Den Bibel, Inhoudende dat Oude ende Nieuwe Testament (Biestkensbijbel)

¶ Dat .xij. Capittel.

¶ Hoe dat Ioas regeerde, de wijle dat Ioiada leefde, ende hoe daer nae Ioiada sterf.

1

⁺ INt seuenste iaer Iehu, wert^† Ioas Coninck, ende regeerde veertich jaer te Ierusalem. Sijn Moeder hiet Sibea van Bersaba.

+ A vers 1

† 2.Par. 24.a.1

2

^* Ende Ioas dede was recht was, ende den HEEre wel behaechde, alsoo langhe als hem de Priester Ioiada leerde,

* 2.Par. 26.a.5.

3

Dan dat sy de Hoochten nyet wech en namen, want het volck offerde, ende roocten noch op de Hoochten.

4

Ende Ioas sprack totten Priesteren:^† Alle dat ghelt dat geheylicht wort, dat het in dat huys des HEEren ghebrocht worde, dat gangbaer ende begheeffelijc is,

† Exod. 30.b.13.

[p. 145r]

dat ghelt dat elck geeft inder schattinghe zijnder sielen, ende alle dat ghelt, dat elck van vrijer herten offert, dattet int huys des HEEren ghebrocht worde, dat laet de Priesters tot hen nemen, een yeghelijc van zijnder kennisse:

5

Daer af sullen sy beteren, al wat verualt aen den huyse des HEEREN, waer sy vinden, dat yet verualt.

6

Maer doen de Priesters tot int drientwintichste iaer des Conincx Ioas, niet en beterden dat veruiel aen den huyse,

7

Riep de Coninck Ioas den Priester Ioiada, metten Priesteren, ende sprac tot hen:⁺ Waerom en betert ghy niet, wat veruallen is aenden huyse? Daerom en sult ghy nv niet tot v nemen dat gelt, een yeghelijck van zijnder kennisse, maer sullet gheuen tot dien dat veruallich is aen den huyse.

+ B vers 7

8

Ende de Priesters consenteerden vanden volcke gheen gelt te nemen, ende dat veruallende aen den huyse te beteren.

9

Doen nam de Priester Ioiada^† een kiste, ende boorder bouen een gat in, ende settese ter rechter hant, neffens den Altaer, daermen int huys des HEERen gaet, ende de Priesters, die aen den dorpel de wacht hielden, staken alle tghelt daer in, dat tot des HEEren huys ghebracht werdt.

† 2.Par. 24.b.8 Luce. 21.a.1.

10

Ende als si dan saghen datter veel ghelts inder kisten was,^† soo quam des Conincks schrijuer op metten hooghen Priester, ende bonden dat gelt tsamen, ende teldent, wat voor des HEEren huys gheuonden wert.

† 4.Re. 22.a.4

11

⁺ Ende men gaf dat ghelt ghereet ouer, den genen die daer arbeyden, ende gestelt waren totten huyse des HEEren. Ende si gauent wt den timmerlieden, die daer timmerden ende arbeyden aen den huyse des HEEren,

+ C vers 11

12

Te weten, den muerlieden, ende steenhouwers, ende die daer hout, ende ghehouwen steenen cochten, dat dat veruallen aen den huyse des HEEren ghebetert soude worden, ende al wat si beuonden van noode te zijn te beteren aen den huyse.

13

Nochtans en lietmen gheen silueren schalen maken, noch Psalters, beckens, trompetten, noch eenighe gouden oft silueren gereetschap, inden huyse des HEEren, van dien ghelde dat totten huyse des HEEren ghebracht wert:

14

Maer men gaf dat den arbeyders, dat si daer mede dat veruallen aen den huyse des HEEren souden beteren.

15

Ooc en behoefden die mannen gheen rekeninge te doen, diemen dat gelt dede, dat zijt den arbeyders souden geuen, Maer si handelden op ghelooue.

16

Maer dat ghelt van Schultofferen ende Sondofferen, en wert niet totten huyse des HEEren gebracht, want het was der Priesteren.

17

^* Tot dier tijt, trock Hasael de Coninck tot Sirien op, ende streedt teghen Gath, ende wontse.^† Ende doen Hasael zijn aensicht stelde nae Ierusalem om op te trecken,

* 4.Re. 13.e.25.

† 4.Re. 8.b.12 2.Pa. 24.c.10

18

⁺ Nam^* Ioas de Coninc Iuda alle dat gheheylichde, dat zijn vaders Iosaphat, Ioram ende Ahasia, de Coninghen Iuda gheheylicht hadden, ende wat hy gheheylicht hadde: Daer toe alle dat gout, datmen vant inden schat, inden huyse des HEEren, ende in des Conincks huyse, ende seyndet Hasael den Coninck tot Syrien. Doen trock hy af van Ierusalem.

+ D vers 18

* 4.Regum. 18.c.15.

19

Wat meer van Ioas te segghen is, ende al wat hy ghedaen heeft, dat is gheschreuen in de Cronijcke der Coninghen Iuda.

20

^† Ende zijne knechten stonden teghen hem op, ende maecten een verbont, ende sloeghen hem inden huyse Millo, daer men af gaet na Silla.

† 4.Re. 14.a.5. 2.Pa. 24.e.25

21

Want Iosabar, de sone Simeath, ende Iosabad de sone Somer sine knechten sloeghen hem doot. Ende men begroef hem met sinen vaderen in de stadt Dauids. Ende Amasia zijn soon wert Coninc in zijn plaetse.