Den Bibel, Inhoudende dat Oude ende Nieuwe Testament (Biestkensbijbel)

¶ Dat .xiij. Capittel.

¶ Vanden Coningen Ioachas, Ioas, Ieroboam, Ende hoe dat een doode weder in Eliseus graf leuendich wert.

1

⁺ INden drientwintichsten Iare Ioas, des soons Ahasia, des Conincx Iuda, werdt Ioahas de sone Iehu Coninck ouer Israel, tot Samaria, seuenthien iaer,

+ A vers 1

2

Ende dede dat den HEEre qualijck beuiel, ende wandelde nae de sonden Ierobeams des soons Nebath, die Israel dede sondigen, ende en liet daer niet van af.

3

Ende des HEEren gramschap verbolch ouer Israel, ende gafse onder de hant Hasael, des Conincx tot Sirien, ende Benhadad des soons Hasael, haer leefdaghe lanck.

4

Maer Ioahas badt des HEEren aenghesicht. Ende de HEEre verhoorde hem. Want hy aensach dat iammer Israels, hoese de Coninck tot Sirien dreef.

5

⁺ Ende de HEERE gaf Israel eenen^* Heylant, diese wt het ghewelt der Siriers leydde, dat de kinderen Israels in haren Hutten woonden als te voren.

+ B vers 5

* Beschermer.

6

Nochtans en lieten si niet af vanden sonden des huys Ierobeams, die Israel dede sondighen: Maer wandelden daer in. Oock bleef dat Boschken te Samaria staen.

7

Want vanden volcke Ioahas en was niet meer ouerbleuen, dan vijftich Ruyters, thien waghens, ende thien duysent voetvolcx. Want de Coninc tot Sirien hadse vernielt, ende hadse gemaect, als dorsch stof.

8

Wat meer van Ioahas te seggen is, ende alle wat hy gedaen heeft, ende sine macht, siet, dat is gheschreuen inde Cronijcke der Coninghen Israels.

9

Ende Ioahas ontsliep met sinen vaderen, ende men begroef hem tot Samarien. Ende zijn soon Ioas werdt Coninck in zijn plaetse.

10

Inden seuenendertichsten iaer Ioas, des Conincks Iuda, werdt Ioas de sone Ioahas Coninck ouer Israel, tot Samaria, sesthien iaer.

11

Ende dede dat den HEEre qualijck beuiel, ende en liet niet af van alle de sonden Ierobeams, des soons Nebat, die Israel dede sondighen, maer hy wandelde daer in.

12

Wat meer van Ioas te seggen is, ende wat hy ghedaen heeft, ende zijn macht, hoe

[p. 145v]

hy teghen Amasia den Coninc Iuda ghestreden heeft, siet, dat is geschreuen in de Cronijcke der Coninghen Israels.

13

Ende Ioas ontsliep met sinen vaderen, ende Ierobeam sat op sinen stoel. Ioas werdt begrauen te Samaria, by de Coninghen Israels.

14

Ende Elisa wert cranck, waer af dat hy oock sterf. Ende Ioas de Coninc Israels quam tot hem neder,⁺ ende weende voor hem, ende sprac:^† Mijn vader, mijn vader,^‡ wagen Israel ende zijn Ruyter,

+ D vers 14

† 4.Reg. 2.c.12.

‡ Voerman.

15

Elisa sprac tot hem: Neemt den boge ende de pijlen, Ende doen hy den boghe ende de pijlen nam,

16

Sprack hy totten Coninc Israels: Spant den boge met uwer hant: Ende hy spanden met zijnder hant. Ende Elisa leyde zijn hant op des Conincx hant,

17

Ende sprac: Doet dat venster Oostwaerts open: Ende hy dede dat open. Ende Elisa sprac: Schiet: Ende hy schoot. Maer hy sprack: Eenen pijle des Heyls vanden HEEre, eenen pijle des Heyls teghen de Siriers, ende ghy sult de Siriers slaen tot Aphek, tot dat sy te niete worden.

18

Ende hy sprack: Neemt uwe pijlen. Ende doen hyse nam, sprack hy totten Coninck Israels: Slaet de Aerde. Ende hy sloech driewerf, ende stont stille.

19

Doen wert de man Gods gram op hem, ende sprac: Hadt ghy vijf oft ses mael gheslaghen, so sout ghy de Siriers gheslaghen hebben, tot dat si alle te niete geworden waren: Mer nv sult ghyse driemael slaen.

20

⁺ Maer als Elisa ghestoruen was, ende men hem begrauen had, vielen de Crijschlieden der Moabiten int landt, int selue iaer.

+ E vers 20

21

Ende het geschiede dat si eenen man begroeuen. Maer doen si de Crijschlieden saghen, worpen si den man in dat graf van Elisa:^* Ende doen hy daer in quam, ende dat gebeente van Elisa aenroerde,^† werdt hy leuende, ende tradt op zijne voeten.

* Eccl. 48.b.14

† 4.Reg. 8.b.12

22

Alsoo dwanck nv Hasael de Coninc tot Sirien, Israel, alsoo langhe als Ioahas leefde.

23

Maer de HEERE dede hen ghenade, ende ontfermde haerder, ende keerde hem tot hen, om zijns verbonts wille, met Abraham, Isaac, ende Iacob, ende en wildese niet verderuen,^† ende en verwerpse van sinen aensichte niet tot deser vren toe.

† 4.Regum. 14.e.27. Abd. 1.d.17. Hoze. 1.a.7.

24

Ende Hasael de Coninck tot Sirien sterf, ende zijn soon Benhadad wert Coninck in zijn plaetse.

25

Maer Ioas keerde wederom,^† ende nam de steden wter hant Benhadad, des soons Hasael, die hy wter hant zijns vaders Ioahas genomen hadde met strijde. Ioas sloech hem driewerf, ende bracht die steden Israels weder.

† 4.Re. 12.d.17