwen, ende ben ghecomen aen de wterste Herberge des wouts zijns Carmels.

* Psalm. 20.a.8 Iudith. 9.a.8.

23

Ick heb ghegrauen ende wtghedroncken de vreemde wateren, ende hebbe met mijnen voetsolen de zeen verdroocht.

24

⁺ Maer en hebdy niet ghehoort, dat ick sodanich langhe te voren gedaen hebbe, ende van beghinne heb ict bereyt? Maer nv heb ict laten comen, dat vaste steden sullen vallen in eenen woesten steenhoop.

+ E vers 24

25

Ende die daer in woonen, sullen mat werden, ende hen vreesen ende schamen moeten,^* ende sullen werden als dat gras opten velde, ende als dat groene Cruyt totten Hoy op de daken, dat verdorret eert rijp wort.

* Psalm. 37.a.2

26

Ick weet v wooninge wel, v wt ende in trecken, ende v rasen tegen my.

27

Want ghy dan tegen my raest, ende uwen ouermoet voor mijne ooren opgheclommen is, soo wil ick v eenen rinck in de nuese leggen, ende een ghebit in uwen mont, ende wil v wederom leyden door den wech daer ghy door ghecomen zijt.

28

Ende dit sy v een Teeken: In desen Iare etet wat vertreden is: Inden tweeden iare wat van selfs wast.⁺ Inden derden iare, saeyt ende oogstet, ende plantet wijnbergen ende etet hare vruchten.

+ F vers 28

29

Ende de dochter Iuda, die verlost ende ouerbleuen is, sal voortaen onder haer wortelen, ende ouer haer seluen vrucht draghen.

30

Want van Ierusalem sullen wtgaen de ouerghebleuene, ende de verloste vanden Berch Sion. Den ijuer des HEEren Sebaoths sal sulcx doen.

31

Daerom spreeckt de HEEre vanden Coninck van Assyrien aldus:

32

Hy en sal in dese stadt niet comen noch gheenen pijl daer in schieten, noch daer en sal geenen schilt voor comen, noch geenen Wal en sal hy daer om legghen:

33

Maer hy sal den wech wederom reysen, dien hy ghecomen is, ende en sal in dese stadt niet comen. De HEEre seghet.

34

Ic wil dese stadt beschermen, dat ic haer helpe om mijnen wille, ende om Dauids mijns knechts wille.

35

^+* Ende de Engel des HEEren voer inder seluer nacht wt, ende sloech inden Leger van Assyrien hondert ende vijfentachtentich duysent mannen. Ende als sy hem smorghens vroech op maecten, siet, doen laghen daer al enckel doode lichamen.

+ G vers 35

* Esa. 37.c.36. Hosee. 1.b.7. Eccl. 48.d.24 1.Mac. 7.f.41 2.Mac. 8.c.19

36

Also brack Sanherib de Coninc van Assyrien op, ende trock wech, ende keerde wederom, ende bleef te Niniue.

37

Ende doen hy aenbede inden huyse Nisroch zijns Gods,^* sloegen hem metten sweerde, Adramelech ende Sarrezer zijn sonen. Ende si ontuloden int Landt Ararot. Ende zijn soon Assarhaddon, wert Coninck in zijn stede.

* Tobie. 1.d.24