Den Bibel, Inhoudende dat Oude ende Nieuwe Testament (Biestkensbijbel)

¶ Dat .xv. Capittel.

¶ Van Asaria die melaetsch werdt, van zijnen sone Iotham, van Sacharia den Coninc Israels, van Sellum, Manahem, Pacea, Romelia, hoe dat Teglathalasser die steden Israels inne nam.

1

⁺ INden seuenentwintichsten Iaer Ierobeam des Conincx Israels,^† wert Coninck Asaria, de sone Amasia des Conincx Iuda.

+ A vers 1

† 2.Par. 26.a.1.

2

Ende was sesthien iaer oudt doen hy Coninck wert, ende regeerde tweenvijftich iaer te Ierusalem. Sijn moeder hiet Iechalia van Ierusalem.

3

Ende dede wat den HEEre wel beuiel, in alder manieren, ghelijck zijn vader Amasia,

4

Sonder dat si de Hoochten niet wech en namen. Want dat volck offerde, ende roocten noch op de Hoochten.

5

Maer de HEEre plaechde den Coninck,^† dat hy melaetsch was, tot aen zijn doot,^* ende woonde in een besondert huys. Maer Iotham des Conincx soon regeerde dat huys, ende oordeelde dat volck inden Lande.

† 2.Pa. 26.d.19

* Leuit. 13.g.46.

6

^† Wat meer van Asaria te seggen is, ende al wat hy ghedaen heeft, siet, dat is gheschreuen inder Cronijcken der Coninghen Iuda.

† 2.Pa. 26.d.20

7

Ende Asaria ontsliep met sinen vaderen, ende men begroef hem by sine vaders, in de stadt Dauids. Ende zijn soon Iotham wert Coninck in zijn stede.

8

⁺ Inden achtendertichsten iaer Asaria des Conincx Iuda, wert Sacharia de sone Ierobeam, Coninc ouer Israel tot Samaria, ses maenden lanck.

+ B vers 8

9

Ende dede dat den HEEre qualijck beuiel, soo sine vaders ghedaen hadden. Hy en liet niet af, vanden sonden Ierobeam des soons Nebat, die Israel dede sondighen.

10

Ende Sallum de sone Iabes maeckte een verbont teghen hem, ende sloech hem voor den volcke, ende doode hem, ende werdt Coninck in zijn stede.

11

Wat meer van Sacharia te segghen is, siet, dat is gheschreuen inder Cronijcken der Coningen Israels.

12

Ende^† dat is dat de HEEre Iehu ghesproken hadde: V sullen kinderen tot int vierde Lidt sitten opten stoel Israels. Ende het is alsoo gheschiet.

† 4.Re. 10.e.30

13

⁺ Sallum de sone Iabes, wert Coninc inden neghenendertichsten iaer^* Asaria, des Conincks Iuda, ende regeerde een maent lanc tot Samaria.

+ C vers 13

* Sommighe lesen, Vsia.

14

Want Menahem de sone Gadi, trock op van Thirza, ende quam tot Samaria, ende sloech Sallum, den sone Iabes tot Samaria, ende doode hem, ende werdt Coninck in zijn stede.

15

Wat meer van Sallum te seggen is, ende zijn verbont dat hy maecte, siet, dat is gheschreuen inder Cronijcken der Coninghen Israels.

16

Doen ter tijt sloech Menahem Tiphsah, ende alle die daer in waren, ende haer palen van Thirsa, om dat si hem niet en wilden in laten: Ende sloech alle haer beuruchte, ende verschuerdese.

17

Inden neghenendertichsten iaer Asaria, des Conincx Iuda, wert Menahem de sone Gadi, Coninck ouer Israel, thien iaer tot Samaria:

18

⁺ Ende dede dat den HEEre mishaechde. Hy en liet zijn leuen lanck niet af vanden sonden Ierobeam, des soons Nebat, die Israel dede sondighen.

+ D vers 18

19

^† Ende Phul de Coninck van Assyrien quam int Lant. Ende Menahem gaf dien Phul, duysent Centener siluers, dat hijt met hem soude houden, ende hem dat Conincrijck confirmeren.

† 1.Par. 6.d.26

20

Ende Menahem sette in Israel een gelt op de Rijcste, vijftich sikelen siluers op elcken man, dat hy den Coninc van Assyrien soude geuen. Also trock de Coninck van Assyrien weder nae huys, ende en bleef niet inden Lande.

21

Wat meer van Menahem te seggen is, ende al wat hy ghedaen heeft, siet, dat is gheschreuen inder Cronijcken der Coninghen Israels.

22

Ende Menahem ontsliep met sinen vaderen.⁺ Ende Pekahia zijn soon wert Coninck in zijn stede.

+ E vers 22

23

Inden vijftichsten iaer Asaria des Co-

[p. 146v]

nincx Iuda, wert Pekahia de sone Menahem, Coninck ouer Israel, tot Samaria, twee iaer lanc.

24

Ende dede dat den HEERE mishaechde. Want hy en liet niet af vanden sonden Ierobeam des soons Nebat, die Israel dede sondighen.

25

Ende Pekah de soon Remalia zijns Ridders, maecte een verbont tegen hem, ende sloech hem tot Samaria int paleys des Conincx huyse, met Argob ende Arie, ende vijftich mannen met hem vanden kinderen Gilead, ende doode hem, ende wert Coninck in zijn stede.

26

Wat meer van Pekahia te segghen is, ende al wat hy ghedaen heeft, siet, dat is gescreuen inde Cronijcke der Coninghen Israels.

27

⁺ Int tweenvijftichste iaer Asaria, des Conincx Iuda, wert Pekah de sone Remalia, Coninc ouer Israel, tot Samaria twintich iaer.

+ F vers 27

28

Ende dede dat den HEEre mishaechde. Wandt hy en liet niet af vander sonden Ierobeam des soons Nebat, die Israel dede sondighen.

29

^* Inden tijden Pekah des conincx Israel,^† quam Tiglat Pillesser, de Coninc tot Assirien, ende nam Hion, Abel, BethMaecha, Ionaha, Kedes, Hazor, Gilead Galilea, ende dat gheheele lant Naphthali. Ende voerdese wech in Assirien.

* Esaie. 9.a.1.

† 1.Par. 6.a.6

30

Ende Hosea de sone Ela, maecte een verbont teghen Pekah den sone Remalia, ende sloech hem doot, ende werdt Coninck in zijn stede, int twintichste iaer Iotham, des soons Vsia.

31

⁺ Wat meer van Pekah te segghen is, ende al wat hy ghedaen heeft, siet, dat is gheschreuen inder Cronijcke der Coninghen Israels.

+ G vers 31

32

Inden anderen iaer Pekah des soons Remalia, des Conincx Israel, werdt Coninc^† Iotham de sone Vsia, des Conincx Iuda,

† 2.Par. 27.a.1.

33

Ende was vijfentwintich iaer out doen hy Coninck wert, ende regeerde sesthien iaer te Ierusalem. Sijn moeder hiet Ierusa, een dochter Sadok.

34

Ende dede dat den HEEre wel behaechde, in alder manieren, als zijn vader Vsia gedaen hadde,

35

Sonder dat si de Hoochten niet wech en namen. Want dat volc offerde ende roocte noch op de Hoochten. Hy timmerde de hooghe poorte aenden huyse des HEEren.

36

Wat meer van Iotham te segghen is, ende al wat hy ghedaen heeft, Siet, dat is gheschreuen inde Cronijcke der Coninghen Iuda.

37

In die tijt begost de HEEre te seynden in Iuda, Rezin den Coninck tot Sirien, ende Pekah den sone Remalia.

38

Ende Iotham ontsliep met sinen vaderen, ende wert begrauen by sine vaderen in de stadt Dauids zijns vaders. Ahas zijn sone wert Coninc in zijn stede.