Den Bibel, Inhoudende dat Oude ende Nieuwe Testament (Biestkensbijbel)

¶ Dat .xiiij. Capittel.

¶ Van Ioas, Amasias, Ieroboam ende Asarias.

1

⁺ INden anderen iaer Ioas, des soons Ioahas, des Conincx Israels,^† werdt Amasia Coninc, de sone Ioas, des Conincx Iuda.

+ A vers 1

† 2.Par. 25.a.1.

2

Hy was vijfentwintich iaer out doen hy Coninck wert, ende regeerde negenentwintich iaer te Ierusalem. Sijn moeder hiet Ioadan van Ierusalem.

3

Ende hy dede wat den HEEre wel beuiel. Nochtans niet als zijn vader Dauid, maer als zijn vader Ioas, so dede hy oock,

4

Want de Hoochten en werden niet wech ghenomen. Maer dat volck offerde, ende roockte noch op de Hoochten.

5

Doen hy nv des Conincrijcx machtich werdt, sloech hy zijn knechten,^† die sinen vader den Coninc gheslagen hadden.

† 4.Re. 12.d.20

6

Maer de kinderen der dootslaghers en doode hy niet, soot gheschreuen staet, inden Wet boeck Mose, daer de HEEre gheboden heeft, ende geseyt:^† De vaders en sullen niet om der kinderen wille steruen: Ende de kinderen, en sullen niet om der vaders wil steruen, maer elck sal om zijnder sonden wille steruen.

† Deut. 24.c.16 Iere. 31.d.29. Ezech. 18.a.3.

7

⁺ Hy sloech de Edomiten oock int sout dal, thien duysent, ende wont de stadt Sela met den strijt, ende hietse Iaktheel, tot desen daghe toe.

+ B vers 7

8

^† Doen sant Amasia boden tot Ioas den sone Ioahas, des soons Iesu, den Coninck Israels, ende dede hem seggen: Coemt herwaerts, Laet ons malcanderen besien.

† 2.Par. 25.c.17

9

Maer Ioas de Coninck Israels, sant tot Amasia den Coninc Iuda, ende dede hem segghen:^† Den doornen struyck die in Libano is, seynde totten Cederen in Libanon, ende dede hem seggen: Gheeft uwe dochter mijnen soon tot eenen wijue. Maer dat wilde ghedierte opten velde, in Libanon, liep ouer den doornen struyck, ende vertradt hem.

† Iudic. 9.b.8. 4.esd. 4.b.13

10

Ghy hebt de Edomiten gheslagen, daer af verheft hem v herte, hebt de beroeminge, en blijft thuys. Waerom haect ghy nae ongeluc, dat ghy valt, ende Iuda met v?

11

Maer Amasia en gaf gheen gehoor.⁺ Doen trock Ioas de Coninck Israels op, ende si besagen hen met malcanderen, hy ende Amasia de coninc Iuda, tot BethSemes, die in Iuda leghet.

+ C vers 11

12

Maer Iuda wert gheslagen voor Israel, alsoo dat elck in sine Hutte vluchtede.

13

Ende Ioas de Coninck Israels, greep Amasia den Coninck Iuda, den sone Ioas, des soons Ahasia, tot BethSemes, ende quam tot Ierusalem, ende^† scuerde de mueren Ierusalems, vander poorten Ephraims aen, tot aen de hoeck poorte, vier hondert ellen lanck.

† 2.Par. 32.a.5.

14

Ende nam alle dat gout, ende siluer, ende ghereetschap, dat gheuonden werdt inden huyse des HEEren, ende inden schat des Conincx huyse: Daer toe, de kinderen te pande, ende trock weder nae Samaria.

15

Wat meer van Ioas te seggen is, dat hy ghedaen heeft, ende zijn macht, ende hoe hy teghen Amasia den Coninc Iuda ghestreden heeft, siet, dat is gheschreuen inder Cronijcke der Coninghen Israels.

16

Ende Ioas ontsliep met sinen vaderen, ende werdt begrauen tot Samaria, onder de Coningen Israels. Ende zijn soon Ierobeam wert Coninck in zijn stede.

17

⁺ Amasia de sone Ioas, des Conincks Iuda, leefde nae den doot Ioas, des soons Ioahas des Conincx Israels, vijfthien iaer.

+ D vers 17

18

^† Wat meer van Amasia

† 2.Pa. 25.d.26

[p. 146r]

te segghen is, dat is gescreuen inder Cronijcke der Coninghen Iuda.

19

Ende sy maecten een verbont teghen hem te Ierusalem. Maer hy vluchte nae Lachis. Ende si sonden nae hem te Lachis, ende dooden hem aldaer.

20

Ende brachten hem op peerden, ende wert begrauen te Ierusalem by sine vaderen, inde stadt Dauids.

21

Ende dat gheheele volck Iuda nam^† Asaria, in sinen sestienden iaer, ende maecten hem Coninc in de stede zijns vaders Amasia.

† 2.Par. 26.a.1.

22

Hy timmerde Elat,^* ende brachtse weder tot Iuda, nae dien de Coninck met sinen vaderen ontslapen was.

* 4.Re. 16.a.6.

23

Inden vijfthienden Iaer Amasia, des soons Ioas, des Conincx Iuda, wert Ierobeam de sone Ioas Coninck ouer Israel, te Samaria eenenveertich iaer.

24

Ende dede dat den HEEre mishaechde, ende en liet niet af, van alle sonden Ierobeams, des soons Nebat, die Israel dede sondighen.

25

⁺ Maer hy bracht weder daer toe alle de palen Israels, van Hemath aen, tot aende zee, die inden blacken velde leyt, na den woorde des HEEren des Godts Israels, dat hy gesproken had door sinen knecht^† Iona, den sone Amithai den Propheet, die van^* Gath Hepher was.

+ E vers 25

† Ione. 1.a.1.

* Iosu. 19.a.13

26

Want de HEEre sach aen dat allendighe iammer Israels, dat oock de beslotenen ende verlatene wech waren, ende gheen Helper in Israel en was.

27

^† Ende de HEEre en hadde niet gesproken, dat hy den name Israels wt wilde schrabben onder den Hemel. Ende halp hen door Ierobeam den sone Ioas.

† 4.Reg. 13.e.23 Hose. 1.a.7.

28

Wat meer van Ierobeam te segghen is, ende al wat hy ghedaen heeft, ende zijne macht, hoe hy ghestreden heeft, ende hoe hy Damascon ende Hemath weder bracht aen Iuda in Israel, siet, dat is gescreuen inder Cronijcken der Coningen Israels.

29

Ende Ierobeam ontsliep met sinen Vaderen, metten Coninghen Israels. Ende zijn sone Sacharia wert Coninck in zijn stede.