Den Bibel, Inhoudende dat Oude ende Nieuwe Testament (Biestkensbijbel)

¶ Dat .xvj. Capittel.

¶ Van Achas, Rasim, ende Esechias.

1

⁺ INden seuenthiensten Iare Pekah des soons Remalia, wert Coninck, Ahas de sone Iotham des Conincx Iuda.

+ A vers 1

2

^† Ahas was twintich iaer out, doen hy Coninck wert, ende regeerde sesthien iaer te Ierusalem. Ende en dede niet dat den HEEre sinen Gode wel behaechde, ghelijck zijn vader Dauid.

† 2.Par. 28.a.1.

3

Want hy wandelde op de weghen der Coninghen Israels.^† Daer toe liet hy sinen soon door tvier gaen, nae de grouwelen der Heydenen, die de HEEre voor de kinderen Israels verdreuen hadde.

† Deut. 18.b.10. 4.Reg. 21.a.6 Iere. 7.d.30. 19.a.5.

4

Ende dede offerande, ende roocte op de Hoochten, ende op alle hueuelen, ende op alle groene boomen.

5

^† Doen ter tijt trock Rezin de coninc tot Sirien, ende Pekah de sone Remalia de Coninck in Israel, opwaerts na Ierusalem om te bestrijden, ende belegherden Ahas: Maer si en costense niet ghewinnen.

† Esaie. 7.a.1.

6

Ter seluer tijt bracht Rezin de Coninck tot Sirien^† Elath weder aen Sirien, ende stiet de Ioden wt Elath. Maer de Siriers quamen ende woonden daer in, tot op desen dach.

† 4.Regum. 14.d.22.

7

^+† Maer Ahas seynde boden tot Tiglat Pilesser den Coninc tot Assyrien, ende liet hem segghen: Ick ben v knecht ende v sone, coemt opwaerts, ende helpt my wt der hant des Conincx tot Sirien, ende des Conincx Israels, die hen teghen my opghemaect hebben.

+ B vers 7

† 2.Par. 28.c.16

8

Ende Ahas nam dat siluer ende gout dat inden huyse des HEEren, ende inde scatten des Conincx huyse geuonden wert, ende seynde den Coninck tot Assirien ghiften.

9

^* Ende de Coninck tot Assirien hoorde hem, ende troc opwaerts na Damasco, ende wontse, ende voerdese wech nae Kir, ende doode Rezin.

* Esaie. 7.d.29.

10

Ende de Coninck Ahas, troc Tiglat Pilesser den Coninck tot Assirien tegen na Damascon.^† Ende doen hy eenen Altaer sach, die tot Damasco was, seynde de Coninc Ahas des seluen Altaers euen beelde, ende ghelijckenisse totten Priester Vria, soo den seluen ghemaect was.

† Esaie. 17.c.10.

11

Ende Vria de Priester timmerde eenen Altaer, ende maecte dien ghelijck de Coninck Ahas tot hem ghesonden had van Damasco, tot dat de Coninck Ahas van Damasco quam.

12

⁺ Ende doen de Coninck van Damasco quam, ende den Altaer sach, offerde hy daer op,

+ C vers 12

13

Ende stac daer op aen sinen Brantoffer, Spijsoffer, ende goot daer op sinen Dranckoffer, ende liet dat bloet der Dancofferen die hy offerde, opten Altaer sprengen.

14

Maer den metalen Altaer die voor den HEERE stont, nam hy wech, dat hy niet tusscen den Altaer ende den huyse des HEEREN en stont. Maer hy sette hem aen den hoecke des Altaers, Noortwaerts.

15

Ende de Coninck Ahas, geboot Vria den Priester, ende sprack: Opten grooten Altaer suldy aensteken den Brandtoffer des smorghens, ende den Spijsoffer des auonts, ende den Brandtoffer des Conincx ende sinen Spijsoffer, ende den Brantoffer alle des volcx inden Lande, met haren Spijsoffer ende Dranckoffer. Ende allet bloet des Brantoffers, ende alderhande Offer bloet, sult ghy daer op sprenghen. Maer metten metalen Altaer, wil ic my bedencken wat ic daer mede maken wille,

16

Vria de Priester dede al wat hem de Coninck Ahas hiet.

17

⁺ Ende Ahas de Coninc brac^† af die siden aen de ghestoelten, ende nam den ketel

+ D vers 17

† 3.Reg. 7.d.23.f.38.

[p. 147r]

bouen daer af, ende de See nam hy vanden metalen Runderen, die daer onder waren, ende settese op dat steenen plaueytsel.

18

Daer toe dat Decksel des Sabbaths, dat si aent huys ghetimmert hadden. Ende den ganck des Conincks buytenwaerts keerde hy totten huyse des HEEren, den Coninck tot Assyrien te dienste.

19

Wat meer van Ahas te segghen is, dat hy ghedaen heeft, siet, dat is ghescreuen inder Cronijcke der Coninghen Iuda.

20

Ende Ahas ontsliep met sinen vaderen, ende wert begrauen by sine vaderen in de stadt Dauids. Ende Hiskia zijn soon wert Coninck in zijn plaetse.