Den Bibel, Inhoudende dat Oude ende Nieuwe Testament (Biestkensbijbel)

¶ Dat .xvij. Capittel.

¶ Van Osea, hoe hem Salmanasser verwan ende Samariam innam, ende de Inwoonders wech voerden. Ende hoe Godt die strafte, die welcke in haer plaetse int lant quamen.

1

⁺ INden twaelfsten iaer Ahas des Conincx Iuda, wert Coninck ouer Israel tot Samarien, Hosea de sone Elia, neghen iaer.

+ A vers 1

2

Ende dede dat den HEEre mishaechde, nochtans niet ghelijck de Coninghen Israels die voor hem waren.

3

Teghen den seluen trock op Salmanasser de Coninck tot Assyrien.^† Ende Hosea wert hem onderdaen, also dat hy hem ghiften schencte.

† 4.esd. 13.c.40

4

Maer doen de Coninck te Assyrien vernam, dat Hosea een verbont maecte, ende boden tot So, den Coninc in Egipten hadde ghesonden, ende niet alle iaer den Coninck tot Assyrien ghiften ouer en reycte, soo belegherde hy hem, ende leyde hem in de gheuanckenisse.

5

^† Ende de Coninck tot Assirien trock int gheheele lant ende nae Samaria, ende belegerdese drie iaer lanck.

† 4.Re. 18.b.9.

6

Ende^† inden neghensten iaer Hosea, wan de Coninck tot Assirien Samaria, ende voerde Israel wech in Assirien, ende settese tot Halah ende tot Habor, aent water Gosan, ende inde steden der Meden.

† Esaie. 7.d.29.

7

⁺ Want doen de kinderen Israels tegen den HEEre haren Godt sondichden,^† diese wt den Lande Egipti geleyt hadde, wt der hant Pharao des Conincx in Egipten, ende ander Goden vreesden,

+ B vers 7

† Exod. 14.f.30

8

Ende wandelde na de seden der Heydenen, die de HEEre voor de kinderen Israels verdreuen hadde, ende deden ghelijck de Coninghen Israels.

9

Ende de kinderen Israels vercierden haer saecken tegen den HEEre haren Godt, die doch niet goet en waren, te weten, dat sy hen Hoochten timmerden in allen Steden, beyde in sloten ende vaste steden,

10

Ende rechten Columnen op ende busschelkens op alle hooghe berghen, ende onder alle groene Boomen.

11

Ende roocten aldaer op alle Hoochten, ghelijc de Heydenen, die de HEEre voor hen wech ghedreuen hadde. Ende bedreuen quade stucken, daer si den HEERE mede vertoornden,

12

Ende dienden den Afgoden,^† daer af de HEERE tot hen gheseyt hadde: Ghy en sult sulcks niet doen.

† Deut. 4.c.16.

13

⁺ Ende als de HEEre ghetuychde in Israel ende Iuda door alle Propheten ende Sienders, ende liet hen seggen:^† Keert om van uwen boosen wegen, ende hout mijne gheboden ende rechten, nae alle Wetten die ick uwen vaderen gheboden hebbe, ende die ick tot v gheseynt hebbe, door mijne knechten de Propheten:

+ C vers 13

† Iere. 25.a.5. 18 a.11. 35.c.15.

14

^† Soo en hoorden si niet, maer verherden haer necken als de necken haerder vaders, die niet en gheloofden aen den HEEre haren Godt.

† Deut. 31.f.27. Malac. 3.b.7.

15

Daer toe verachten si sine gheboden, ende zijn verbont, dat hy met haren vaderen gemaect hadde, ende sine ghetuyghenis die hy onder hen dede. Maer wandelden na haer ijdelheyt, ende worden ydel, ghelijc als de Heydenen die rontom hen woonden, van welcken hen de HEEre gheboden hadde, dat si niet en souden doen als die:

16

Maer si verlieten alle de geboden des HEEren haers Godts,^† ende maecten hen twee ghegoten Calueren ende boschkens, ende aenbaden alle dat Heyr des Hemels, ende dienden Baal,

† 3.Reg. 12.d.28

17

^† Ende lieten haer sonen ende dochteren door tvier gaen, ende ghinghen met waersegghinge ende Toueryen om,⁺ ende gauen hen ouer te doen dat den HEEre qualijck beuiel, om hem te vertoornen.

† Deut. 18.b.10.

+ D vers 17

18

Doen wert de HEEre seer toornich ouer Israel, ende dedese wech van sinen aensicht, alsoo datter niet ouer en bleef,^† dan den stam Iuda alleen.

† 3.Reg. 12.c.20.

19

(Daer toe en hielt Iuda de geboden des HEEren haers Gods oock niet, ende wandelden nae den seden Israels die sy gedaen hadden)

20

Daerom verwierp de HEERE alle dat saet Israels, ende drongse, ende gafse in de handen der Roouers, tot dat hyse van sinen aensicht wierp.

21

Want Israel wert vanden huyse Dauids gheschuert.^† Ende si maecten Ierobeam den Sone Nebath tot eenen Coninc. Die selue keerde Israel achterwaerts af vanden HEEre, ende dede dat si swaerlijck sondichden.

† 3.Reg. 12.c.20.

22

Alsoo wandelden de kinderen Israels in alle den sonden Ierobeams, die hy op ghestelt hadde, ende en lieten daer niet af,

23

Tot dat de HEEre Israel van sinen aensichte wech dede, soo hy ghesproken had door alle zijn knechten de Propheten.^+* Alsoo wert Israel wt sinen Lande wech gheuoert in Assirien, tot op desen dach.

+ E vers 23

* Iere. 25.a.9.

24

^† Maer de Coninck tot Assyrien liet comen van Babel, van Cutha, van Awa, van Hemath, ende van Sepharuaim, ende besette die steden in Samaria, in der kinderen Israels stede. Ende si namen Samaria in, ende woonden inde selfde steden.

† 1.Esd. 4.b.10

25

Maer doen si daer begosten te woonen, ende den HEEre niet en vreesden, seynde de HEEre Leeuwen onder hen, die verworchdense.

26

Ende deden den Coninck van Assyrien segghen: De Heydenen die ghy hier hebt ghebracht ende de steden Samarie daer mede beset, en weten vander manieren des Gods inden Lande niet, daerom heeft hy onder haer Leeuwen ghesonden, ende siet,

[p. 147v]

die selue doodense om dat si de manieren inden Lande des Godts niet en weten.

27

⁺ De Coninck tot Assyrien geboot ende sprack: Brenghet een vanden Priesters derwaerts, die van daer wech zijn gheuoert, ende trect wech, ende woont aldaer, ende hy leere hen de maniere des Godts inden Lande.

+ F vers 27

28

Doen quam een vanden Priesteren die van Samaria wech gheleyt waren, ende woonde te BethEl, ende hy leerdese hoe sy den HEERE souden vreesen.

29

Maer elck volck maeckte sinen Godt, ende settese in de huysen, op de Hoochten, die de Samaritanen maecten, elck volck in hare steden daer si in woonden.

30

Die van Babel maecten Suchoth Beboth: Die van Chuth maecten Nergel: Die van Hemath maeckten Asiama:

31

Die van Ani maeckten Nibehas ende Thartak: Die van Sepharuaim verbernden hare sonen, den Adramelech, ende Anamelech den goden, dier van Sepharuaim.

32

⁺ Ende de wijle si den HEERE oock vreesden, maecten si hen Priesters op de Hoochten,^† wt den ondersten onder hen, ende settendese inde huysen op de Hoochten.

+ G vers 32

† 3.Reg. 12.e.31.

33

Alsoo vreesden si den HEEre: Ende dienden oock den Afgoden na elcx volcx wijse, van daer si gebracht waren.

34

Ende noch tot op desen dach, doen si na der ouder wijse, dat si noch den HEEre en vreesen, noch hare seden ende rechten en houden, nae de Wet ende gheboden dat de HEEre den kinderen Iacobs gheboden heeft,^† den welcken hy den name Israels gaf,

† Gen. 32.c.26.

35

Ende maeckte een verbondt met hen, ende gheboot hen ende sprac:^† En vreest geen ander goden, ende en aenbidtse niet, ende en dient hen niet, ende en offert hen niet:

† Iudic. 6.b.10. Iere. 10.a.5.

36

Maer den HEEre, die v wt den lande Egipti gheleyt heeft, met grooter cracht ende wtgherecten arm,^† dien vreest, dien aenbidt, ende dien offert.

† Esaie. 8.a.5.

37

⁺ Ende de seden, Rechten, Wetten, ende gheboden, die hy v heeft laten beschrijuen, die hout, dat ghy daer altijt nae doet, ende ander goden niet en vreest.

+ H vers 37

38

Ende des verbonts dat hy met v ghemaeckt heeft, en vergheet niet, dat ghy ander goden niet en vreest,

39

Maer vreest den HEEre uwen God, die sal v verlossen van alle uwe Vianden.

40

Maer si en hoorden niet, maer deden nae hare voorleden wijse.

41

Alsoo vreesden dese Heydenen den HEEre, ende dienden ooc haren Afgoden. Also deden oock hare kinderen, ende kints kinderen, ghelijc hare Vaders ghedaen hebben tot op desen dach.